جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Saturday, October 27, 2007

لصوص دوت كوم


أنتشرت في الآونة الأخيرة ظاهرة السرقات الأدبية وأنا أعتبر نفسي واحد من ضحايا هذه السرقات فمع إحترامي لكل من يستعين برسوماتي المنشورة على العديد من المواقع إلا أنني أعتبر من يستعين بهذه الرسومات ثم يقوم بحذف توقيعي من عليها ..لص
الصورة الأولى من أعلى كنت قد رسمتهامنذ سنوات لموقع اسلام اون لاين دوت نت وكانت عن موضوع حول المخدرات ويظهر في الصورة شخص يدخن الجوزة .. تم لطش هذه الصورة وتوظيفها في تصميم هيدر لأحد المنتديات العربية وبالطبع تم حذف توقيعي
الصورة الثانية مشهورة جداً وقد قام العديد من المدونين باستخدامها في مدوناتهم بمناسبة شهر رمضان وهي لفانوس كارتوني وأحب أن أشكر كل المدونين الشرفاء الذين لم يقوموا بحذف توقيعي
أما هذا الموقع فقد قمت بالاتصال بادارته وجاء الرد في منتهى البرود وهو كالتالي
هذا الهيدر مؤقت بمناسبة شهر رمضان وموقعنا ليس له هيدر فلو تحب تصمم لنا هيدر وتهديه للموقع نكون شاكرين
يعني لصوص وعايزين كمان شغل ببلاش
لذلك أرجو من كل من يرغب بالاستعانة باي من رسوماتي عدم حذف توقيعي من عليها لأن ذلك يعد سرقة أدبية
تحديث
بعث لي برويد تعليق حكى فيه واقعة سرقة لأشعاره أردت أن أعرضه عليكم
طبعا كله عارف منتدي هريدي او قهوة كتكوت زي ما بيسموه مشرف قسم الشعر و الخواطر بنفسه سرق كلماتي و حطها باسمه هناك و لما دخلت اعترض و اقول ازاي ده يحصل و من مشرف يا ريته عضو وقفوا عضويتي ومردوش حتي عليا او عبروني و حذفوا الرد بتاعي
كارتونيا : لا تعليق

25 comments:

آلام وآمال said...

معاك حق في كل كلمة قولتها يا استاذ ياسر
والحكاية دي بترجع للضمير في الأول وف الاخر
في ناس بتعتبر ان دي حاجة صغيرة يعني ومش بتفرق في نظرهم ومش بيبصو بقى للإنسان اللي اشتغل وتعب وبذل مجهود في العمل اللي بينسبوه لنفسهم بمجرد حركة ماوس كوبي وبيست

اسكندراني اوي said...

اكيد حقك ولا احد يقدر ينكره

تامر حسين said...

سبحان الله تلف الايام ويظهر الحق ويزهق الباطل
فاكر لما قلتلك علي موضوع سرقه رسوماتك دي قبل كده
بس معلش احنا كلنا معاك
تحياتي

الصقر الجارح said...

تعيش وتاخد غيرة يا فنا ن
هو كده المشاهير بس هما اللى بيتسرقو
تحياتى

فبركة said...

السلام عليكم
هايل البوست الجميل ده
بالمناسبة انا كتبت بوست عن أزمة مصر الخالية اللى الكل بيمر بيها خاصة الشباب ووضعت فيه وجهة نظر يمكن تكون كلاسيكية مثالية شوية لكن أعتقد أنها ممكن تفيد لو حاولنا نطبقها ولو حد مختلف معاها أكيد هيحط البديل ليها
أتمنى التفضل بالدخول على مدونتى وقراءة آخر بوست
رجاء ضرورى وأمنية أتمنى تحقيقها
تحياتى

لماضة said...

طبعا عندك حق
لان دى تعتبر سرقه وطمس لمجهودك الجميل
ومفيهاش اى عيب طبعا ان يذكر مصدر النقل او الاقتباس لان ده مش هيقلل شىء بالعكس ده يدل على الامانه والثقه

عاليا حليم said...

