جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, September 24, 2008

الفنان الكبير

لقطة من احدى قصص الاطفال المصورة التي اقوم برسمه
في مرحلة العشرينات من عمري كنت اصطدم كثيرا بهذه العبارة حينما كنت أذهب إلى جريدة كبيرة لأنشر أعمالي الكاريكاتورية
إحنا عندنا في الجريدة فنانين كبار
وكنت أشعر بالضيق والاهانة حيث أنني كنت أشعر أنه ليس ذنبي أن سني صغير بالنسبة لهم ، وليس ذنبي أن لدي موهبة رعاها لي والدي منذ الطفولة وشجعني عليها حتى تخرجت من الجامعة أحمل شهادة في الفنون
ولكن من رغم غضبي وضيقي إلا أنني لم أتطاول ولم اسخر من هؤلاء الكبار بل بالعكس كنت أحاول أن أتعلم منهم واستفيد من معرفتي لمشوار حياتهم وكفاحهم وكانت ومازالت لدي قاعدة أؤمن بها أنني ممكن اتعلم من شخص أصغر مني سنا وخبرة في الحياة أن أطور من فني إن كان هذا الشخص متطور ومتقدم عني فإن هذا يحثني على البحث والتطوير من أدواتي
كانت تدور داخل رأسي حوارات كثيرة بسبب مصطلح فنانين كبار منها أني سألت نفسي يعني قصدهم أيه بفنانين كبار؟
كبار في السن يعني؟طيب ما أنا وقتها كان عمري عشرين سنة وكنت على حد ما سمعت ان زمااان كان الشاب عمره تمنتاشر سنة وتلاقيه متجوز وشايل مسئولية بيت ابقى صغير بقى إزاي ، وأيه مقاييس الفنان الكبير عندهم؟
وفي مرة قابلت فنان تشكيلي شهير في الهناجر زمان وقدمت له نفسي كرسام كاريكاتير قام ضحك وفال :كويس إن في رسامين كاريكاتير صغيرين كده .. مع إن عمري وقتها كان ستة وعشرين سنة ، من الآخر يجب تغيير هذا المفهوم .. الفن مفيهوش كبير
بمعنى إن ممكن فنان عمره تمنتاشر سنة يتفوق فنيا على فنان عمره خمسة وثلاثين سنة في حالة واحدة فقط
أنه يكون موهوب فعلا وممتلك لأدواته .. وألا يقلل من شأن من سبقوه في المجال سواء كانوا أكبر سنا أو أقل موهبة منه
لأن هناك ما يسمى باخلاقيات المهنة وهذا الكلام لا يقتصر فقط على مجال الكاريكاتير فقط بل في جميع المجالات
اخلاقيات اي مهنة تحتم على الحديث أن يحترم القديم ولا يتطاول عليه ولايسخر منه أويقلل من شأنه
كذلك تحتم على القديم ألا يتعالى على الحديث وأن يفيده بخبراته
وممكن تكون فنان كبير فنا وسنا ولكن مكروه ومتعالي ، وممكن تكون فنان كبير فنا ولكن صغير سنا فتصبح كبير باخلاقك واحترامك للأخرين ، ويا سلام بقى لو فنان كبير فنا وسنا واخلاقا هيحسسك كفنان شاب أنه زي ابوك وأنه عايز يساعدك وياخد بايدك ولو بكلمة طيبة
وكل عام وانتم بخير
:)

9 comments:

فاروق عادل said...

انت اتاثرت بئة لما قولتلك فنان كبير بس فعلا المفهوم دة لازم يتغير يعنى مثلا لما دخلت الشات كنت اكلم ناس فى السياسة والدين وكل حاجة وكان كلامى عاجبهم لكن لما اقولهم عمرى الحقيقى ينسحبوا ويقولوا انهم مبيكلموش عيال يعنى لما اكلم حد من غير سنى يبقى كويس لما اقول سنى ابقى صغير اية الهبل دة يبقى خلاص مقولش سنى او اغيرة طالما هو دة النظام وعاوز نشوف حلقات فراولة ولو حضرتك طالب اوصاف على الشات بقى

كمال سلطان said...

ايه الجمال ده يافنان
كلامك فعلا فى محله تماما
والفن لايقاس بالعمر فعلا
والموهبه هى الاساس دايما

وتحياتى لك يافنان000 ياكبير

مع تحياتى
كمال سلطان

AHMED SAMIR said...

هي دي افة العالم الثالث يا فناننا الكبير
ان المبدع علشان يتقال عليه انه نضج لازم يكون عدى ال 40 سنة والا يكون عيل في نظرهم
وهو احنا تخلفنا من شوية يا فنان؟
تحيااااتي

Yasser Hussein said...

طالب ثانوى
بطبيعة الحال لما اتناقش في موضوع وأجد أنه من المفيد عرضه على الناس فأنني أقوم بذلك
وكان حواري معك على الشات مفيدا
وأنا سعيد بوجود شباب تحت العشرين بهذا الوعي والتفتح في مصر

خالص تحياتي

Yasser Hussein said...

مجلة نيو سكووب
ازيك يا صحفي يا كبير
ومبروك مدونة مجلة نيو سكوب
أتمنى اشوف المجلة إن شاء الله لما أنزل مصر
تعليقك في محله

خالص تحياتي

Yasser Hussein said...

A.SAMIR
الله يطمنك .. هانت كلها 3 سنين ونوصل الاربعين إن شاء الله
ساعتها يبقى الواحد بقى فنان بجد
:)))))))))))

خالص تحياتي

kochia said...

عندك حق طبعا
السن مش شرط موهبة ولا احترام ولا رجاحة تفكير
ودي حاجة المفروض نكون عرفناها او عارفينها من زمان

تحياتي

Anonymous said...

الله ينور عليك
كلام ميقلهوش إلا فنان كبير وصادق
لكن بصراحة فى فنانين شباب مستواهم مش قوى
ومع ذلك طالعين فيها وعمالين يقولوا إحنا وإحنا
وهما رسمهم ميرسمهوش عيل فى ابتدائى
خصوصا بعض رسامين الدستور ورسام تانى عنده مدونة برضه رسمه أعوذ بالله
لامؤاخذة طولت عليك
عمروعبدالعزيز

Yasser Hussein said...

kochia
فعلا .. وأشكرك على تعليقك

---------------------------
ناقد فنى
والله دى وجهات نظر والكاريكاتير أساليب
وكل فنان له اسلوبه في الرسم
وطالما رئيس تحرير الجريدة وافق على نشر أعمالهم
فأكيد شايف فيه حاجة مميزة
بالحق هو حضرتك ناقد فنى فين بالضبط
فى أي مجال يعني وفي أي جريدة
:)

خالص تحياتي وشكري للجميع