جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, September 19, 2007

Lars Vilks

مش فاهم يا جماعة ايه السبب في إن رسامي الكاريكاتير الغرب شنين حرب شعواء على الاسلام وعلى الرسول صلى الله عليه وسلم.. وآخرهم رسام سويدي يدعى لارس فيلكس أقل ما يقال على طريقته في الرسم من الناحية الفنية إنها نبش فراخ .. راسم صورة فيها إهانة للرسول وللاسلام تحت مسمى إن الاسلام يعني حقوق الانسان والحيوان ومش عايز أفسر أكتر من كده لأن الرسم فعلاً مهين

أنا مش فاهم فعلاً الاسلام عمل للناس دي أيه ؟ مع العلم أنه لم يخرج أي فنان كاريكاتير مسلم ورسم صورة تهين سيدنا موسى أو سيدنا المسيح وده بمنتهى البساطة لأن المسلم الحق لابد أن يؤمن بجميع الأنبياء ويوقرهم ويحترمهم ويحترم رسالتهم كما يحترم رسول الله محمد صلى الله عليه وسلم .. ودي أخلاق الاسلام وأخلاق المسلمين .. وأنا هنا لما حبيت أرسم رسام بيهاجم الاسلام لم أرسم رأسه رأس حيوان لأنى شعرت إن فى ده إهانة للحيوانات وكفاية إن الشخص اللي بيقدم على مهاجمة الاسلام والرسول برسوماته الركيكة يوصف بأن عقليته ورأسه مثل القفل المنغلق على أفكار هدامة وعدوانية ضد هذا الدين الحنيف

أسئلة تطرح نفسها

لماذا لم يتهكم هذا الرسام على من يعبد البقر في القرن الواحد والعشرين؟

أو لم يتهكم على من يشعل البخور أمام تمثال ويسجد له؟

العجيب أنه يتهكم على دين رسوله يدعو إلى مكارم الاخلاق وعبادة إله واحد

لم يكن إتجاه مدونتي ديني أو متعصب لإتجاه معين ومازال ولكن في هذا الشهر الكريم حيث يقتنص كل مسلم أي فرصة حتى يحصل على رضا الله رأيت أن أرد وأن أقول لهذا الشخص بنفس طريقته .. بالكاريكاتير .. أنت كارتونست
قفل

وبأوجه له سؤال .. هل شعرت برجولتك لما تهكمت على رسول المسلمين وتهكمت على دين الاسلام؟

من يريد أن ينشر رسمي هذا على مدونته فلا مانع لدي ومن يريد أن يطبعه في جريدته أو مجلته فلا مانع أيضا

يمكنك مشاهدة اعلان عن هذه التدوينة على اليوتيوب بالضغط هنا

26 comments:

شيماء الجيزى said...

لا املك الا ان اقول
حسبى الله ونعم الوكيل

فعلا
كارتونست قفل

بس ايضا اضافة سؤال سيدى

هل هذا ناتج عن تعصب دينى وان كان
ام محاولة لترويج نبش الفراخ المادى؟

تحياتى لك استاذ ياسر

The Groom said...


وقفل مصدي كمان

عموما يا رسام الله سبحانه وتعالى شديد العقاب

تحياتي لك من ماناساس البلد وشكرا لك

lamada said...

حسبى الله ونعم الوكيل
واذا كانت دى بتمثل بالنسبه ليها حرية راى وتفتح فللاسف
دول ابعد ما يكون عن الحريات واحترام الاديان واحترام وتقدير الرأى والرأى الاخر
حقيقى قفل
كل سنه وحضرتك طيب
لماضة

Human said...

لا أملك إلا أن أقول حسبي الله ونعم الوكيل ..ولكن في أيدينا الكثير لنغير ...للأسف ياصديقي هناك الكثير لا يعلموا مايحدث من حولهم ..لا يعلموا تلك الحرب التي يشنوها بإسم حرية التربية ...والحرية منهم براء
جزاك الله خيرا

ياسر حسين said...

