جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Monday, March 3, 2008

اللي مش عاجبه يمشي

اللي مش عاجبه يمشي
هي عبارة رددها النجم حسين فهمي في مؤتمر صحفي حول خلافات حدثت في كواليس مسرحية تعرض حاليًا على المسرح القومي
الخبر في حد ذاته لا يقع في دائرة اهتماماتي ولكن مالفت انتباهي خاصة عند مشاهدة المؤتمر الصحفي في احدى القنوات الفضائية هذه العبارة .. اللي مش عاجبه يمشي .. ثم تبرير النجم حسين فهمي لهذه العبارة أنها فلسفة لأن لا يوجد شيء يجبر الانسان على التواجد في مكان أو القيام بعمل غير راض عنه
وفجأة تذكرت مديري في أحد الأماكن التي كنت أعمل بها في مصر وقد كان كل العاملين وهم يعملون في مجال البرمجيات والرسوم المتحركة يشتكون من صغر قيمة مرتباتهم فما كان من المدير سوى أنه كان يردد علينا هذه العبارة
اللي مش عاجبه يمشي
وأنا بقى معجبنيش ومشيت لأني لم أكن راض عن هذا الوضع
وأتذكر عبارة قالها لي صديقي الكاتب والسيناريست سمير الجمل حيث قال لي يومًأ
غير وضعك بنفسك متستناش حد يغير لك وضعك
وقد كان .. والحمدلله للأفضل ..فبغض النظر عن ملابسات موضوع الخلاف المثار حول المسرحية
فأنا من معتنقي فلسفة اللي مش عاجبه يمشي على حد تعبير النجم حسين فهمي
ومش عارف مين اللي متفق معايا ومين مختلف
في انتظار تعليقاتكم

14 comments:

أسامة أبوالخير said...

شكرا لك استاذ ياسر على طرحك لأفكار جديدة من خلال مدونتك وإن كانت هذه الأفكار واقعا عمليا نلمسه في حياتنا واستكمالا لحديثك كان لي صديقك يقولي دائما إن لم يميزوك فميز نفسك ولكن أنا ضد أن تحتكر أي مؤسسه لموظفيها ومن ثم تقرفوا في عشتو ولما تجيلوا الفرصه يهددوه بكذا وكذا ساعتها مقولة اللي مش عاجبه يمشي يبقى تصرفها المؤسسه من بتاع البوظا الحمصي الشاهد من كلامي أن من المؤيدين لمقولة "ما فاز باللذات إلا كل مغامر" وكن صاحب قرارك وكن كذلك فيه حاسما ودعك من آراء أعداء النجاح في كل مكان وزمان
تحياتي
معجب بشخصيتك

امرأة تقول الذي لا يقال said...

مش هينفع كل مايعجبناش حاجة نمشي
الحياة مابتتاخدش قفش (:
لازم شوية نستحمل عشان نعرف نعيش

Masria said...

في حالات كتير ما ينفعش اطبق عليها المبدأ ده .. زي مثلا أنا مش عاجبني نظام التعليم المصري.. هامشي اروح فين؟
تحياتي
:)

ياسر حسين said...

أسامة أبوالخير
أشكرك يا عزيزي على تعليقك وأتمنى أن تلاقي موضوعاتي اعجابك دائما

امرأة تقول الذي لا يقال
الموضوع مالهوش علاقة بأن الحياة ناخدها قفش
ولكن له علاقة بالتمرد على كل ما هو محبط
أنتي في مكان غير مريح وغير آمن ومش عاجبك
ما الذي يجبرك على التواجد فيه والاستسلام لضغوطه بدون محاولة لتغيير وضعك؟
هذا ما أقصده
:)

Masria
بالرغم من ان المبدأ غير مطلق إلا أنه حتى في الدراسة ممكن تطبيقه
فعلى سبيل المثال طالب بكلية الحقوق ولا يحبها ويتكرر رسوبة فيها وميوله للآداب ومن الممكن أن يحول إلى آداب
ما الذي يجبره على البقاء في حقوق
:)

خالص تحياتي وشكري للجميع

مشمش said...

الي يقول الكلمة دي لانة في وضع يسمحلو انة يقولها ولية نفوز هوة راجل عنده نقص وعقده نفسية ومغرور لكن اي انسان محترم مش ممكن يقولها لازم يتفاهم بالعقل وبالاحترام اصله مش سواق مكروباص والي مش عاجبة كلامي ينزل
مش كدة ولا اية

ايوية said...

