جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Thursday, June 10, 2010

حمار النيل

درسنا قديمًا في المدرسة إن ورد النيل كان يزين مياه النيل في مصر إلى أن أكتشفوا أنه بيعرقل الملاحة النهرية ويبخر الكثير من مياه النيل نتيجة لعملية النمو والبناء الضوئي والنتح ومؤخرا استعانوا بنوع حشرات أمريكاني بتتغذى على ورد النيل وبيسموا دي المقاومة البيلوجية يعني بيجيبوا كائن حي للقضاء على كائن حي برضه ، وحسب الاحصائيات حققت نتائج المكافحة البيولوجية لورد النيل فى مصر توفير ثلاثة ملايين متر مكعب من المياه كان بيستهلكها من المياه المصرية ، وأما في البحر في المياه المالحة ممكن تلاقي كلب البحر وعجل البحر وممكن كمان عروسة البحر زي ما بتحكي الاساطير .. لكن احنا بصراحة في الوقت الحالي غلبنا الاساطير واصبح عندنا في المياه العذبة حمار النيل ،أيوه حمار النيل السعيد ، تخيل سعادتك كده إن ربنا أكرمك ولقيت معاك قرشين وحبيت تتفسح مع خطيبتك أومراتك, أو حتى مع نفسك، ورحت قعدت في كازينو على النيل، وفجأة تلاقى حمار عايم على وش الميه ، وبعد ما تفرك عينيك وتقرص نفسك وتتأكد أنك صاحي ومش نايم ولا بتحلم تكتشف إنه حمار ميت ورماه شخص اقل ما يقال عنه إنه متخلف عقليًا،بالله عليكم ده أسمه كلام .. في الوقت اللي عمالين نتناوش ونتشاور للوصول لحل مع دول حوض النيل والمنابع علشان حصة مصر من مياه النيل نلوث فيه أكثر ما هو متلوث ونرمي فيه حمار ميت على فكرة القصة دي حقيقية والصورة الموجوده مع الموضوع قام بتصويرها بالموبايل زميل للصديقة دعاء حشاد على الفيس بوك ولما سألتها عن الصورة لما لقيتها على صفحتها قالت لي اللي حصل ..أختم كلامي بالحديث الآتي للرسول الكريم سيدنا محمد صلى الله عليه وسلم حيث أخبرنا أن النيل من أنهار الجنة
روى البخاري في صحيحه عن أنس بن مالك أن رسول الله صلى الله عليه وسلم قال : رفعت إلى سدره المنتهى في السماء السابعه , نبقها مثل قلال الهجر , وورقها مثل آذان الفيله , ويخرج من ساقها نهران ظاهران ونهران باطنان , فقلت : يا جبريل ما هذا ؟ قال : أما النهران الباطنان ففي الجنه وأما الظاهران فالنيل والفرات
صدق رسول الله صلى الله عليه وسلم

6 comments:

MR.PRESIDENT said...

حمار النيل
احنا عندنا
حمار النيل
وبقر النيل
وكلاب النيل
ومعيز النيل
وجاموس النيل

نحن عندنا ما لم تتخيله عدستك
ولا عدسة المصور

ربنا يسترها مع عبيده

AHMED SAMIR said...

كما قلت قديما و سأقولها مرارا و تكرارا
لكي تنظف البلد دي لابد من قنبلة نووية تدمر هذا البلد بناسه بجهله بكل ما فيه ليعيش فيه ناس جديدة غيرنا على نظافة

Yasser Hussein said...

MR.PRESIDENT
ربنا فعلا يسترها على عبيده
آميييييييييين

Yasser Hussein said...

AHMED SAMIR
يعني زي اليابان كده
هيروشيما وناكازاكي
مين عارف .. يمكن يكون ده الحل ويجي ناس بعدينا تزرع الفول وتاكله على نظافة

أم الخــلـود said...

الدول العربية اتملت حمير مع الأسف

حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين

maxbeta3zaman said...

كيف أفلت هذا الحمار النيلى من الجزارين الذين يجوبون القاهرة والجيزة بحثا عن أى حمار أو حصان نافق وملقى تحت كوبرى ليقومو فورا بسلخه وفرم لحمه وعجنها مع البهارات وبيعها كفته أو هامبورجر ليأكله العامة مع الطورشى والكاتشاب ....لقد ظهرت فى اسكنرية بعض رؤوس الحمير ملقاة فى كنج مريوط واتضح ان مالك أحد القصور هناك عنده أسود يطعمهم حمير نافقه يوميا ...فاللى يلاقى حمار ميت يدى خبر لبتاع الأسود ياخده ويدفع لهم 10 جنيه