شيماء الجيزى
العجيب أن في الكثير من الافلام التي تنقل واقع المجتمعات الغربية نجدها غير متدينة بالمرة ولكن يوجد منهم من له فكر متطرف وربما يريد الشهرة ايضاً ويريد ترويج نبش الفراخ خاصته

The Groom
سلامي لماناساس البلد وماناساس المحطة كمان
بس هو فعلاً قفل مصدي

lamada
مرحبا بيكي في كارتونيا
الناس دي فعلا بتطلق شعارات للعالم كله
العالم العربي يطبقها
وهما لا يطبقونها على انفسهم
زي احترام الاديان كما ذكرتي

Human
مرحباً بك في كارتونيا
أحب أن أشكرك لأنك كنت صاحب دعوة ألا نسكت على هذا الكلام وبعد أن قرأت كلامك في مدونتك قمت بعمل هذا الموضوع ورسمت هذا الكاريكاتير كنوع من المشاركة في عدم السكوت
وجزاك الله خيراً

خالص تحياتي للجميع
رمضان كريم

koukawy said...

اه حقيقي علي رأيك السبب مجهول في حين ان كل المعتقدات التانيه فيها حاجات تهلك من الضحك و يتكتب فيها و يترسم مجلدات
رمضان كريم بقي

Marvel said...

المشكلة ان مفيش حد بيقتل بسم البقرة المقدسة...انما في ناس بتقتل بسم الله وبسم الاسلام

طبعا اي اساءة مرفوضة تماما..لكن مش لازم ندفن راسنا في الرمل ونخبي عنينا عن حقيقة اننا نسيء لديننا اكثر مما يسيء له الغرب

ايوية said...

ويمكرون ويمكر الله والله خير الماكرين

ياسر حسين said...

koukawy
أشكرك على تعليقك ... الله أكرم

Marvel
مرحباً بك في كارتونيا
وعندما يقتل الامريكان في المسلمين في افغانستان وفي العراق
والاسرائليين عندما يقتلون في الفلسطينيين في فلسطين المحتلة
بأي إسم يقتلون؟
أوافقك أن هناك من يسىء إلى الاسلام بأفعاله من المسلمين أنفسهم ولكن هناك من يحسنون ايضاً لصورة الاسلام والمسلمين
بالفعل والخلق الطيب ولكن الاعلام الصهيوني لعب دوراً في اظهار العرب والمسلمين بمثل هذه الصورة المشوهةبابرازة مثل هذ النماذج المتطرفة في السلوك والتى تزعم تمسكها بالدين الاسلامي في حين انهم ابعد ما يكونوا عن ذلك

ايوية
لا أملك سوى أن أقول
صدق الله العظيم

خالص تحياتي للجميع
رمضان كريم

one said...

الفنان ياسر حسين
حقيقى أحييك على رسمك الرائع
اللى مع الأسف مشفناش أى رسام مسلم أتحرك وحاول يرسم كاريكاتير يرد بيه ع الموقف الأخير والظاهر أنها كانت موضة ايام الاساءة الأولى وانتهت عن الرسامين
وحسبنا الله ونعم الوكيل

Anonymous said...

فن ايه ده المبني على شتيمة الناس والأديان ده واضح أنه فعلا نبش فراخ زى ما حضرتك وصفته
جزاك الله خيرا على الكاريكاتير المعبر
عمرو عبد الهادى

fanan fa2eer said...

المسألة ببساطة يافنان انه واحد زي ده غير أنه طبعا عديم الأخلاق وشكله لا يؤمن بدين من الأساس

الا ان التعتيم الاعلامي علي حقيقة الاسلام والمحاولة المستمرة في تشويه صورته في الغرب

وبرده تقصير المسلمين في الدفاع عن دينهم وعن نشر الاسلام الحقيقي في الدول الغربية هي السبب في ان كل يوم والتاني ناس أقل مايقال عنها انها لا ترقي الي أن تنطق كلمة مثل كلمة اسلام
تتطاول علي ديننا الحبيب

في النهاية
حسبنا الله ونعم الوكيل

تحياتي

Anonymous said...

