جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Monday, June 4, 2007

أحلف بسماها وبترابها

في مجتمعنا المصري البديع نجد حلفانات مبتكرة نسمعها في الاسواق وعلى المقاهي وفي جلساتنا الخاصة
هذه الحلفانات تطرح عدة تساؤلات وإليكم كل حلفان والتساؤل الذي أثاره في نفسي
الحلفان : وحياة الميه الطاهرة دي وإلهي اتسمم منها لو شربتها لو كنت كذاب
التساؤل : هل أنت من أحد الطوائف الهندية التي تقدس المياه وتتبارك بمياه نهر الجانج حتى تحلف بالماء على صدقك؟
الحلفان : وحياة النار دي وإلهي أتحرق زيها لو مكنتش بأقول الحق ... وفي يده سيجارة طبعا يحلف على نيرانها
التساؤل : هل أنت من الماجوس عبدة النار حتى تحلف بالنار ؟
الحلفان : وحياة أولادي إن شا الله أعدمهم لو كنت كداب
التساؤل : وهل أنت تعبد أولادك حتى تحلف بحياتهم وعلى فرض أنك تكذب هل ترضى أن تعدمهم فعلا؟
هذا علاوة على الحلفان بالطلاق وبشرف الأم .. كل هذا آثار حفيظتي وجعلني أتساءل لماذا الحلف أصلاً؟
يحضرني موقف حدث لصديق لي يعيش في أوروبا... كان يتحاور مع صديقة له ألمانية .. وفي الحوار قال لها ..أحلفي .. فردت عليه لماذا؟ أنا لست في محكمة .. أنا أقول الصدق وإن كنت لا تصدقني هذه مشكلتك وليست مشكلتي
وأنا في المرحلة الابتدائية كان لي زميل أسمه عماد موريس تعلمت منه عدم الحلف واستبدال الحلف بكلمة صدقني وكبرت وأنا أكره الحلف و استشعر الكذب في كلام كل من يحلف.
المثل المصري الشعبي يقول : قالوا للحرامي أحلف قال جالك الفرج
والحديث النبوي الشريف يقول
قال صلى الله عليه وسلم : من كان حالفاً فليحلف بالله أو ليصمت
و الله عز وجل يقول في كتابه الكريم
( لا يؤاخذكم الله باللغو في أيمانكم ولكن يؤاخذكم بما عقدتم الأيمان )
يا ترى بعد الكلام ده هنحلف ؟ ولو حلفنا هنحلف بغير الله ؟ ولا هنحلف بسماها وبترابها؟
خالص تحياتي

27 comments:

مشمش said...

انا الاولي وليا الشرف طبعا
المهم اني شخصيا من الي بيحلفو كتير بس نفسي اتغير ومن قبل ما حضرتك تثبر الموضوع لاني عارفة ومتاكدة انها عادة وحشة اوي ووزرها كبير لان 90في المية من الي بتحلف علية كدب لانة باة كلام دارجك علي لسانك مش عشان حد يصدقك ولا لا يعني مقلا لما تقابل صديق مطنشة ويقولك مبتتصلش لية تقولة خلاص والله هبقي اتصل ولا بتتصل ولا كان في نيتك تتصل بية يعني حلفت بالله كدب فمابالك الي بيحلف بغير الله وفي حديث عن سيدنا محمد(ص) كان سيدنا معاز سالة او ونؤخذ بما تقولة افواهنا يارسول الله قال لة ثكلتك امك يامعاذ او نكب علي وجوهنا الا حصاد السنتنا )وربنا يرحمنا جميعا ونبطل نحلف خالص ويسامحنا لاننا اكيد مكناش فاهمين ومنقصدش ارتكاب الذنب الكبير دة
ربنا يغفر لينا وللمسلمين جميعا

تامر حسين said...

