جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Saturday, October 25, 2008

حد يشد الفيشه

دماغ البني آدم بما تحتويه من افكار وخيالات وابتكارات وافتكاسات بتيجى لها وقت وبتحتاج للأنتخه بالضبط زي الجهاز الكهربائي اللي بيفضل شغال بشكل مستمر وبيحتاج نشد الفيشه بتاعته ونفصل عنه الكهربا علشان فيوزاته وآي سيهاته ترتاح ويقدر يشتغل تاني لفترة طويلة قادمة ، ده اللي حاصل لدماغي اليومين دول حاسس أني عايز أشد الفيشه بتاعت نافوخي وأفصل كل الكابلات اللي خارجة منه واللي واصلة إليه، نفسي أريح دماغي لأني أكتشفت أني حتى ولو أنا في أجازة رسمية من عملي بألاقي دماغي برضه شغال ، لا مفر من اتصالات هاتفية تزعجني أو تشيلني الهم على همي ، ولا مفر من سماع شكوى فلان أو علان من الدنيا وبلاويها ، حتى في خيال الواحد بيلاقي ما يدعو للضغط على النافوخ ، نفسي افصل وأسيب أيدي وأطير في الهوا ، لكن يا خسارة كلها أحلام ولا مفر من توصيل الكابلات مرة أخرى ، بس أمانة يا جماعة لو حد عرف يشد لي الفيشه يشدها مشكورا، ولا أيه رأيكم
:)

11 comments:

Cleo said...

ده صحيح مليون فى المية... عشان كدة لازم الواحد إما يمالرس هواية بعيدة عن مجال شغله أو يربى حيوانات أليفة..

أنا مثلا من يوم ما تربية القطط ولعب الاسكواش بقوا يشدولى الفيشة ونيزلو سكينة الكهربا كلها كمان :-)

انا حره said...

والنبى لو لقيت حد يشدلك الفيشه دلنى عليه عشان محتاجاه اوى دماغى خلالالالالالالاص قربت تسيح

ياسمين حميد said...

انت الوحيد القادر على شد الفيشة
إلا إذا كنت تريد أن يغتالك أحد مثلاً
!!!

شد الفيشة، إبدأ بشد فيشة التلفون

ياسر حسين said...

Cleo
حقيقي فكرة ممتازة
ولكن على فكرة أنا بأمارس الرياضة برضه وبأحاول أخرج من موود الشغل لكن وأنا حتى بأبص للأجهزة والحديد في الجيم بتجي لي افكار كاريكاتورية
:)

خالص تحياتي

ياسر حسين said...

انا حره
ههههههههه
بعد الشر على دماغك إن شا الله العدو
:)

خالص تحياتي

ياسر حسين said...

ياسمين حميد
المشكلة مش في التليفون
المشكلة في الموبايل
:)
ومينفعش اقفله لأن ده ممكن يعطل مصالحي
الأمر الآخر اللي تاعبني التفكير المستمر في أمور كتير مش قادر أبطل أفكر فيها
منها الخاص ومنها العام
أتمنى أني أقدر أفصل ولو ليوم واحد
ساعتها يمكن أرتاح

خالص تحياتي

تامر حسين said...

امانه والنبي يا اخي العزيز اول متلاقي الي يشدلك الفيشه ابقي اديلو تليفوني او ايميلي
تحياتي
صحيح مستنيك تشرف مدونتي الوحشه اوي وتقولي رايك في الحاجات الوحشه اوي الي حطيتها

تامر حسين said...

فوق الفزييييع
مستني كل الناس الموجوده يشرفوني في مدونتي عشان التراب كلها
هههههههههههههههههههههههههه
تحياتي

ياسر حسين said...

تامر حسين
ماشي يا تيمو .. تم التنفيذ
قمت بالزيارة والتعليق كمان
:)

خالص تحياتي

صاحبة الكلمات said...

صدقنى لو دماغك فضيت هتقول يا ريتنى ما شديت الفيشه
احيانا الدماغ الفاضية بتكون مكهربة اكتر
مدونتك حلوة و شكلى هدخلها كتير

ياسر حسين said...

صاحبة الكلمات
مرحبا بيكي في كارتونيا
صديقة جديدة ودائمة إن شاء الله
زرت مدونتك وعجبني جدا موضوع المثال عبد البديع وربطك بين الاسم ودلالته
أشكرك على تعليقك وكلامك الرقيق

خالص تحياتي