من جهة قفل فهو قفل
بس ده مينمنعش إن فى مجتمعاتنا برضك فيه أقفال جايبين لنا الكلام اللى مالهوش لازمه ده
الكاريكاتير بتاعك حلو
اديلو كمان
تامر سامى

نهى منير said...

الفنان ياسرحسين
أحييك من كل قلبى ع البوست القوى ده
وعلى الكاريكاتير المعبر
ومبادرة جميلة منك لم نراها فى كثير من المدونات
ولى تعليق أخير
يا ريت زى ما بيطلع من الغرب رسامين بيشوهوا صورة الاسلام
يطلع من بين المسلمين رسامين يحسنوا الصورة دى
يعنى نظرية الاعلام والاعلام المضاد
أنا سمعتها كده
:):):)
بـــــــــــاى

اسكندراني اوي said...

حلو اوي التناول دا يااستاذ ياسر

من الناحيه الفنيه صاحبنا ساقط
ومن الاخلاقيه حدث ولا حرج

انا برضه اتجاه البلوج عندي ليس ديني ولا متعصب ولا سياسي ولكن الموضوع
اثارني لدرجه الغيظ

تحياتي ليك يا استاذ ياسر

تامر حسين said...

كنت عاوز اضيف حاجا لو تسمحلي اخي العزيز
علي فكره الرسامين المعقدين نفسيا دول مش قاصدين الاسلام بس دول قاصدين الاسلام والمسيحيه كمان وانا بالفعل عندي صور كاريكاتيريه تهين السيد المسيح بس انا مرعاه لمشاعر اخواننا المسيحين مش قادر اضيفها في مدونتي حتي لا اقابل بهجوم واكانني اقصد شيء
بل بالعكس انا بس كنت عاوز اقولكم كلكم انهم قاصدين الديانات باكملها لانهم في الاول والاخر ليس لهم مله ولا دين
حسبي الله ونعمي الوكيل
تحياتي

علاء سالم said...

السلام عليكم

موضوعك جميل يا أستاذ حسين ورسمك أجمل وأجمل .
والفرق الواضح بين الرسمين هو الفرق بين أخلاق ورقي الفنان المسلم في نقده
ومابين سفالة وهمجية واحد ليس له دين ولا خلق.

فوضع الرسمين بجوار بعضهما البعض لا يحتاج أكثر من وضع إطار يجمعهما معاً وكتابة جملة بدون تعليق تحتهما .

Miss Egyptiana "Trapped Soul" said...

سؤالك يضغط على الجرح يا عزيزى
لماذا يفعل ذلك ؟

اوافق فنان فقير فى رايه
اولاً الموضوع كله اتجاه عالمى لتشويه الاسلام، وبعض مرضى القلب ياخذون من الموضوع وسيلة للشهرة

بالاضافة الى ان المسلم العربى لو عنده اكثر من الكلمات الجوفاء كان احترمه الاخرين، على عكس عابدى البقر والنار

تحياتى لك

bos bos said...

أنا بصراحة مش عارفة تفكير الناس دى بيروح لحد فين
جايز يكونوا بيفكروا أن دى الحاجة اللى ممكن تشهرهم وتخلى ناس كتير تعرفهم بس أنا برضة شايفة ان دى لا شهرة ولا حاجة لانها بتثير أشمئزاز ناس كتير

CresceNet said...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. (If he will be possible add the CresceNet(www.provedorcrescenet.com) in your blogroll I thankful, bye friend).

ابن عمر said...

هذا ما هو إلا
جزء من الحرب
على الاسلام
حرب فكرية واقتصاديه ...............
.....................
فهيا انصروا الاسلام

ياسر حسين said...

one
مرحباً بك في كارتونيا
يوجد من الفنانين من قام بالرد غيري
إبحث جيدأً وبالتأكيد سوف تجد

عمرو عبد الهادى
مرحباً بك في كارتونيا
وجزاك الله خيراً أنت أيضاً وأشكرك على تعليقك

fanan fa2eer
فعلا أعتقد أنه لا يعتنق أي دين هذا خلاف ما يراه العالم من ردود أفعال المسلمين عند الغضب أو التظاهر من حرق للأعلام أو تكسير مبانى أعطى إنطباع للعالم أن المسلمين همجيين وساعد في نقل هذه الصورة المغلوطة الاعلام الصهيوني

