جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, December 30, 2007

سنة ميلادية جديدة

أصدقائي وأصدقاء كارتونيا دي أول مرة نودع فيها مع بعضينا سنة ميلادية فاتت ونستقبل فيها سنة ميلادية جديدة قادمة .. وأحب بالمناسبة دي احكي معاكم عن بعض عاداتي في نهاية كل سنة ميلادية بتمر واستعداد سنة جديدة
من أهم هذه العادات بالنسبة لي أني بأمسك ورقة وقلم وأسرد أهم عشرة أحداث أو أهم عشرة إنجازات لي ع المستوى الشخصي خلال العام الماضي لأن الواحد لو محققش حاجة جديدة في خلال وجوده على الأرض خلال سنة من وجهة نظري يعتبر إنسان مسكين لا يعلم أين يذهب ولا يعلم ماذا يفعل .. فلابد أن يراجع الفرد ما أنجزه خلال عام مضى من عمره حتى إذا ما وجد أنه لم يحقق شيء وجب عليه مراجعة منهجية حياته والأسلوب اللي هو عايش به لعله يستطيع خلال العام المقبل أن يحقق الأفضل
وفي ورقة تانية باكتب آمالي وطموحاتي خلال العام المقبل متمنياً من الله أن يوفقني وأحقق ما أتمناه
على فكرة أنا لا بأنفخ بلالين ولا باطفي الأنوار ولا بأسهر لوش الصبح إحتفالا بالعام الميلادي الجديد
لا لشيء سوى أني شايف من وجهة نظري إن الاحتفال الحقيقي بيكون فرحتي وسعادتي بما أنجزته خلال عام مضى وسعادتى أني باستقبل عام جديد بطموح جديد وفكر جديد لتطوير ذاتي وتعديل بعض سلوكي الذي ربما أكون غير راضي عنه خلال العام الماضي
وأعتقد أنه لا يوجد إنسان كامل وجميعنا يسعى للكمال وتحسين ذاته
الخلاصة أنا شخبطت سكتش للسنة الجديدة وكتبت الموضوع ده وأكيد يهمني رأيكم عن الكلام اللي فوق ده
عام جديد سعيد علينا جميعا إن شاء الله

15 comments:

تامر حسين said...

احسن حاجا ان انا اول واحد بيعلق علي الموضوع ههههه
الحقيقه بجد يا اخي العزيز ااحسن حاجا فعلا ان كل واحد يقعد مع نفسه اخر كل سنه كده ويشوف ايه الي عمله خلال السنه وهل حقق فعلا الي نفسو فيه ولا لا
وكمان ياسلام بقي لو شاف هو عمل خير اد ايه وشر اد ايه ويقف ادام نفسه وقفه حقيقيه عشان يصحح من نفسه كمان يبقي هو ده عين العقل
ربنا يفقك ويحقق لك الي معرفتش تحققه السنه الي فاتت وتحققه ان شاء الله السنه دي
تحياتي
اخوك الصغير
تامر حسين

tota_fm said...

صباح الفل يا فنان
بجد احسن حاجه الواحد يعملها مع بدايه كل سنه انه يقيم نفسه ومهم اوى انه يكون صادق مع نفسه
علشان يقدر يعوض اللى فاته قبل الوقت ما يضيع
وكل سنه وانت طيب ويارب تكون حققت كل اللى بتتمناه وتحقق كل اللى بتتمناه للسنه الجديده

امل عبد الحكيم said...

فعلا مش لازم الواحد يقضيها
سهر واحتفال
ولاونى مش فاهمه هما بيحتفلوا ليه
المفروض انها سنه وراحت يفكروا بقه خلصت وقضوها ازاى

لماضة said...

والله جميله حكاية الكتابه دى
بس للاسف انا بقالى كتير جدا محستش بان فى سنه فاتت وسنه عدت من كتر انشغالى بالدراسه
بس كنت بحب اوى اقعد مع نفسى من غير كتابه ولا حاجه واقرا قران واصلى وادعى ربنا
هجرب حكايه الكتابه دى ان شاء الله
كل سنه وانت طيب يا استاذى
وربنا يحققلك كل امانيك ان شاء الله

سعيد حامد شحاتة said...

والله مصر ولادة
كل سنة وأنت بألف خير يا فنان
تحياتى لك ولأعملك

اسكندراني اوي said...

كل سنه وانت طيب يا فنان
ايا ما كانت طريقه الاحتفال فالنتيجه واحده

الفرحه

عاليا حليم said...

أول سنة اودعها و أنا وسط البلوجرز ، كل عام و أنت بخير اخى الفاضل و ربنا يحققلك كل احلامك العام القادم أن شاء الله

ياسر حسين said...