حاضر اول ما تطلع فى دماغى أستعين باحدى بروسماتك مش ممكن حلغى التوقيع

بس ممكن أضيقله ياسر حسن بالأشتراك مع عاليا حليم

ههههههههههه

بالنسبة للبوست الى فات أوعى تغير الأسم ده على أسم اغنية عبد الحليم حتلاقى فين احلى من كده ؟

son's egypt said...

السلام عليكم
ما اكثر السرقة ه>ه الايام
بليس فقط في الرسوم ولكن ايضا علي افيشات الافلام كما نقرا

bos bos said...

ده عادى فى زمن ضاع فيه الضمير
بس مش لازم نسكت عن حقنا

تحياتى لك

ياسر حسين said...

آلام وآمال
المشكلة إن النظام ده ماشي كمان في بعض الصحف والمجلات المطبوعة
بيلطشوا من النت موضوعات ورسومات ولا يشيروا إلى المصادر

اسكندراني اوي
ما ضاع حق وراءه مطالب وأنا أتكلمت وجالي الرد اللي نشرته

ياسر حسين said...

تامر حسين
ماهي صورة منهم يا تيمو أنت اللي أكتشفتها وبعتهالي .. بس أنا نشرت الخبر في الوقت المناسب

خالص تحياتي الاخوية

ياسر حسين said...

الصقر الجارح
يا عم لا مشاهير ولا حاجة لأن ببساطة لو تنبهوا إن اللي رسم الرسم ده مشهور مكنوش لطشوه لأنهم هيتفضحوا
:)

فبركة
أشكرك يا أستاذ شريف ع الاعلان
ذهبت لمدونتك ورايت الموضوع ولكنه طويل جداً خاصة الحوار اللي ع الشات .. بصراحة لم أكمل قراءته
فأنا أحب المختصر المفيد
:)

ياسر حسين said...

لماضة
يا ريت بقى يقروا رأيك ده ويفهموه ويعملوا بيه
:)

عاليا حليم
منورة يا عاليا
إنتي مش محتاجة تأخدي من رسوماتي لأنك فنانة وممكن تبتكري جديد
وأبو عيون جريئة بيسلم عليكي
:)

ياسر حسين said...

son's egypt
مرحباُ بك في كارتونيا
صديق دائم ان شاء الله
بالنسبة لسرقة الافيشات دي ظاهرة عالمية مش عندنا بس
أنا شخصياً شفت أفيشات ولقطات للنجم الهندي أميتاب باتشان ملطوشة من النجم الاسباني أنطونيو بانديرس
وده باسميه اقتباس
لكن السرقة أني آخد الحاجة زي ما هي وأمسح أسم اللي عملها من عليها .. ولا أيه؟
:)

bos bos
حمدلله ع السلام
عبارة زمن ضاع فيه الضمير تقال منذ زمن بعيد .. فمن رأيي أن الضمير موجود وكما يعرفونه الفلاسفة فهو ظل الله داخل الانسان
فالضمير موجود ولكن من الذي مازال يستخدمه؟

خالص تحياتي للجميع

تامر حسين said...

في موضوع جديد مستنيكوم

شيماء الجيزى said...

طبعا انا بتفق مع حضرتك
النت بقى مشاع لكل الناس يسرقوا او يأخذوا براحتهم

ودى النتيجه لينا نحن من نعرض افكارنا واعمالنا الادبيه على الساحة الانترنتيه

حسبنا الله ونعم الوكيل

تحياتى

doha said...

ايوة معاك حق
بما انى بقى خريج حقوق
فى حاجة اسمها
حق المؤلف
ودى عقوبتها
بتبدا من ست شهور
وتعويض
ياللا ياعم اى خدمة
استشارة قانونية ببلاش
وبجد حاجة تزعل
مجهودك بيضيع
وناس معندهاش دم
بجد
ولا دين

Ahmed Al-Sabbagh said...

نظرا لتميز مدونتك تمت أضافتها لدليل الصباغ للمدونات

===============================

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

•«ρяoιd»•™ said...

