جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, June 20, 2007

مش هتقدر ترجع في كلامك

أنا عارف يا جماعة أني الفترة الأخيرة دوشتكم بشخابيطي بس أعمل أيه يموت الرسام وأيده بتشخبط
قبل كده عرضت على حضراتكم بعض شخبطاتي بالقلم الرصاص
والشخبطة بالقلم الرصاص من اهم مميزاتها إنك ممكن تعدل فيها
يعني ممكن ترجع في كلامك .. وتمسح جزء بالأستيكة (الممحاة) وتعدل وتضيف وتحذف من وإلى الرسم
أما الشخبطة بالقلم الجاف .. فمش هتقدر ترجع في كلامك
صحيح ممكن نعدل ع الكمبيوتر ونضيف ونحذف
بس هناك متعة أنك تترك لقلمك الجاف العنان وتشخبط فكرة جوه دماغك ومتمسحش منها ولا خط
لذلك أنا بأحترم القلم الجاف جداً في الشخبطة
لأنه زي الراجل الجدع .. كلمته واحده
ومبيرجعش في كلامه
يا ريت تكتشفوا معايا بعض الافكار اللي موجودة في اللوحة دي
وفي انتظار تعليقاتكم وتحليلاتكم

21 comments:

تامر حسين said...

انا اول واحد هيه هيه هقعد جنب الشباك

اولا رسمك جميل كالعاده ومدوشتناش بالشخبطه ولا حاجا
تاني حاجا
الرسمه في وجهه نظري بتقول ان ده راجل ماشي وره الطرق الملتويه للوصول لهدفه ونظراته بتدل علي المكر والدهاء وهو واقف علي النار
يا اما هو شيطان يا اما هو مجبور علي النار ومتضر للي هو فيه لان الايد اليمين بتقول لا والشمال ملتويه
والله اعلم
معلش اان بردو مش خبير في مجالك
بس انا علي قدي بردو
تحياتي ليك وللامام دائما
اخوك تامر حسين

محمود على said...

شخابيطك جامده
كمل واوعي تبطل شخبطه

Doba said...

مديانى إيحاء بشيطان بيتحاور مع شخصية بتحاول تفكر فى الخير وهو بيقول للشخصية دى هجيبك هجيبك مليش دعوة

بس هو مجملا شر رهيب والواحد كل مبيحاول يبعد عنه ايده هتطول وهتطول لغاية لما تطولك وتسحبك بمنتهى البساطة للنار الحمرا

انت ليه عندك اصرار انك تخوفنى وترعبنى من المجهول - اللهم عافينا - بس تحياتى على شخبطات متميزة جدا --- هبة

Egyptiana Trapped Soul said...

hi there
it is my first time here, and i have to admit that i am impressed ... you are so talented and know how to transfere your thoughts through vision of words and pictures

as for the pic ... well

اعتقد انه اسقاط على الكيان العربى الواحد الذى حتى هذه اللحظة مشغول بمحاولة وضع اليد فى اليد، ولكن كل يد تماطل الاخرى، بينما النار تلتهم الاساس ببطء وثقة ، والكيان ولا دريان بحاجة

لن يبدأ فى الفهم الا عندما تطول النار رأسه

i think !!!!!

Unknown said...

ياسر شخابيطك هايلة
اول مشفت الشخبطة دة حسيت بانها بتعبر عن الانسان الى نفسة يعمل شى بس الظروف بتمنعة وتقيدة فى الارض وانة هو كمان ممكن يكون بيقيد نفسة من مسة ايد بايدة التانية يعنى الظروف الداخلية والخارجية بتخلية ثابت فى مكانة

koukawy said...

اللي انا ملاحظاه انه مزروع في الأرض زي جزع الشجره
و ايديه بتزرع زي الورق .. و موصلي احساس الشخص الحياتي اللي ماسك في الدنيا و متمسك فيها بايديه و سنانه
اهه ده ماسك فيها بايديه و رجليه
مش عارفه وصل وجهة نظري و لا لأ

الريس said...

هو مش عارف عاوز يوصل لايه وبيبقى عدو لنفسه بتكتيف بعضه فى بعض..ورجله مش عارف عملة زى الشجرة كده او طالعه من نار ..حاجة تحيرر

مش عارف حااسس ان حضرتك بتعملنا اختبارات نفسية عشان تحلل الشخصيات :)

اصل الرسومات تحس انها من النوع بتاع الاختبارات ديه

مدونة كسبان said...

