لايخفى على الجميع أن التعليم الخاص هو طوق النجاة بالنسبة للى عايز يعلم عياله ويطلعوا من المرحلة الابتدائية على الأقل بيعرفوا القراءة والكتابة ، خصوصاً بعد تكدس الفصول في المدارس الغير خاصة وإهتمام المدرسين الأفاضل بتحصيل الفلوس من وراء مجاميع التقوية والدروس الخصوصية اللي اصبحت إحدى المأثورات الشعبية في البيوت المصرية وبالذات اللي عنده عيل في الثانوية العامة
المهم مش هو ده موضوعنا ، الموضوع باختصار هناك درس في كتاب القراءة الخاص بالصف الاول الابتدائي أسمه (الثعلب والديك) ، كان مطلوب مني أرسمه كوسيلة إيضاح تتعلق في الفصل ، قمت مشمر وجايب الورق والألوان وقعدت أفر في كتاب القراءة بتاع أولى ابتدائي لحد ملقيت الدرس المزعوم ، واللي طلع أسمه (الديك الذكي) فضلت أتملى في جمال الرسم اللي في الكتاب وكادت عيناي أن تدمع من فرط الإعجاب ... أيه الجمال ده ... النسبة والتناسب بين الرسومات حاجة تجنن ... بقى الثعلب ذيله في حجم الكلب ... والكلب تقريباً في حجم الديك.... و الألوان والخطوط مهزوزه ...احتمال تكون محتاجة لنضارة خاصة زي بتاعة السينما اللي بتعرض أفلام ثلاثية الأبعاد ...قلت : لا حول ولا قوة إلا بالله
بقى كتاب المدرسة بتاع أولى ابتدائي اللي الطفل في المرحلة العمرية دي بيحب يشوف الرسومات والألوان الجذابة عشان تشجعه على الدراسة والمذاكرة يطلع بالشكل ده ، وأيه ... في مدرسة خاصة بتلهف آلاف الجنيهات من كل تلميذ سنوياً في مقابل تقديم خدمة تعليمية وتربوية على مستوى راقي
الخلاصة ... فوجئت بعد كده بالكتاب الخارجي مرسوم فيه نفس الدرس بمنتهى الشياكة وطباعة ملونة فاخرة
ودار في نفسي سؤال ... لمصلحة من أن يخرج الكتاب المدرسي سواء كان في المدارس الخاصة أو الغير خاصة بهذا الشكل؟
طباعة رديئة والوان باهته ورسوم لرسامين دون المستوى....في انتظار تعليقاتكم
4 comments:
مشكلة التعليم ....... صدقني خليك بعيد احسن لان الموضوع ده شائك جدا جدا والسبب بسيط هو ان مفيش فايدة لا في التعليم ولا في الوزارة اللي مسئولة عنه ومن هنا يستحضرني مقوله سمعتها زمان في الجامعة من واحد... كان بيقول:
الله يلعن ابو التعليم المجاني اللي خالاني اشوفلكم
يمكن جملة قاسة خصوصا لو عرفنا ان التعليم الحكومي ايام البشوات والملك كان لاولاد بهوات وبشوات البلد بس واللي معهوش مايلزموش وانهاردة بقى العكس اللي عاوز تعليم كويس يروح للخاص ويدفع دم قلبه فيه
لا حول ولا قوة الا بالله
معليشي بكرة هيكون احسن واذا كان الرسم دون المستوى فتخيل باقي العلوم شكلها ايه وبقي ان نقول جملة عادل امام الشهيرة واللي اعتقد انها رجعا رجعا
بلد بتاعت شهدات صحيح
:)
شكرا على تعليقك وشرفت المدونة
التعليم الآن غير مجاني بدليل انتشار الدروس الخصوصية وشراء الكتب الخارجية يعني كل دي مصاريف اضافية على المصاريف المدرسية ، أما بالنسبة لشكل الكتاب المدرسي فده هو اللي لفت نظري أنه غير أنيق وغير جذاب للتلميذ ، أما بالنسبة للتعليم أيام البشوات فبصراحة أنا مكنتش لسه اتولدت أياميها عشان أقدر أحكم بموضوعيه
تحياتي
السلام عليكم.....لقد افتتحت مدونة جديدة.....رجاء الاطلاع عليها و ترك تعليقات حتى أعرف هل أستمر أم لا؟.....أنا لست مدون جديد....و لكنى أغير وجهتى فى الكتابة.....شكرا
اكيد لمصلحة اللي بينصب و يضرب الفلوس في جيبه 00 ما هو كل حاجه بقت تجاره حتي التعليم
Post a Comment