جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, February 17, 2008

خلوا بالكم من الباكم

شايفين العلبة دي .. بصوا لها كويس .. عارفين دي علبة أيه؟
دي يا جماعة علبة زيت فرامل ودبرياج بتاع السيارات ، والكلام هنا لأصحاب السيارات
الحكاية وما فيها
وأنا ماشي بعربيتي الغلبانة في شوارع القاهرة الساحرة أكتشفت فجأة إن الفتيس مش شغال
الفتيس ده يا جماعة والكلام هنا للناس اللي مالهاش في السواقة ده الذراع اللي بين كرسي السائق والكرسي اللي جنبه
ومهمته نقل السرعات علشان العربية تجري ، وعلشان تنقل من سرعة للتانية لازم تدوس برجلك على دواسه إسمها الدبرياج
وهذا هو بيت القصيد ، أكتشفت أن زيت الدبرياج مافيش فيه ولا نقطة ، كانت معايا بقايا زيت كنت أشتريته من أكتر من سنة حطتهم
للعربية وجريت على الميكانيكي ، بدون الدخول في تفاصيل ميكانيكية الراجل صلح العربية وطلب أشتري زجاجة زيت
والمعروف بأسم زيت الباكم وهو مخصص للفرامل والدبرياج ، رحت أشتريت الزجاجة اللي صورتها ملطوعة فوق دي وكانت النتيجة بعد ما مشيت بالعربية يوم ونص إن الزيت ده تحول بقدرة قادر إلي مادة شبه مطاطية تسببت في إن الدبرياج باظ مرة تانية
الزيت من الآخر مضروب وبالمعاينة والفحص والأختبار اللي كل الميكانيكية عارفينه وأنا أتعلمته منهم
إن الواحد بيتذوق هذا الزيت بطرف لسانه ، الزيت الأصلي لاذع أما المضروب فالمفاجأة إن طعمه ماء عليه سكر
تخيل بقى لو أنت حاطط الزيت المضروب ده للفرامل وجيت تضرب فرامل وأنت ع الطريق السريع مالقتش
مش النتيجة تبقى كارثة وأرواح ناس ممكن تضيع
أنا حبيت أعرف الناس أصحاب السيارات في مصر علشان يخلوا بالهم
أوعى تشتري زيت الباكم أبو أربعة وخمسة جنية .. أشتروا الزيت الانجليزي اللي في علبة صفيح مبرشمه وسعرها لا يقل عن عشرة جنيهات .. وخلوا بالكم من الباكم

10 comments:

تامر حسين said...

اووووو
اول واحد حط تعليقوا
اولا شكرا اوي لدروس السواقه الي ذكرتها في اول الموضوع بتاعه الفتيس ونقل السرعه ده بس يا خوفي لا تخوف الي مبيعرفوش يسوقو ليتعقدو من السواقه
ثانيا محدش بيتعلف ببلاش والحمد لله انها جت علي كده ولحقتها وعرفت سبب عطلها
وكمان احب اقولك اني مبسوط اوي انك عامل حمله التوعيه الي مستمره دائما دي من اول ملابس الكلاب واللمبه الصيني وزيت الباكم والبقيه تأتي ويارب يارب يكون في حد عنده دم ويحس بقي انه ممكن بسبب غش تجاري انه يضيع حياه بني ادم بسبب زيت فرامل والي هو اهم حاجا في العربيه ومسؤله عن ارواح البني ادم
طولت عليك معلش
حمد لله علي سلامتك
وتحياتي الاخويه

أمل عبد الحكيم said...

هههههههههههههههه
طيب واخر الموضوع ندفع ثمن درس السواقه
كل حاجه بقت مغشوشه

فى كمان سلوك كهربا مجرد ماتتنيها تتقطم وتبوز تخيلوا بقه دى لما تشتغل تولع والحمد لله
المشكله مشكله ضمير

بطوط حبوب said...

انا اول مره اجى هنا بس سؤال الاخ من مصر
ايوه مصر الى هى امى وامك وام الدنيا
اصل الى بتقولوه مش غريبه فى مصر
قريت وحسيت انها حاجه عاديه من الى بشوفها كل يوم
هههههههههههههههه
يا ترى مين وراهم؟؟؟؟؟؟

Yasser Hussein said...

تامر حسين
أتمنى إن الناس الغشاشة تحس على دمها لأنها ممكن تضيع أرواح ناس أبرياء
وأديني بأنبهه الغفلان قبل وقوع الضرر

امل عبد الحكيم
وكمان سلك الكهرباء ضربوه
:(

بطوط حبوب
مرحبا بيك في كارتونيا
أيوه أنا مصري وباتكلم على حاجات حصلت في مصر ومحبش انها تحصل خصوصا لو الأذى هيطول ناس أبرياء ممكن تتقلب بيهم عربياتهم وممكن يدهسوا أبرياء نتيجة لعدم وجود الفرامل

خالص تحياتي للجميع

jessy88 said...

اقرأ مدونتك وانا نفسي اكون من جمهورك المستهدف اللى عندهم عربيات يللا ربنا يدينى واجيب عربية واساعتها اوعدك لو فيه زيت ب50 جنية هجيبه بس الرك بقى على الميزانية يعنى وانت بتدعيلى اجيب عربية ادعيلى بالمرة المرتب يزييد طبعا عشان الزيت ابو 50 جنية..وشكرا على التوعية
اه على فكرة مش انت فنان كاريكاتور؟ فى جريدة ساخرة جديدة اسمها الدبور رئيس مجلس الادارة محمود بكرى وفيها فنانين جمال اوى سعيد بدوى ومحمد الصباغ واحمد عبد النعيم لو تحب تروح قوللى وانا ابقى اسيبلك العنوان انا بشتغل هناك بس كاتبة مش رسامة...وسلامتى

AHMED SAMIR said...

انت بقى شاري زيوت فوكس على اساس سمعتها في الخليج وكدة
سيادتك مش عارف انها في مصر مضروبة من زمااااااااااان
نورت مصر

Yasser Hussein said...

jessy88
شكرا على اهتمامك وتحياتي إلى أستاذي سعيد بدوي فهو صديق العائلة وأول من وجهني إلى رسم الكاريكاتير وأنا عمري عشر سنوات

A.SAMIR
حبيب قلبى أنا معنديش عربية في الخليج لذلك أنا لا أتابع إذا كانت زيوت فوكس مشهورة أو خلافه
أنا أتغشيت واللي كان كان والحمدلله ربنا ستر وربنا يحرق الحرامية دنيا وآخرة

خالص تحياتي للجميع

Unknown said...

هههههههههههه
وعد اول مع اول عجله هشتريها هاخد بالى
يا ريس كل مصر مضروبه بالنار
ده زيت الاكل مضروب مش هيبقى زيت العربيات

semsem said...

الموضوع دا ماشى على التوك توك برضوة اصلى نويت خلاص هجيب توك تك

Yasser Hussein said...

لماضة
الموضوع مش أزمة فلوس أكثر من أنه أزمة ضمير

semsem
توك توك ... ممكن أسأل لك الميكانيكي
:)

خالص تحياتي للجميع