جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Tuesday, July 29, 2008

أحاول ولا أستطيع

أكرمني الله سبحانه وتعالى وأنعم عليا وأصبح معي من المال ما يكفيني ويقضي احتياجاتي ، وذلك بعد سفري للخارج ورحلة مع الغربة بدأت منذ أربعة سنوات ومازلت أسير إلى وقت أن يشاء الله فأعود إلى مصر المحروسة .. أعتدت منذ بداية الرحلة على ألا أغيب عن مصر أكثر من ستة اشهر حتى لا أنقطع معنويا واجتماعيا عنها .. وأحاول أن استمتع بحياتي عند نزولي أجازات سريعة إلى مصر ولكن مع الأسف أحاول ولا أستطيع ... ممكن حد يقول دلوقت : بقى الجدع ده مسافر بره ومعاه فلوس ونازل مصر يتفسح ومش عارف يستمتع!!؟
أرد وأقول لك أيوه .. وذلك للأسباب التالية
لما بأزور أي مركز تجاري ضخم من اللي ملوا البلد واشوف آلاف البشر بتشتري وتصرف بالآلاف بأحس إن مصر مفيهاش مشاكل وإن حكاية الاسعار اللي عليت دي اشاعة وناس بتحقد على الحكومة هي اللي بتروج لها
لكن لما أشوف بعيني ناس بتدور على اللقمة في وسط الزبالة .. بالله عليكم ازاي يجي لي نفس استمتع ولا أعيش حياتي وفي ناس غلابة كتيير مش لاقيه اللقمة الحاف
محتاجين وقفة مع أنفسنا
اللي عنده هدوم ضاقت عليه ولا شايف إنها مش على الموضه يتبرع بيها للي محتاجها
واللي مش عاجباه لقمة عيش إكمنها بايته ولا مش طازة قبل ما يرميها يفكر في اللي مش لاقيها
ولو رماها يحطها في كيس بلاستيك لأن فيه اللي ممكن ياكلها
واللي عنده عفش قديم بدل ما يبيعه لبتاع الروبابكيا أو يرميه يتبرع بيه لشاب عايز يتجوز ومش معاه فلوس يفرش شقته
أنا لا أدعي أني بأدعو لحملة اصلاح ولا حملة تبرع أنا بأعرض وجع حسيت بيه خلاني بالفعل مش قادر أستمتع بحياتي حتى مع توفر الماديات
وأعتقد إن الكاريكاتير اللي مع الموضوع ده ممكن يكون عبر عن جزء من اللي جوايا
في انتظار رأيكم

17 comments:

محمد عبد الغفار said...

ولولا دفع الله الناس بعضهم ببعض لفسدت الأرض
ولكل درجات مما عملوا وليوفيهم أعمالهم وهم لا يظلمون

ده سنه الله فى خلقه عشان الحياه تستمر

نعكشة said...

عندك حق

وحلوة فكرة الكيس البلاستك دية
مع اني برضة حاساها غير آدمية

بس افضل من انه يبقي مفعوص وسط القمامة

. بالنسبة للعفش بقة مش عارفة صراحة
حاجة مش يارادتي


جزاك الله خيراً

ربنا يجعله في ميزان حسناتك
و ربنا يعزنا يا رب

آمين

دمت سالم

سلامٌ عليك

نعكشة said...

بالمناسبة

حلو الكاريكاتير

سلام

Unknown said...

جميله جدا
الفكره تنفذ مما يقرب من 4 سنين الحمد لله
ومش قادره اقولك السعاده بتكون قد ايه
ياريت والله كلنا نشارك فيها وانا بدعمها معاك من دلوقتى
خصوصا واننا داخلين على رمضان

مواطن مصرى نايم said...

اولا حمدالله بالسلامة

انا كنت عرفت من الفيس بوك انك فى مصر
قلت بلاس ازعجة تعليقات كتيييير بقى لما يجى ابقى اعلق
بس و الله لو كان معايا رقم التيلفون ما كنتش اتأخر فى السؤال
دا انت حبيبى يا فنان و الله
مصر كانت منورة بيك
فكك بقى من اى حاجة تانية
المهم انك نورتها
تحياتى
اسلام

تامر حسين said...

