جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, June 24, 2007

شويه رعب بجد

صباح الفل لو كنتم الصبح ومساء الجمال لو كنتم بالليل والسلام عليكم فى أى وقت كان
جالي تعليقات كتير بتصنف الشخبطات السابقة على أنها مرعبة
وبصراحة حبيت اعرض على حضراتكم شخبوطة مرعبة بجد
حتى تشعروا بالفارق بينها وبين الأخريات من الشخبطات
أيام ما كنت طالب في ثانوي واحد من زملائي المتدينين
جاب لي وصف شكل الشيطان .. غالباً من بعض الأحاديث النبوية الشريفة
وطلب مني أني أرسمه حسب الوصف ده
وعلى ما اذكر أن أنفه أنف خنزير وأقدامه كأقدام الماعز وجفون عينيه بالطول
ويوجد في لحيته 3 شعرات .. حقيقي أنا لا أعلم مصدر هذا الوصف تحديداً
ولكني قمت برسم الوصف ده وتلوينه .. المهم بعد كده اترعبت من الصورة جداً
وقمت مولع فيها بالكبريت
على فكرة يوجد نمط من أنماط القصص الأميريكية المصورة
بيعتمد الرسام فيها على رسم الشخصيات المرعبة وأبطال القصص دي أصلاً من العالم السفلي
الخلاصة .. الرسم المرعب مش سكتي بس أعتقد أني بأعرف أرسم رسم مرعب
مع سبق الإصرار والترصد
ولا أيه رأيكم؟؟

14 comments:

Unknown said...
This comment has been removed by the author.
Doba said...

صباح الخيرات يا افندم

هيه فعلا صورة مخيفة - أنا مبتفرجشى على أفلام رعب يمكن علشان كده الحاجات دى بتأثر فيا قوى - بس تصدق حقيقى خلتنى اخاف من الشيطان عندى احساس ان الصورة هتخرج تبلعنى - يعنى اذا كانت دى رعبتنى كده فاللى انت قطعتها ممكن يكون شكلها ايه

تحياتى على شخابيط مميزة جدا - أرجوك حاجة مفرحة ومعبرة المرة الجاية

سلامى --- هبة

Masria said...

صباح الخير
بالنسبة لي ..أنا باتفرج على الأفلام الرعب كتير .. ف بالمقارنة الصورة ما تخوفش اوي للدرجة دي
:)

شيماء الجيزى said...

صباح السكر يا استاذ ياسر

اقولك ايه
انا بعشق افلام الرعب
متستغربش حضرتك
بحب قوى الفبركه الى فيها وشغل الرعب التقنى التكنولوجى الحديث
والى خلانى احب افلام الرعب
والخيال الى بيكون عايش فيها
افلام دراكولا
ولأنى مش بحط فى دماغى ...ان دى حقيقه او لرعبى
فبيكون عادى جدا بالنسبالى
المهم
الرسمه فعلا فيها ملامح مرعبه
بس حضرتك اكيد فى اقوى وارعب من كده
:d

يمكن لأنى متعوده على الرعب شويه
بس بجد
مرعبه جدا
:d

تحياتى

تامر حسين said...

اخص ملحقتش اعلق الاول واقعد جنب الشباك
بس مش مشكله انا هرد بردو
اولا ازيك ياسور وحشني بطريقه مفزعه ثانيا الرسم ده هو مرعب اه بس كاريكاتير بردو مش قادر تبطل روح المرح الي فيك
انا متأكد انك ممكن ترسم رسمه مرعبه اكتر من كده بكتييييير
تحياتي
وياريت تزورني في مدونتي فيه جديد يستاهل بقك
بباي

Unknown said...

ممكن بالش رعب خليك فى الشخابيط الحلوة

Dalia said...

حلوه الصوره دى ... مرعبه فعلا
اه و الله مش هزار انا اتخضيت اول ما فتحت الصفحه

بس هو انا كان عندى سؤال غلس شويه

هو لابس فرده حلق واحده ليه ؟؟؟؟

تسلم ايدك يا فنان

sabsoob said...

لييه كدة...ما كنا حلوين
play back
الواحد مش ناقص رعب..
بس التفاصيل مش ممكنة ما شاء الله...
و علي فكرة..أنا كنت أعرف إنه بيترسم نص بس...و فعلاً تقريباً نفس الشكل..كان أخو واحدة صحبتي بيحب
يرسم الحاجات دي باللون الأحمر و الأسود
بس ياتري العبرة في شكل الشيطان المرعب...و إن أحنا نترعب منه؟؟...
هتفرق معايا إية شكل الشيطان..؟؟

مدونة كسبان said...

مش هقدر أقول لك غير
منك لله

ياراجل
ده انا طافى النور
وقاعد مستمخ
تقوم عامل فيا كده

مش هينفع أقول لك الصوره جميله ياياسر

Anonymous said...

ليه كده؟؟؟؟؟؟ احنا ناقصين فزع :(
some one

Anonymous said...

الصورة جميلة بجد وبتعرف ترعب فعلا وعجبني الحلق الواحد الي في ودنة دة معرفش لية لفت نظري وعجبني بس جميلة وانا شفت كل افلام الرعب الي في الدنيا عشان كدة مخفتش بس قدرت اقدر الصورة كويس انها جميلة من الناحية الفنية
تحياتي يااستاذنا

Yasser Hussein said...

أبو لهب
الشيطان أمور ازاي !!أنت بتتكلم جد؟

Doba
خلاص يا هبه هبطل الشخابيط المرعبة
أحسن شخبوطة منهم تبلعك ومتعلقيش عندنا تاني
:)

Masria
أكيد طبعاً مبتخوفش .. دي كارتون .. وشخبطة كمان
:)

شيماء الجيزى
يعني عايزه تقنعيني أنك مش بتخافي؟
:)

تامر حسين
أنت بالذات ترعب بلد .. يعني الرسم بتاعي استحالة يأثر فيك لأنك شايفه من زمان وعارفه
زرت مدونتك وعلقت عندك كمان

ايوية
إن شاء الله الشخابيط القادمة مرحة وبعيدة عن الرعب

Dalia
هو لابس فردة حلق واحدة عشان عفريت
لو عفريته كنا لبسناها الفردتين
:)

sabsoob
ولا هتفرق معانا في حاجة معرفة شكل الشيطان إلا اننا نقرف منه ونكرهه أكتر
والطبيعة البشرية بتحب تتخيل شكل مادي محسوس للأشياء الغيبية والمحجوبة عننا

some one
سلامتك م الفزع
:)

مشمش
عفريت روش بقى تقولى ايه
المرة دي فردة حلق واحدة
المرة الجايه هيلبس سلسلة .. وهكذا
:)

خالص تحياتي للجميع

Yasser Hussein said...

مدونة كسبان
كسبان .. حبيبي
عفوا سقط سهوا ردي عليك
متبقاش تفتح مدونتي وأنت طافي النور
أحسن حاجة تنط في وشك من عندنا ولاحاجة
كارتونيا مدونة مليئة بالمفاجأت
:)

خالص تحياتي

ANN said...

طبعآ بتعرف
والرسم تحفة كمان