معلش يا ياسر

المهم انك واثق من نفسك و مسجل اعمالك و بناء عليه ممكن تفضحهم

اما بقي السرقات الأدبيه

فاحنا في بلاد العرب حيث الجرب يا ياسر

طبعا كله عارف منتدي هريدي

او قهوة كتكوت زي ما بيسموه

مشرف قسم الشعر و الخواطر بنفسه سرق كلماتي و حطها باسمه هناك

و لما دخلت اعترض و اقول ازاي ده يحصل و من مشرف يا ريته عضو

وقفوا عضويتي

مردوش حتي عليا او عبروني

و حذفوا الرد بتاعي

انت حظك احلي كفايه انهم ردوا عليك

تحياتي يا حليب قلبي

ياسر حسين said...

تامر حسين
قريت الموضوع وعلقت عليه

شيماء الجيزى
بصراحة ومع الأسف لم أعد أعرض كل ما أحب عرضه خوفاً من سرقته .. أنا أعرض أقل ما عندي كماً

doha
وتفتكر يعني لو رفعت قضية هأعرف آخذ حقي؟

Ahmed Al-Sabbagh
مرحباً بك في كارتونيا
وهنذكر العالم بقى بجرائم أمريكا بأنهي لغة
بالانجليزية و لا بالعامية المصرية؟
الأمر ليس بهذه البساطة

•«ρяoιd»•™
أهي دي بقى السرقة والبجاحة بعينها
أنا لو منك أفضحهم في مدونتك لأن الظاهرة دي لابد من التصدي لها
و يكفي أن يفقد منتدى شهير مصداقيته أو موقع معروف رواده بسبب سمعته في السرقة

خالص تحياتي للجميع

ياسر مدني ...دينامو الإخوان said...

في ذكري وعد بلفور ...لا تنسوا الدعاء لإخوانكم في فلسطين
والدعاء علي الظالمين..واللهم تقبل...وتيقنوا أن الدعاء سلاح مهم لكل المسلمين

نادر said...

الفنان المتميز ياسر حسين
السرقة أمتدت لكل حاجة فى بلدنا
الكبار بيهبشوا
والصغار بيقلدوا الكبار
مش قدوتهم؟أشمعنى الكبار يعنى؟
بس فعلا عيب قوى لما ياخدوا رسمك ويشيلوا أسمك من عليه
فين بقى دور الضمير والأمانة
لكن ده أكبر دليل إن رسمك متميز لدرجة إنهم سرقوه

سيد بتاع البيانو said...

فنان الكاريكاتير ياسر حسين
قطع ايدين اللى يشيل توقيعك من على كاريكاتيرك ولا تزعل نفسك دول شوية ناس معندهمش قدرة على الابتكار فبيسرقوا اعمال الفنانين ويشتفلوا عليها قص ولزق

تائهة فى أرض الأحلام said...

السرقات فعلا منتشرة على النت كتير

بس أحيانا كتير بتحصل من غير قصد
يعنى انا لما بعمل سيرش على جوجل على صور بسيفها عندى واحطها على موقع وانا مش عارفة مصدرها ايه
بس على الاقل مش بقول انها رسمتى
لانى فاشلة فى الرسم وجايبة 2 من 10 فى امتحان الاعدادية بتاع الرسم
وسقط فى امتحان القدرات بتاع الثانوية العامة

تحياتى لك فعلا رسمك جميل
واتمنى انى اشوف لك كرتون انيمشن قريب

مى

ياسر حسين said...

fatma1972
ياسر مدني ...دينامو الإخوان
جزاك الله خيرا أخي الكريم
بالحق هما الاخوان بقى عندهم دينامو؟
:)

نادر
مرحبا بك في كارتونيا
اشكرك على تعليقك

سيد بتاع البيانو
ماهو بعض الناس بيعتقدوا لما يأخدوا رسم ويغيروا معالمه او يحذفوا امضاء الرسام ده نوع من الابتكار

تائهة فى أرض الأحلام
مرحبا بيكي في كارتونيا
أتمنى أنا كمان أن يظهر عمل كارتوني لي ع المدونة
:)

خالص تحياتي وشكري للجميع