فى البداية
أحب أشكرك على ردك بإهتمام
على الأسئلة بتاعتى اللى كانت فى البوست اللى فات
فعلا والله الأسئلة دى فى دماغى من زمان بس مش لاقي لها اجابه
أشكرك
عموما ربنا يقدرنى واردها لك
وتتلخبط مدونتك وتتقلب حالها واعدلها لك
هههه

أما عن الراجل ابو دراع طويله
انا لما بصيت له حسيت انه بيقولى هجيبك ياكسبان
هجيبك

عموما اتمنى ان كل الشخبطات تبقى كده
ده الواحد بيشخبط كتير بس مش عارف مش بتيجى معايا ليه
عموما بالتوفيق

Dalia said...

حلوه اوى الشخبطه دى
اللون الاحمر نارى اوى
انا بصراحه مش عارفه الرسمه دى بتعبر عن ايه ؟؟؟

هو لازم كل شخبطه تعبر عن حاجه ؟؟؟

Anonymous said...

الشخبوطة دية دموية شوية وصاحبها مكار وخبيث ولية وطرقة ملتوية ومعني ان رجلة متصلة بالارض يعني هو مغروس في شرورة ومفيش امل لخروجة منها وانها بارادتة عشان نظرتة نظرة خبيثة واللون الاحمر بيكمل معني الصورة انة شيطان
هو دة تحليلي بس بجد جميلة واحلي حاجة فيها ان مفهاش رجوع في الكلام عشان هية كدة معانيها كاملة وجميلة
تحياتي ليك وعلي فكرة انا زعلانة اوي اني مكتبتش الاول وتامر قعد جنب الشباك ولا هو عشان اخوك يعني

semsem said...

استاذ ياسر تحياتى على شخبطه الجميله

تانيا
انا شايفه انا الراجل ده مع لفه اديه دى يحاول الوصول الى شى ولكنه لا يستطيع الا فهو فى محاربه مع نفسه من اجل ان يسلك طريق ملتوى لياخد ما يريد الا انه تقيده تقاليد الحياة متمثلا فى ارجله المتشابكه الثابته فى الارض الا انا لايزل فى محاولا ت ويظهر ذلك من نظرت عينه
وفى النهايه اطفى اللون الاحمر على اللوحه والرسم بالقلم الجاف
طابع خاص يدل على الاصرار فى الوصول الى الهدف مهما كانت الصعوبات

نهى منير said...

جميلة قوى اللوحة دى يا أستاذ ياسر
بس مليانه غموض
وده ظاهر فى نظرة عين الشخص اللى راسمه
واللون الأحمر دموى قوى
بس المجمل لوحة جميلة جداً
ميرسى كتير على الابداعات يا فنان

بـــاى

Yasser Hussein said...

تامر حسين
تحليل جيد ... ملاحظات جميلة

محمود علي
مش هقدر طبعا ابطل شخبطة .. دي هوايتي وشغلتي

Doba
صدقيني أنا لا اتعمد أني أخوفك
لأن الرسومات المرعبة سكة تانية
وغالبا شكلي هأنزل قريب بوست فيه رسومات مرعبة عشان تشعري بالفرق
تحليلك للوحة عميق للغاية
بس انتي اللي شكلك بتتفرجي على افلام رعب كتير
:)

Miss Egyptiana "Trapped Soul"
أولا اشكرك على المقدمة الانجليزية
ومدحك لقدرتي المتواضعة على التعبير بالكلمات والصور
أما بالنسبة لتحليلك للرسم
فهو يعبر عن خلفية ثقافية ليست بقليلة
لأنك ذكرت أبعاد عميقة جداً قد لاتكون مرئية .. أو اكون قد رسمتها
نورك منور كارتونيا

ايوية
بتثبتي كل يوم أنك متذوقة جيدة للفنون التشكيلية

koukawy
تعرفي أنك أول واحدة تقول حكاية أنه مزروع ديا
حقيقي أنتي ذكرتي جزء كبير من اللي اقصده في التشكيل .. اللي حواليه زرع مش نار .. برافو عليكي

الريس
الاختبارات النفسية بالرسم تختلف يا عزيزي عن الرسومات بتاعتي
لكن هو فعلا مزروع زي الشجرة

مدونة كسبان
متخافش يا كسبان .. الراجل ده ايده طايله .. بس مش للدرجة دي
:)