اولا موضوع جميل جدا فكرني بموضوع جميل زيه اسمه الفاظ تخالف العقيده
واعتقد انك سمعت عنه
وهو يتحدث عن الكلام العام الي بنقولو واحنا مش حسين بمعناه زي
يدي الحلق للي بلا ودان وزي احنا زرنا النبي وزي خدت الشر وراحت الخ الخ الخ
تحياتي ليك واعتقد اننا مش هنحلف بسماها وبترابها
بس حنحلف بدروبها وابوبها
وممكن نحلف بالقمح وبالمصنع او نحلف بالمدنه وبالمدفع

هههه
ربنا يلطف بينا
سلامكي

A.SAMIR said...

فعلا الحلف دة مشكلة وتحس انها لزمة في كلام معظم المصريين
بس علشان مانكونش متجنيين هم مش كل المصريين هم المسلمين
لان معظم اخوانا الاقباط لا يحلفون وبيستبدلوها بكلمة صدقني
لدرجة انك لما بتسمع حد بيقول صدقني كتير بتعتقد على طول انه مسيحي
بس دي محتاجة تغيير ثقافة عامة وحملة دينية واسعة
تحياتي واحتراماتي

bos bos said...

الأقاويل الموروثة بتاعتنا اللى ما بتتغيرش وياريتنا نتوارث حاجة كويسة لا أحنا بناخد اسوأ حاجة ونتوارثها
وموضوع الحلفان ده موجود بصورة كبيرة فى مجتمعنا ونفسى بجد نتخلص منه لأن فعلا اللى بيحلف كتير قدامى ما بصدقوش وخصوصا لو بيحلف بحاجة غير أسم ربنا
تحياتى

ياسر حسين said...

مشمش
الحلف عمال على بطال عادة سيئة فعلاً

تامر حسين
أنا مدخلي في الموضوع ده أساسه فكرة الحلف بشكل دائم وبدون مبرر بالإضافة إلى الابتكار في الحلفان وهو شيء مزعج ومستفز

A.SAMIR
أنا أشرت لزميل دراستي عماد موريس
الذي تعلمت منه عدم الحلف
واستبدال الحلف بكلمة صدقني
وبقولها كتير بس محدش بيفتكر أني مسيحي
:)

bos bos
جربي كده وروحي اشتري كيلو طماطم من السوق وأسألي البياع الطماطم دي طازه ولا لأ
هيحلف لك ما لايقل عن 8 حلفانات
أنها طازه ولسه طالعه من الغيط
لحد ما يبيع لك كيلو طماطم

خالص تحياتي للجميع

Mirage said...

وياريت الحلفان بتقال عشان تأكيد المعنى وبس

ده بيتقال كده وخلاص كبادئة فى كل كلمة بلزمة او غير لزمة

يعنى مثلا واحدة كانت رايحة للخضرى بتقوله
ادينى ولهى 2 كيلو طماطم

هو الحلفان ده لازمة كده فى لسان كل المصريين وا

أحمد الحسيني said...

ياراجل دا الحلفان بقى اهون حاجة في حياتنا
دا احنا خلاص مش لاقين اسماء للافلام فسمينا عليه الطرب بالتلاتة
هوه دا مش حلفان برضه
على العموم دا يرجع لاصول الواحد وتربيته
وتعوده على عدم الحلفان عمال على بطال
مش كده ولا ايه
صدقني
طب والكيبورد الطاهر ده بقول الحقيقة
تحياتي

Doba said...

لا إله إلا انت سبحانك إنى كنت من الظالمين

تحياتى لكلماتك التى تدق ناقوس خطر وهو حصاد ألسنتنا

اللهم عافينا.......أشكرك
سلام........هبة

ياسر حسين said...

Mirage
فعلا كلامك بيحصل خصوصا عند بتوع الخضار


أحمد الحسيني
منور يا باشا .. فينك من زمان
بصراحة واحد أعرفه .. بياع
عمال يحلف الحلفانات اللي ذكرتها طول النهار
وده اللي استفزني علشان اكتب الموضوع ده


Doba
بارك الله فيكي وتقبل دعاءك

خالص تحياتي للجميع

شيماء الجيزى said...

