إلى كل طلبة الشهادة الثانوية وأهاليهم دعواتي لهم بالنجاح وإن شاء الله الأهالي يفرحوا بالابناء ويدخلوا الكليات اللي بيتمنوها ، الصورة اللي مع الموضوع دي صورتي سنة 1989 وأنا باذاكر للثانوية العامة ومن شدة اضاءة الاباجورة عملت كاب ورق مصنوع من صفحتين من نص الكراسة ، أياميها وأنا باذاكر كان أهم هدف عندي أني أنجح ، فكرة التفوق دي مكنتش بتلح عليا ، عمري ما أخذت درس خصوصي حتى وأنا في الثانوية العامة ، كنت باتفرج على البرامج التعليمية اللي في التلفزيون وأسجلها كاسيت مش فيديو لأني من النوع اللي بيخزن اللي بيسمعه من المدرس أكثر من اللي باقرأه ، كنت بأحاول بقدر الامكان محسسش أهلي بالقلق سواء نفسيا أو ماديا ، كنت باتمنى دخول كليتين عكس بعض تماما ، كلية الشرطة لأني كنت رياضي ولحبي أني يكون في ايدي سلطة زي أي شاب مراهق في السن ده ده غير أنها وقتها كانت بتاخد مجموع صغير ، وكلية الفنون الجميلة لأني كنت بارسم كاريكاتير من طفولتي ، الحمد لله لا دخلت دي ولا دي ، سبحان الله للنصيب أجيب مجموع صغير لدرجة أنه لا داعي لذكره ، ولكني أنجح في امتحان قدرات الفنون ، ولأن لي نصيب أدرس الفنون بالرغم من مجموعي الضئيل كانت هناك كليات جديدة افتتحتها وزارة التعليم العالي لسد العجز في مدرسين التربية الفنية والموسيقية ، وهي كليات التربية النوعية للفنون والموسيقى وكانت ثاني دفعة تدخل هذه الكليات وتتخرج منها هي دفعتي ، وقتها مكنتش مصدق أني بعد وصولي للمرحلة الأخيرة في التنسيق أني ممكن أدخل كلية وكمان في الدقي ، اللي انضمت بعد كده لجامعة القاهرة ، والحمدلله دخلت الكلية واتخرجت واشتغلت واديني باكتب ذكرياتي أهوه ، خلاصة الكلام ده أيه .. ذاكروا وأمتحنوا وأعملوا اللي عليكم واللي مكتوب لكم في المستقبل عند الله هو اللي هيتحقق ، مش لازم تخش طب ولا هندسة علشان تكون ناجح ، ومش معنى أنك تخش أي كلية غير دول عشان مجموعك صغير أنك فشلت .. الحياة العملية اهم من الدراسية بس أنت بتعمل اللي عليك وفي النهاية إلى كل الاصدقاء اللي مش في ثانوية عامة ولهم أخ ولا أخت أو قريب فيها يا ريت تبلغوه تحياتي ودعواتي له بالنجاح