Dalia
طبعا كل شخبطة لازم تكون بتعبر عن حاجة
حتى ولو كانت بتعبر عن الشخبطة
:)

مشمش
طبعا تقصدي بصاحب الشخبطة .. اللي مرسوم جواها مش اللي راسمها
:)
أبقي تعالي بدري وأنتي تقعدي زي تامر جنب الشباك
:) :)

semsem
وبعدين معاكي بقى أنتي هتبطلي كتابة مقالاتك في النقد التشكيلي في الجورنال وهتنشريها عندنا
:)
أقول أيه فنانة وناقدة تشكيلية مينفعش أعلق بعد تعليقك
منوره يا سمسم

نهى منير
ميرسي كتير يا فندم على تعليقك
بس اللون الأحمر مقصدش بيه الدموية
ده القلم الجاف اللي وقع تحت ايدي ساعة ماحبيت أشخبط .. بكل بساطة

خالص تحياتي وحبي وشكري للجميع
ربنا ميحرمنيش منكم ابداً ومن متابعتكم لأعمالي

islam said...

السلام عليكم

أولا تحياتى على الرسم لأنه فعلا، جميل يمكن جماله فى إنه معقد، أو لأنى أساسا مبعرفش أرسم

المهم.. ده يا اما بيمثل المثل الشعبلى ودنك منين يا جحا
وده كان الهزار..، لكن أعتقد إنه واحد دايخ مش عارف يصد منين ولا منين فاضطر إنه يتعلم يمط ايديه عشان ميضربش على قفاه

تحياتى
السلام عليكم

Anonymous said...

اكيد اقصد الرسمة مش الي راسمها تحياتي لفنك الجميل

momken said...

الرسمه حلوة اوى يا استاذ ياسر
انا شايف ان ده واحد من الى ايده طويله (حرامى يعنى)ولو معرفش يوصل لغرضه بالطرق العاديه ايده الطويله ليها اكتر من سكه وطريق وسايط ورشاوى
ومناصب ومعارف وحجات كتير

كمان هو من النوع الى واخد على النار بس الى يقرب منه يتحرق ايما لان عنده حصانه او لانه حـــامى نفسه اوى

تحياتى

شيماء الجيزى said...

حسه انه غصب عنه
مش هيرجع
ومش هينفع
يقول ارجع
اللون الاحمر
تعبنى
حسسنى باحساس غريب
يمكن زى متقال دموى
بس قبض روحى

...........
بعيداً عن كل ده
رسم حضرتك بيأثر من جوه
مش مجرد رسمه والسلام
تحياتى

Unknown said...

النص الفوقاني فكرني ب المثل اللي بيقول ودنك منين ياجحا

ولما بصيت علي الجزء اللي تحت لقيته عامل زي الشجرة

:))

أشرف حمدي said...

هذه اللوحة أوحت لي بمثل
ودنك منين يا جحا ؟
رائع كالعادة
تحياتي ليك يا فنان

تامر حسين said...

لا انا الي هقعد لوحدي جنب الشباك نانانانانا
سلامكي
وكيف الاخبار ومعلش انا مش متواجد علي النت عشان انا مش في البيت
تحياتي

Yasser Hussein said...

islam
مرحباً بك في كارتونيا
تعليقك مرح جداً وأنا أحترم تحليلك للرسم .. تحليل دمه خفيف

مشمش
ما أنا عارف يا مشمش بس بأهزر

momken
أشكرك على التحليل العميق ده
أنا بأحب التعليقات اللي بتحمل وجهات نظر مختلفة

شيماء الجيزى
على فكرة يا شيماء اللوحات التشكيلية والألوان لها تاثير نفسي على المشاهد وبيختلف هذا التأثير حسب حساسية الشخص .. وغالباً أنتي حساسة زيادة يا عزيزتي وده اللي خلاكي تشعري بقبضة الروح اللي ذكرتيها

fanan fa2eer
أسم مدونتك أسم غنوة بأحبها جداً كانت بعتتهالي سمسم صاحبة مدونة لعنة الفن
تحليلك للوحة مرح ولطيف

الفنان المهذب أشرف حمدي
أنطباعك عن اللوحة أتفق عليه أكتر من تعليق .. ممكن نسمي اللوحة دي ودنك منين يا جحا

تامر حسين
تقعد جنب الشباك ... تقعد ع الشباك
بيتك ومطرحك

خالص تحياتي وشكري للجميع