جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, October 14, 2007

رسالة رجل قبل أن يرحل


زوجتي .. التي كانت عندي عزيزة .. وهي فعلاً عزيزة .. لأنني لاأجدها حينما أريدها .. تهتم بأطفالنا .. تهتم بأهلها وأخوانها .. ولكن أنا.. أين أنا من دائرة إهتماماتها ؟.. إذا تحدثت وعاتبتها حتى لا تفقدني واذهب لغيرها .. أصبح في نظرها لا أشعر بتعبها في رعاية أطفالنا .. مال هذا بذاك .. تريد مني دائماً المال من أجلها ومن أجل فسحة العيال .. تريد سيارة جديدة .. تريد شقة فريدة .. لا تحمد الله على ما بين يديها .. وتدعي التقوى والايمان والصلاة والتسابيح .. أنا زوجك الذبيح .. اما آن الآوان لقليل من الاهتمام .. اليوم أرحل بعد ان حذرتك كثيراً .. أرحل وأنجو بروحي وجسدي .. ولن أعطي نفسي لزوجة أخرى .. ولن القي نفسي في سجن الزواج .. فكم بت وحدي بدون الخليلة ... فهي مشغولة .. بتنيم العيال .. هتقولي عليا مفتري .. هيقولوا عليا مفتري .. هتقولوا عليا مفتري .. بالله عليكم مين المفتري؟
الراجل اللي اتجوز عشان يلاقي زوجة يكلمها وقت ما يحتاجها .. ولا الست اللي بتاخد كل حاجة بتطلبها ومش هاين عليها تحسس جوزها بالاهتمام ولو بالكلام .. أنا حالة فريدة من نوعها ... ويمكن يكون في غيري كتير .. بس دموع المرآة بيصاحبها مليون ودن بتسمع شكواها .. لكن دموع الراجل بيصاحبها كلمة واحدة ....عيييييب متعيطش .. أنت راجل والراجل ميعيطش ... دلوقت أنا راحل ومش راجع ومتحاوليش تدوري عليا .. لأنك عمرك ماهتلاقيني ولا عمرك لقتيني ..لأني عمري ما لقيتك
التوقيع
زوجك اللي طق من جنابه
عزوز عزوز المقروص
تحديث
جاء تعليق هام جدًا عندما بعثنا به لعزوز عض الأنامل وشعر بالندم لأنه ترك عزيزة الزوجة الطيبة الوفية وجاء هذا التعليق من هبه صاحبة مدونة دوبا والحقيقة التعليق كان مليان حكم وكلام مفيد أردت أن أعرضه عليكم حتى يستفاد كل زوج بيمر بظروف عزوز المقروص
هبه قالت ايه؟
لا يكلف الله نفسا الا وسعها لما الراجل متضايق من ان مراته بتضبع وقتها عالعيال كان جاب كل دول ليه ولما هيه بتهتم بغيره وباهلها فده لان هيه بتلاقى نفسها فيهم ومش بتلاقى نفسها معاك يا عزوزاعملوا وقفة قوية فيها هيه تبتعد قليلا عن الاهل والخلان وتقترب اليك فى خروجات وفسح واشياء من هذا القبيل التى تشعرها بانوثتها التى لم تعد تسمع منك اى كلمة عنها وعزوز انت عليك انك تشيل شوية تربية وتنييم العيال معاها - القفة ام ودنييين بيشيلوها الاتنين هنا فى مصر وللأسف برده - الراجل عاوز ياكل ويشرب وعياله يبقو متربيين والبيت نضيف والست تكلمه وتتقرب ليه وتبقى حلوة فى مقابل انه بس يروح شغله ويرجع وهو ده دوره فين انك تآنس ولادك وتقعد معاهم وتتكلم وتشارك بفاعليه فى التربية وتحط معاها الاساس وحبة عليك وحبة عليها فين انك تسمعها كلمة حلوة وتخرجها وتخليلها وقت ليها يعنى انت لو روحت بره مانتا برده بسلبيتك هتلاقى نفس المشاكل مع اى واحدة تانية ابدأ بتغيير نفسك ومن بعدها الآخرين - الراجل ربنا حباه بقوة رهيبة وبعقل نافذ عن الست - فالمفروض انك ترسم وتخطط وهيه تمشى على تخطيطك - مش بمنتهى البساطة تسيبلها المركب - لو مالت المركب شوية اعدلها ولو اتقلبت برده عليك تعدلها كلكم راع وكل مسؤل عن رعيته
كارتونيا : نحب أن نخبركم ان عزوز عاد لعزيزة بعد ما قرأ التعليق ده وهيتبع كل ما اشارت به هبه من ارشادات حتى تعود المياه لمجاريها

11 comments:

اسكندراني اوي said...

لااااااااااااااااااا
يا عزوووووووووز
انا مش معاك ابدااااااااااا

يعني بعد الغلب اللي هيا شايفاه ويكونجزائها كده
دا حتى ما يرضيش ربنا

اعقل يا مقروص وربنا يهديك

سيد بتاع البيانو said...

