جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, April 30, 2008

شخبط ولخبط


أنت كده ولا كده؟

أنت أهلاوي ولا زملكاوي؟

أنت سني ولا شيعي؟

أنت مسلم ولا مسيحي؟

أنت ارثوزكسي ولا كاثوليكي؟

أنت ليبرالي ولا سلفي؟

أنت يساري ولا يميني؟

أنت اشتراكي ولا شيوعي؟

أيه يا جماعة هو لازم الواحد يكون حاجة ولاحاجة

مينفعش نقول أنت مصري وبس؟


***************


الفيس بوك

بالرغم أنه موقع لا يروق لي وأجده غير مريح في التعامل معه بالنسبة لي

من حيث كثرة القوائم والتفاصيل وليس بسهولة وخصوصية المدونات

إلا أنني أتعجب من شائعة تفكير الحكومة المصرية في حجب الموقع

وأحب أقول للأخ اللي أطلق الشائعة

عيب عليك .. مصر بلد الحريات

وسواء اتحجب الموقع أولم يتم حجبه

حرية الرأي مكفولة .. والكل فاهم الفولة


**************


حلوة وسبوبه

يزعجني كثيرا كثرة العاملين في مجال الجرافيك

خاصة ان اول عمل جرافيك يقوم به مستخدم برنامج الجرافيك

وليكن الفوتوشوب مثلا والذي يستخدم البرنامج لأول مرة

أن يقوم بتصميم كارت شخصي له

ويكتب تحت أسمه بالخط العريض

Graphic Designer

يعني أول ما يشطح .... ينطح


**************


قصة كاريكاتيرية

قصة سمعتها من فنان كاريكاتير معروف

عن فنان كاريكاتير معروف

يقال أن فنان الكاريكاتير صاحب القصة قبل عمله بالكاريكاتير

كان يعمل بمحطة بنزين

وفي يوم أحضرت له خطيبته ساندويتش فول

ملفوف في ورقة جرائد

وأثناء ما كان يلتهم ساندويتش الفول ويتحاور مع خطيبته عن بحثه عن عمل أفضل

وقعت عين خطيبته على رسم كاريكاتيري في ورقة الجورنال

اللي كان ملفوف بيها الساندويتش

عندها قالت له: بُص يا (....) الرسم ده

متعرفش تعمل زيه؟

قال لها (....) : أعمل أبووووه

ومن يومها وهو بقى فنان كاريكاتير وكمان له موقع على النت


بعد مرور السنين من سماعي لهذه القصة أدركت عدة حقائق

أن راوي هذه القصة يمكنه أن ينافس بلال فضل في كتابة سيناريوهات الافلام الكوميدية لما يمتلكه من موهبة في نسج الحواديت الكوميدية

كما أدركت أن صاحب القصة فنان ناجح إلى درجة أنه آثار خيال الفنان الأول لنسج هذه القصة عنه

ولكن مع الأسف

ليس من أخلاقيات المهنة وأقصد فن الكاريكاتير أن تسخر من زميل لك حتى وإن كان مستواه الفني من وجهة نظرك ضعيف

فالفن لا يخضع لقواعد .. بل بالعكس القواعد تخضع للفن



25 comments:

محمد عبد الغفار said...

لازم يكون للواحد ايدوليجية

**********

الفيس بوك ده عسل

*************

فوبيا الألقاب

**********

تلويث الأخر ثقافه مجتمع وليست افة مهنة

A.SAMIR said...

لازم الانسان يكون له فكر وانتماء
كونك مصري اولا لا ينفي انك تكون كما ن اهلاوي او زملكاوي....مسلم او مسيحي
كلاهما لا يتعارض مع الاخر
***********************************
بالنسبة للفيس بوك...ابتدى يتوسع بشكل كبير جدا
بقى موقع زحمة جدا
وان كان لا يمنع من ان له وقته برضه
***********************************
على فكرة
حتى لو القصة كانت حقيقية لا يعيب صاحبها
ففنان الكاريكاتير اعتقد انه لابد ان يكون موهوبا
وكونه كان يعمل في محطة بنزين وهو في الاساس موهوب
لا يعيبه في شيء على الاطلاق
على فكرة
تحية لهذا الشخص المكافح الموهوب لو كنت تعرفه

Amy said...

احنا كمصريين فينا طبع عنصري، مثلا:
انت قاهري ولا صعيدي؟
انت ابيض ولا اسمر؟
انت مصري ولا فيك عرق تركي؟
انت غني ولا فقير؟


احنا بندور ديما علي حاجة نتفوق بيها علي الخلق اللي حوالينا في بلدنا

---------------------------------

الفيس بوك موقع لطيف بس محتاج شوية وقت عشان الواحد يتفهمه. لكن اللي انا ملاحظاه انه دخل في قائمة الموضه. يعني زمان كان البلوج هو الموضه اللي ماشيه في البلد. حاليا الفيس بوك بقي هو الموضه و اخد اكبر من حجمه.