بجد الموضوع يستحق التفكير العميق والرد الاعمق والايجابى

استاذ ياسر كتير ناس بتعمل كده ولما تحاول تفهمها
تقولك مش دى نعمة ربنا
يتحلف بيها

يعنى بيأوحوا


حضرتك كمان مش عارفه متعلقه بالموضوع ولا
فى ناس بتفسر الايات القرآنيه على مزاجها
لزوم البيع والشراء
والتجميل


تحياتى لك استاذ ياسر
على اختيار المواضيع العميقه دى

على فكرة الكاريكاتير جميل جدا
تحياتى

نهى منير said...

حقيقى يا استاذ ياسر
الحلفان مالوش لازمه
اللى بيحلف كتير باحس انه كداب وعايز يقنعنى أنه مش بيكدب
والناس اللى بتحلف بالطلاق دى ناس مريضة
زى ماتكون مش مصدقه نفسها انها عرفت تتجوز
واكيد اللى بيحلف بالميه
الميه مقطوعة عندهم فى بيتهم
عشان كده غاليه عنه
:) :)
باهزر طبعا
ميرسى كتير ع البوست الذيذ ده يافنان
بــــــاى

semsem said...

من كتر الكدب اللى حوالين الناس بقى مش قادرة تصدق انه ممكن حد يصدقها على طول على شان كده بيحلفو
بس

ياسر حسين said...

شيماء الجيزى
اللي بيحلفوا بالنعمة فعلا مش بيقنعوا بالنصح وبيعتبروا أنهم صح
غير كده أنت اشرتي إلى اللي بيفسروا الآيات القرآنية على مزاجهم
وده ينفع موضوع بوست قائم بذاته

نهى منير
الحلف بالطلاق عادة قبيحة
ومع الأسف هناك بعض الشباب غير المتزوج يحلفون بالطلاق من باب الهزار
وعندما يتزوجوا لا يتوقفوا عن تلك العادة

semsem
المشكلة إن في ناس ممكن تحلفي ليهم ومش بيصدقوا برضه
حاجة مؤسفة

خالص تحياتي للجميع

أبو لهب said...
This comment has been removed by the author.
ياسر حسين said...

أبو لهب
مع احترامي لكلامك
أنا مش شايف اي بدعة في كلمة صدقني
لأنها كلمة عادية جداً وأفضل من الحلف عمال على بطال وهو موضوع البوست ده
الحلف عمال على بطال والابتكار فى الحلف بغير الله
وكلمة صدقني لا تعد حلف بالمرة
وأنا أحترم في المسيحين والغرب عدم القسم والحلف إلا في المحكمة
للضرورة القصوى يعني
وأنا حينما ذكرت آيات قرآنية
وحديث نبوي شريف
ذكرت أيضاً مثل شعبي ، وقصة حدثت لصديق وقصة أخرى حدثت لى
وكلها أدوات للاستشهاد واثراء الموضوع
والعرض له من جميع الاتجاهات

خالص تحياتي

koukawy said...

نسيت تكتب
و النعمه
و الكعبه الشريفه
و الختمه الشريفه
و النبي
انا مبحلفش حتي
و اقول والله
و مبصدقش اللي بيحلف كتير

أبو لهب said...
This comment has been removed by the author.
ايوية said...

موضوع فعلا مهم احييك ياسر فعلا لازم نتعلم منحلفشى لان فى راى الحلفان الكتير معناة ضعف وفى بعض الاحيان كذب بحلف لانى بكدب
شكرا مرة تانية للموضوع

sabsoob said...