تامر سامى
مرحباً بك في كارتونيا
مع الأسف يوجد في مجتمعاتنا بالفعل أقفال أساؤا لصورة المسلمين وأشكرك على تعليقك

نهى منير
حمدلله ع السلامة يا نهى فينك من زمان
أكيد يا نهى في من الفنانين المسلمين من يستطيع نقل صورة جيدة عن الاسلام من حيث اسلوب الحوار الراقى وعدم الرد بنفس اسلوب التناول الحقير هو أفضل رد

اسكندراني اوي
مرحباً بك في كارتونيا
أشكرك على تعليقك الجميل وأنا سعيد إن التناول عجبك وأتمنى إن الصورة دي تتنقل للعالم كله إن فنان الكاريكاتير المسلم عندما يتناول قضية يتناولها بخلق راقى ، فلا يوجد أسهل من رسم إنسان بجسم حيوان أو العكس ، فلا يوجد فكر فى هذا

تامر حسين
على فكرة يا تيمو كم كبير من الصور دي كنت أجده مدرج في كتالوجات المعارض الدولية للكاريكاتير اللي كنت بشارك فيها منذ فترة وشعرت حينها أنهم يسعون لإزدراء الاديان والتركيز على موضوع الجنس مما جعلنى حريص جدا في انتقاء المعرض أو المسابقة الدولية التى أشارك فيها حتى لا أكون شريك فى معرض يهين الديانات

علاء سالم
مرحباً بك في كارتونيا
زرت مدونتك .. أشعارك جميلة
أشكرك على تعليقك الجميل

Miss Egyptiana "Trapped Soul"
أتضح بالبحث أن لهذا الرسام معجبين كثيرين وأنه ليس بحاجة لمثل هذا الفعل للشهرة ، إذن فأنه يفعل ذلك من منطلق فكر شاذ بداخله وكراهية للاسلام في حين أنه لو تعب نفسه وقرأ عن الاسلام وإلى ماذا يدعو رسوله لما فعل ذلك ولكنه من القوم الذين لا يعقلون

bos bos
من الخطأ أن يتعصب الفنان لفكر واحد وإتجاه واحد والعقلاء من جميع الشعوب لن يتعاطفوا مع من يسخر من الدين
يمكنني أن أكون أشهر فنان بالخلق الطيب وباتقاني لعملى واحترام الآخرين
وليس بمثل هذا الاسلوب الرخيص

CresceNet
Thanks for your Advertaising

ابن عمر
مرحبا بك في كارتونيا
أشكرك على تعليقك
وفقنا الله جميعاً في الدفاع عن دين الاسلام وإحترام كل الاديان فهذا من أخلاق الاسلام والمسلمين

خالص تحياتي للجميع
رمضان كريم

Sarah Daw said...

حسبي الله و نعم الوكيل فيهم

ياسر حسين said...

Sarah Daw
حمدلله على سلامتك
وحسبنا الله ونعم الوكيل فيهم

خالص تحياتي

Anonymous said...

بجد الموضوع ده لازم يبقى له حد لأنه فاق الحدود ولابد من وقفة جادة لمواجهة هذه الحب الشعواء على رسولنا الكريم وعلى فكرة تسأولأتك عن عدم تهكمهم على عبدة البقر والوتنين ان دل على شئ فهو يدل على ان الحرب عى الاسلام ورسوله مقصودة ويتم التجهيز لها بشكل منظم ودورى البداية كانت الدنمارك والنرويج والان السويد فما المقصد من وراء ذلك؟ نورونا مع خالص تحياتى ASMA ELAMIN

ياسر حسين said...

ASMA ELAMIN
مرحبا بيكي في كارتونيا
المقصد من وراء ذلك السخرية من كل ما هو مقدس ومحترم وعلى حق
حتى تعم الفوضى وتسوء الاخلاق وفي ذلك مجال خصب لتسويق كل ما هو فاسد من سلاح واعلام إباحي وإعلام مضلل

خالص تحياتي