لما الهوجه تخلص هتلاقي الفيس بوك ابسط من الاساطير اللي بيقولوها عليه
--------------------------------

في اي حته هتلاقي ناس كدا. شوف مثلا كمية الناس اللي بتقول علي نفسها مهندس كمبيوتر مع انه مالوش اي علاقة بالهندسة

-------------------------------

الغيرة من زمايل العمل في المجال الواحد تعمل اكتر من كدا :)

مواطن مصرى نايم said...

لا يعنى مش شرط الواحد يكون يا كده يا كده
انا مش بتفرق قوى معايا
______________________
انا برضوا مش بحب الفيس بوك
مش بستريح للتعامل معاه برضوا
ــــــــــــــــــــــ
لا هو بيكون فرحان بنفسة انه بدأيتعلم الحاجات دى
دا على كده انا الحق اعمل كارت
انا رايح اهوه
هههههه
ــــــــــــــــــــــ
لعلمك دى نظرية فى علم النفس
موجودة فعلا انا الواحد يشوة صورة حد او حاجة معينة و ده لانه بيغير منه
او بيحقد عليه
ــــــــــــــــــــــ
موضوعات جميله
و الصورة جميلة
سلامى ليك

اهو ده عيبه said...

والله الهوية مطلوبة لان كل انسان حاله مستقله وله اختياراته لكن متكونش بالشكل ده او تتطور انها تبقى حاجز اننا نفهم بعض او نتواصل او تتحول لاسقاط تهم وتسفيه كل طرف لاراء الاخر
---------------------------------
يمكن الاشاعه ظهرت لان بقى الطبيعى ان الحجب والمنع والحظر هو اسهل حل بالنسبة لهم
بالظبط زى الام اللى تعرف ان ابنها بيلعب كورة فى الشارع تروح مقطعه الكورة بدل ما تحاول تساعده ان ينمى حاجة جواه
والنتيجه انه بيعند اكتر
-----------------------------------
وفرق ايه بقى عن السباك ولا السمسار اللى يروح حاطط صورته على الكارت وكاتب اسمه باكبر بونط
يا عزيزى الموهبه و الاعمال الجيدة هى اللى بتعلن عن اصحابها مش مجرد اسم
على كارت
-----------------------------------
ولنفترض ان الفنان ده اشتغل فعلا فى محطة بنزين طب ده يعيبه فى ايه؟
العيب فى عقلية الراوى المريضه الى متخيله ان ده شئ مهين

شيماء الجيزى said...

فى كتير مبيختاروش بين حاجه وحاجه
بالعكس
ميعرفوش الحاجه والحاجه
واظن ده الافضل


الفيس بوك
زيك تمام
ووصلتنى رسالة الجروب ده
ومقتنعتش
شكلها ناس فاضيه

مهو علشان كده
انا بطالب برجوع الالقاب
الباشا والبيه
شوف كان بيدفع كام علشان يبقى اسمه فلان باشا
دلوقت بقى كل مش عارفه ايه مسمى نفسه
وعجبى


تعرف حضرتك
انا استفدت من القصه
انه فعلا شخص كافح
مهما كان
مشكلتنا احنا بنعمل ايه
مش احنا مين
ولا بدأنا ازاى


تحياتى للعبقرية

ياسر حسين said...

محمد عبد الغفار
اشكرك على تعليقك المختصر المفيد
صحيح
خير الكلام ما قل ودل

تحياتي

ياسر حسين said...

A.SAMIR
يجب عدم الخلط بين الانتماء والتعصب لنادي رياضي والتعامل بالمثل مع الاتجاه الديني
_______

الفيس بوك انا مش باتكلم عن الزحام اللي فيه
:)
________

أشكرك على تقديرك لكفاح الفنان صاحب القصة

خالص تحياتي

ياسر حسين said...

Amy
فعلا محاولة للبحث عن التميز في أشياء لاتعتبر ميزة

-----------
الفيس بوك موضه زيه زي الموبايل والمدونات .. فعلا عندك حق

------------
تمام زي تاجر الطيور اللي عمل كارت وكتب عليه تاجر طيارات
------------
الغيرة المرضية هي اللي بتعمل كده ولكن لو غيرة للتنافس والابداع بينتج عنها تقدم الشخص نفسه
ولو فنان الجمهور بيشوف له انتاج متميز

خالص تحياتي

ياسر حسين said...

مواطن مصرى نايم
أشكرك على التعليق
بس ازاي بتكتب التعليقات القوية دي وأنت نايم؟
:)

خالص تحياتي

ياسر حسين said...

اهو ده عيبه
أصبت لُب الموضوع
----------
تشبيه بليغ..أحيكي عليه
---------
تمام الموهبة بتفرض نفسها
-----------
العمل في محطة بنزين ليس شيء مهين
ولكن ربما بسبب أن الفنان يرسم بخطوط سوداء ثقيلة وكثيفة
وهذا أسلوبه الخاص في الرسم
أوحى للراوي بأن الفنان يرسم بالشحم
:)

خالص تحياتي على تعليقك الدسم

ياسر حسين said...