انا مش متفقة معاك
يعنى اية مش عاجبنى مكان امشى واسيبة لية محاولشى اغير الغلط واتفاهم مع الى انا حاسس انة سبب الغلط يا يقنعنى يا اقنعة انما انى امشى ابقى انسان سلبى
والدنيا عمرها مهتتغير لو مشينا بالمبداء دة
تحياتى

عاليا حليم said...

أنا مع حسين فهمى قلبا و قالبا و عملتها مرتين قبل كده و ضيعت فرص كويسة عليا بس لازم اعترف انى رجعت اتندمت دلوقتى
ليس كل ما يتمناه المرء يدركه خاصة فى بلدنا هذا

شكرا على حقلة الناس و انا تذكار جميل مع صحبة سعدت بمعرفتها

خالص تحياتى

ياسر حسين said...

مشمش
يا خبر أيه كل الكلام الجامد ده
ده انتي واضح إن الكلام مش عاجبك بالمرة
هو ممكن نقول إن العبارة اللي اتقالت دي غير دبلوماسية واحنا بنعتبرها اهانة
:)

ايوية
كلامك منطقي ولكن حين نفقد الأمل في الاصلاح والتفاهم في هذه الحالة الرحيل إلى مكان أفضل هو الحل الأمثل
ولا علاقة لذلك بالسلبية
:)

عاليا حليم
من الأفضل ان لاينظر الانسان خلفه
فما اصابك ما كان ليخطأك
فالرحيل عن مكان مليء بالاحباطات هو افضل الطرق للتغيير ومحاولة النجاح
انا سعيد لأن حلقة الناس وأنا عجبتك
خصوصاً بعد وضع لمسات كارتونيا
:)

خالص تحياتتي وشكري للجميع

تامر حسين said...

كلام جميل فعلا انك تغير وضعك بنفسك بس في الزمان ده مع احترامي الشديد يعني تفتكر لو الواحد مش عاجبه ومشي هيلاقي شغل بالسهوله الي ممكن يلاقيها من عشر سنين فاتو
ولو الواحد عنده مسؤليات ومصاريف هيقدر انه يسيب مكان شغله ويدور علي شغل تاني يقبله ويعجبه
مفتكرش في حد مرتاح اصلا في شغله حتي لو بياخد ملايين ولا انا غلطان
تحياتي

ياسر حسين said...

تامر حسين
ليه انت وغيرك من اللي علقوا بياخدوا كلامي بشكل مطلق
أنا لا أقول اللي مش عاجبه يمشي لمجرد أنه يمشي بلا وجهة محددة
أكيد هيمشي في الوقت المناسب إلى المكان المناسب .. بس تكون في نية للتغيير
غير كده كمان ازاي حد بيكسب كويس ومقضية احتياجاته يبقى قرفان من شغله .. لازم يحاول يحب شغله لأنه مصدر رزقه وعشان يتميز فيه
لكن بقى لو بياخد مليون جنيه وقرفان يبقى انسان غير قنوع ومهما آتاه من أموال لن يشبع ولن يرضى ولن يحمد الله
مش كده ولا أييييييه

تحياتي

تامر حسين said...

والله وجهات نظر وانا كمان مقصدتش اني اعلق علي كلامك انت بالاخص لا انا قصدي علي حسين فهمي يعني
وغير كده انت قلبت علي فؤاد المهندس في كلمتين وبس لييييييييييييه
هههه

ياسر حسين said...

ههههههههههههه
أخويا الصغير وبحبك
أعمل أيه
:)

خالص تحياتي الاخويه

koukawy said...

بس ساعات الواحد بيستحمل لأنه لو معجبوش و مشي مش هيلاقي حته ياكل منها عيش
و الناس عندها ابقاق مفتوحه عايزه المهم المم

ياسر حسين said...

koukawy
أولا : حمدلله على السلامة
ثانيا: يلعن أبو اللقمة اللي متغمسه بذل
أسف ولكن هذا اللفظ الشعبي الدارج
يا ريت كل واحد يحاول
أكرر..يحاول أنه يغير وضعه اللي مش مريحه
والله المستعان

خالص تحياتي