الحمد لله علي كل شيء طبعا هو احساس جميل بس تفتكر ان في زمنا ده حد بقي بيفكر في كده
الاجابه
والله في فعلا ناس مقتدرين وبيعملو كده وفي ناس مقتدرين وعمرهم مفكرو في اي حاجا من كده
بس ده يرجع للتربيه والاحساس الشخصي لكن عمرك مهتعرف تعدل بني ادم عمره مفكر يساعد غيره
وفعلا هي دي سنه الحياه وربنا الهادي
تحياتي

اهو ده عيبه said...

والله الحال بقى غريب
تشوف ناس تقول مفيش فقرا على الارض
وتشوف ناس تانية تقول داخلين على مجاعه وايام سودا
لو الناس اللى بترمى فلوسها فى تفاهات زكت عن مالها واتبرعت الحياة هتختلف كتير
لكن للاسف محدش بيفكر فى غيره
عموما مبادرة جميلة منك وان شاء الله نقدر ننفذها

Anonymous said...

البوست ده وجعلى قلبى اكتر ما هو موجوع بس موضوع التكافل للاسف مش بتلاقيه الا في الايام المباركه وغير كده انسى زى كل حاجه ما بتتنسى دعوه حلوه وكريمه ربنا يتقبل دى رابع مره ادخل مدونتك منهم مره سبت رساله ودى التانيه ارجو منك تكفلنى بلوجيا وتدخل مدونتى الجديده وتسعدنى وتقولى رايك فى الشكل والمضمون لو فاضى طبعا ..

Noha El-arabi said...

عندك حق فعلا
و نفسي اعرف ازاي بقينا كده
ناس فقرا اوي اوي
و ناس اغنيا اوي اوي

Yasser Hussein said...

محمد عبد الغفار
وهل بعد كلام الله سبحانه وتعالى
شىء يقال؟
:)

خالص تحياتي

Yasser Hussein said...

بالنسبة للعيش اللي هيتحط في كيس
الهدف منه ايضا
احترام النعمه
لأن في ناس كتير بتدلع
بترمي العيش لمجرد أنه بايت
أشكرك على تعليقك
وسعيد بأن الكاريكاتير عجبك

خالص تحياتي

Yasser Hussein said...

فعلا الفكرة دي بتتنفذ بالفعل
وفي جمعيات زي رسالة
بتهتم بالموضوع ده
ولكن ما ورد هنا
نتيجة لانفعالي بموقف حقيقي عشته
والدال على الخير كفاعله
وربنا يجعلنا من هؤلاء
:)

Yasser Hussein said...

مواطن مصرى نايم
أشكرك يا اسلام
ومصر منوره بناسها
الصابرين
:)

Yasser Hussein said...

تامر حسين
لو كل شخص ربنا اعطاه
فكر في الناس الغلابة
عمر ما هيكون فيه حقد طبقي
ولا هيكره الفقير الغني
ولا هيتهم الغني الفقير بأنه بيحقد عليه
فعلا
مسألة تربية وأخلاق
وربنا الهادي
:)

خالص تحياتي

Yasser Hussein said...

اهو ده عيبه
الموضوع ابسط من البساطة
بدل ما نبيع القديم اللي عندنا لبتاع الروبابكيا
بملاليم
أو نرميه في الزبالة
نتبرع بيه
وبدل ما عمالين نخزن في هدوم في الدواليب وفي الصناديق ولا حد هيلبسها ولا هينتفع بيها
نعطيها لناس ممكن تنفعهم
:)

خالص تحياتي

Yasser Hussein said...

عايزه اتطلق و
اسم مدونتك صعب
الطلاق يعني انهيار اسرة
والاصعب لو فيه اطفال
عموما انا زرت مدونتك
لكن وجدت بها الكثير من المرارة
اتمنى ان تتبدل ظروفك للافضل

خالص تحياتي

Yasser Hussein said...

Noha El-arabi
هي دي سنة الحياة
فيها الغني وفيها الفقير
حكمة ربنا
وجود الاتنين دول في الدنيا
ولا يستغنى كل طرف عن الآخر
:)

خالص تحياتي