شيماء الجيزى
في ناس طلعت كده
ومتعرفش حاجة عن كده
:)

الفيس بوك استخراع مفتكس
بس أنا ماليش فيه
لكني ضد تهويل الخبر
واطلاق الشائعات
في بلد الحرياااات
:)

ماهو برضه في ناس بتدفع ألف جنية
وتاخد دورة جرافيك
علشان تشتري اللقب
:)

أنتي أكتشفتي بُعد آخر للقصة
أحييكي

خالص تحياتي

son's egypt said...

السلام علعيكم
الشعب المصري اكتر شعب يحب يالف حاجةويصدقها علي طول

عاليا حليم said...

مين قال ان مصر بلد ديموقراطى
لا شعب و لا حكومة و لا اب و لا زوج و لا ابن و لا زميل و لا مدير و لا حتى صديق
مين الى قال مصر ديموقراطية

اهى دى الى بجد اشاعة

monaliza said...

لو حد سالنى طبيعى هقول انا مسلمة وبعدها انا مصرية والباقى بقى مش مهم
===================================
الفيس بوك معلوماتى عنه قليلة
=========================
الاهم ان ينتهز الشخص الفرصة ويستطيع ان يحدد موهبته

ياسر حسين said...

son's egypt
الكذب وتصديق الكذبة صفة لا تخص الشعب المصري فقط
هناك العديد من الشعوب لديهم هذه الآفة
وربما كانت صفة انسانية
:)

خالص تحياتي

ياسر حسين said...

عاليا حليم
مصر فيها ديموقراطية
بس اللي يدور عليها
يلاقيها
:)

خالص تحياتي

ياسر حسين said...

monaliza
لو اتغربتي خارج مصر
هتعرفي قد أيه قيمة إن الواحد يقول أنه مصري
----------------------
انتهاز الفرصة ليس شرط لنجاح الموهبة
الموهبة هي اللي بتفرض نفسها

خالص تحياتي

واحد من البلد دى said...

البوست ده من أجمل ما قرأت عندك يا ياسر
خصوصا الجزء بتاع الجرافيك ..
تسلم إيدك يا باشا وربنا يكرمك بواحد زى بتاع السندوتش ده
هههههههههه
بس مش حيبقى زيك طبعا
تحياتى ليك

cenotaph said...

طرأتك في التعبير عاليه اوي و دمها خفيف زي أحسن كاتب ساخر أحمد رجب مثلا بجد مواضيعك ليها خدف و بسيطه عشان تفهم اي حد النأطه اللي انت عايزها

ياسر حسين said...

واحد من البلد دى
على فكرة لا يزعجني بالمرة وجود رسامين كاريكاتير جدد أو اصحاب قصص كفاح مثل صاحب القصة فلكل فنان كاريكاتير طابعه الخاص وتعدد وتنوع الفنانين واساليبهم يأتي في صالح الجمهور
:)

cenotaph
مرحبا بك في كارتونيا
صديق جديد ودائم إن شاء الله
أستاذنا أحمد رجب كاتب ساخر محترف
وأنا لست كذلك
ولكنني بحكم مهنتي كفنان كاريكاتير أعبر أحيانا بالكلمات بشكل ساخر
وأشكرك على المجاملة
:)

خالص تحياتي للجميع

أسامة أبوالخير said...

تحياتي استاذ ياسر دائما كتاباتك تأخذني إلى عالم الفكر والإبداع ربما لأنك دائما بتفكر قبل ما تكتب شئ حتى لو كان بسيط، وأنا في رأي أن الإنسان من الأفضل ألا يكون له انتماء إلى أي جماعة ولكن انتمائه الوحيد لعقيدته ووطنه حتى لا يحسب على أحد أو يتم تصنيفهضمن أي تيار ديني أو فكري الأمر الآخر ليس عيبا أن أكون ماسح أحذيه إنما العيب ألا أجيدها وقس على ذلك في جميع المهن والتخصصات

مع خالص تحياتي
معجب بشخصك وفكرك

*سمر* said...

جميلة جدا الشخابيط دى...ومتنوعة..وبتناقش حاجات فعلا موجودة...

تحياتى

حسبي الله ونعم الوكيل said...

شىئ واحد ولكن قدرنا ان نكون شعوب وقبائل لو شاء الله لخلقنا

ياسر حسين said...

أسامة أبوالخير
هذا بالضبط ما أعنيه تماما من خلال هذا الموضوع
أصبت
:)

*سمر*
جميل جدا ان شخابيطي عجبتك
:)

حسبي الله ونعم الوكيل
قدرنا أن نكون شعوب وقبائل .. لنتعارف
أليس كذلك
:)
مرحبا بك في كارتونيا

خالص تحياتي للجميع