أنا عندي المشكلة الفظيعة دي..بحلف علطول...
بس علي فكرة علي ما قد هي عادات أو تقاليد متوارثة...ليها مدلول نفسي ..أعتقد يعني..ممكن يكون ناتج عن التعود عل عدم تصديق لناس للشخص أو لكثرة الكذب فالحلفان بيبقي الطريق..أو التردد..مش عارفة بس حاسة ان ليها مدلول نفسي أنا بحس بيه..و بحاول أستبدلها بكلمة بجد..بس بقت لزمة في كلامي مستفزة ...
...لكن افتكاسات الحلفان دي اللي فظيعة و لا تطاق
تحياتي

ياسر حسين said...

koukawy
ما نسيتش أكتبهم ولا حاجة
أنا بس كتبت بعض الحلفانات المبتكرة
اللي وجدت شخص أعرفه وأتعامل معاه بشكل شبه يومي بيحلفها
مما أثار عندي الرغبة في كتابة الموضوع ده

أبو لهب
يا سيادة المحامي
أنا عارف أنك بتهزر
بس أنا باوضح إن الموضوع لا يتعرض للفتاوى ولا للمسلمين والمسيحين
الموضوع اساسا عن الحلف وعدم استخدامه عمال على بطال
وإن شاء الله تكون محام ناجح

ايوية
اللي بيحلف يا إما كذاب .. يا غما مش واثق من صدق كلامه

sabsoob
قولي الصدق وبثقة واللي يصدق يصدق
واللي ميصدقش إن شا الله ما صدق
:)

خالص تحياتي للجميع

•«ρяoιd»•™ said...

قال صلى الله عليه وسلم : من كان حالفاً فليحلف بالله أو ليصمت
و الله عز وجل يقول في كتابه الكريم
( لا يؤاخذكم الله باللغو في أيمانكم ولكن يؤاخذكم بما عقدتم الأيمان

بالظبط كده يا ياسر

لا حلف بغير الله

و في نفس الوقت

لا تجعلوا الله عرضة لأيمانكم

مش عمال علي بطال بقي حلف و السلام

و المشكله الأكبر إننا مبنصدقش اللي بيحلف عمال علي بطال ده

يبقي ليه من الأساس الحلفان

مش عارفين إن الحلف بالله ده لو كان علي شئ كذب بيهتز ليه عرش الرحمن

و المشكله الأكبر بقي انهم كمان مش بيحلفوا بالله

حسبي الله و نعم الوكيل

ربنا يرحمنا و يهدينا جميعاً

تحياتي

تليفزيون ملون said...

سيدي الفنان
اسمحلي ان ابدي اعجابي ..
اولا باسلوب الطرح .. و باختيارك للموضوع .. و اسلوبك الفني الراقي فى الرسم ..

اخيرا .. تقبل تحياتي ..

ياسر حسين said...

•«ρяoιd»•™
الفنان الشامل
أشكرك على تعليقك

تليفزيون ملون
مرحبا بك في كارتونيا
صديق جديد ودائم إن شاء الله
أشكرك على تعليقك
وأحمد الله أن أعمالي تنال الإعجاب

خالص تحياتي للجميع

بحب السيما said...

خلاص وحياة امى ماححلف تانى
ههههههههههه
لابجد والله موضوع جميل وبتفكرنى بابويا برضه كان مابيحبش الناس الى بتحلف كتير وحطلى تصور فى دماغى ان اى حد بيحلف يبقى كداب

ياسر حسين said...

بحب السيما
مرحبا بك في كارتونيا
وأنا زرت مدونتك الرائعة
حقيقي أنا استمتعت بزيارتي والتجول
بين موضوعات تخص السينما والموسيقى التصويرية للأفلام
وعلى فكرة أنا من محبي السينما
أحييك ومرحباً بك صديق دائم للمدونة

خالص تحياتي

BaSsMa said...

كنت بكلم مع بابا في الموضوع ده من كم يوم
كنا بنتفرج على فلم مصري وعلق على الحلفان العجيب لي منتشر
عموما انا لو حلفت بحلف بالله
المفروض دي أقرب كلمة للسان
**
بس موضوع كول
:)

ياسر حسين said...

BaSsMa
جميل ان الموضوع عجبك
تحياتي لبابا