تامر حسين
فعلا عندك حق وأهو نوع من محاسبة النفس أول باول

tota_fm
صباح الورد
الصدق مع النفس نعمة من نعم الله على العباد

امل عبد الحكيم
طبيعة البشر مع كثرة ضغوط الحياة بينتهزوا أي فرصة للفرح والاحتفال لتخفيف هذه الضغوط

لماضة
حلوة الصبغة الايمانية دي ولكن الدمج ما بين العبادة وشئون الحياة شيء ضروري ولا أيه؟
:)

سعيد حامد شحاتة
مرحبا بك في كارتونيا
أشكرك على تعليقك

اسكندراني اوي
بس فرحة أيه على سنة فاتت من عمر البني آدم .. أعتقد الفرحة بتكون بما أنجزه الانسان خلال هذه السنة

عاليا حليم
كل سنة وأنتي طيبة
ومبروك شكل المدونة الجديد بس يا ريت تفتحي لون الخلفية شوية

خالص تحياتي وشكري للجميع

appy said...

كل سنه وانت طيب
ونورتنى هناك فى الكوكب بتاعى
وانه شويه غاويه تصوير بس انا زيك مش بحتفل لاااااااااا بحتفل فى جزيرة القطن
السرير يعنى وكمان بسهر للساعه 9 بالليل هههههههههههههه اول مرة ادخل بس مش اخر ارجو تقبلى

عبد الرحمن أبو بكر said...

كل سنة وانت طيب يا فنان

وسنة جديدة سعيدة عليك انشاء الله مليئة بانتاجك الفني ورسوماتك الرائعة
وبمناسبة الشخبطة اللي بتشخبطها احب اهديلك اغنية شخبط شخابيط للرائعة الست نانسي العجرمية ربنا يخليهالنا يارب

كل سنة وانت طيب يا فنان

bos bos said...

كل سنه وانت طيب وسنه جديدة سعيدة ومزيد من النجاح ان شاء الله فى العام الجديد
وكلامك فعلا صح لازم كل واحد يشوف عمل أيه فى سنه فاتت ونفسه يعمل أيه فى سنه جاية والا يبقى فايدة حياته وعقله أيه

A.SAMIR said...

كنت لسه حالا بفكر في سهرات راس السنة
ايه الفكرة
ايه الحكمة اني اسهر للفجر الليلة دي بالذات واتفرج على رقاصة واسمع مطرب او مطربة؟!!!
بس فكرتك لقضاء ليلة راس السنة انفع والله
تحياتي وكل سنة وانت طيب يا فنان

وائل said...

مبروك لوائل
http://who-is-wael-abbas.blogspot.com/

yamen said...

كل سنة وانت طيب يا استاذ ياسر
يارب السنة الجاية تحقق الحاجات اللي انت كتبتها في الورقة التانية
وتكون الورقة الاولانية ملياااااااانه حاجات وحاجات

تحياتي ليك

ياسر حسين said...

appy
مرحبا بيكي في كارتونيا
صديقة دائمة إن شاء الله
وتحياتي لجزيرة القطن

عبد الرحمن أبو بكر
وأنت طيب يا بيبو ونشوفك فنان عالمي

bos bos
عام جديد سعيد عليكي إن شاء الله

A.SAMIR
ولا مطرب ولا رقاصة هيخلوا السنة الجديدة أحلى من اللي فاتت لأنهم بيعملوا كده من زمان ومفيش جديد
:)

وائل
مهما كان رأيك في وائل عباس فهذا لا يمنع أنه لفت الانتباه لفكرة التدوين في مصر وفي ناس عرفت التدوين من خلال مدونته .. كونه بقى له اتجاهات معينة فده شيء يرجع له وأنا شخصياً مش ضده ولا معاه انا أزور مدونته من حين لآخر مثل الكثير من الناس وربما لم أعلق عنده سوى مرة أو مرتين
أما بالنسبة لمدونتك اللي سبت لي اللنك بتاعها .. أنا عارفها وزرتها كتير ومع أحترامي كان من الأفضل أنك تعمل مدونة تعرفنا فيها أنت مين وأيه الموضوعات اللي ممكن تعرضها لنا وتفيدنا بيها أفضل من الهجوم على وائل عباس لأن في النهاية الهجوم ده هيتم تفسيره أنه غيرة أو حقد أو ما شابه والنتيجة هتكون في صالحه
وكنت أتمنى أيضاً أن تترك لي رأيك في مدونتي خاصة أنها أول زيارة لك لها

yamen
عام سعيد عليك ..فينك من زماااان
متطولش الغيبة
:)

خالص تحياتي وشكري للجميع