تصور أغلب الستات فى مصر كده
أهلها وعيالها نمرة واحد أما جوزها فيقف فى آخر الصف وبعد كده يرجعوا يقولوا ياريت اللى جرى ماكان
لما الواحدة تتطلق أو جوزها يعرف واحدة تانية أو يتجوز عليها
هى دى المرأة المصرية مع الأسف
معلش يا عزوز غيرها فى غيرها
:)

Doba said...

انا بس حبيت اعلق ب - لا يكلف الله نفسا الا وسعها

لما الراجل متضايق من ان مراته بتضبع وقتها عالعيال كان جاب كل دول ليه

ولما هيه بتهتم بغيره وباهلها فده لان هيه بتلاقى نفسها فيهم ومش بتلاقى نفسها معاك يا عزوز

اعملوا وقفة قوية فيها هيه تبتعد قليلا عن الاهل والخلان وتقترب اليك فى خروجات وفسح واشياء من هذا القبيل التى تشعرها بانوثتها التى لم تعد تسمع منك اى كلمة عنها وعزوز اندى عليك انك تشيل شوية تربية وتنييم العيال معاها - القفة ام ودنييين بيشيلوها الاتنين

هنا فى مصر وللأسف برده - الراجل عاوز ياكل ويشرب وعياله يبقو متربيين والبيت نضيف والست تكلمه وتتقرب ليه وتبقى حلوة فى مقابل انه بس يروح شغله ويرجع وهو ده دوره

فين انك تآنس ولادك وتقعد معاهم وتتكلم وتشارك بفاعليه فى التربية وتحط معاها الاساس وحبة عليك وحبة عليها

فين انك تسمعها كلمة حلوة وتخرجها وتخليلها وقت ليها

يعنى انت لو روحت بره مانتا برده بسلبيتك هتلاقى نفس المشاكل مع اى واحدة تانية

ابدأ بتغيير نفسك ومن بعدهاالآخرين - الراجل ربنا حباه بقوة رهيبة وبعقل نافذ عن الست - فالمفروض انك ترسم وتخطط وهيه تمشى على تخطيطك - مش بمنتهى البساطة تسيبلها المركب - لو مالت المركب شوية اعدلها ولو اتقلبت برده عليك تعدلها

كلكم راع وكل مسؤل عن رعيته
طولت معلش

تخياتى

ياسر حسين said...

اسكندراني اوي
كلامك في الصميم وهأبلغه لعزوز
:)

سيد بتاع البيانو
أيه يا عم سيد هو أنت بتشجع على خراب البيوت .. أيه خيرها في غيرها؟
يعني عايز عزوز يتجوز غير عزيزة
:)
يا عم قول كلمة تهدي النفوس

Doba
أحلى واقوى تعليق ممكن يتقال
استعرضتي كل الحلول العادلة
أحييكي يا هبه
وهابلغ عزوز واقنعه بكلامك
:)

خالص تحياتي للجميع

ايوية said...

والله بجد صعب عليا عزوز

يعنى فية ستات سعات بتبقى تججيب كل الامراض وفية رجالة برضة يخنقوا
بس فى الحالة دة عزوز شبة معزور
يعنى ممكن يساعدها هتفضة شوية وتبقى معاة فى الوقت الفاضى يعنى يا عزوز ذاكر مثلا للولااد

Doba said...

انا بجد سعيدة جدا انى قدرت اكون سبب فى ان عزوز يرجع لعزيزة

اشكرك
هبة

تامر حسين said...

عزوز لا تشرب هذا الدواء الدواء فيه ثم قاتل
ههههههههههههههههههههههههههههههخهه
والله مش عارف اقول ايه بس خايف اقول حاجا بسلامه نيه تقراها مرات عزوز وتزعل مني وانا مقدرش علي زعلها الحقيقه عشان هي طيبه وبنت حلال بس يمكن يكون الشيطان واخد بالك الشيطان دخل بينهم ومعلش خليك انت الكبير بردو وتعامل مع المرأه بعقلها واستحمل عشان المركب تسير
اخوك المخلص دائما
تامر حسين

Sarah Daw said...

إلى :- عزوز عزوز المقروص

حاول تتفاهم مع مراتك و تتكلم معاها كتير و تفهمها رأيك و ربنا يهديها أو
يرحمك منها

إلى ياسر حسين أنت فنان يعيشنا حاله موجوده كتير فى الوطن العربى

بس ياريت تكتب قصة على العكس لما يكون الراجل هو آللى مكبر دماغه و سايب المسكينه تكلم نفسها طول اليوم

:)

ياسر حسين said...

ايوية
عزوز زي أي راجل بيحب يشعر بالاهتمام بالضبط زي ما الست بتحب إن جوزها يهتم بيها

Doba
عزوز لازم يرجع لعزيزة وإلا يبقى إنسان أناني مبيحبش إلا نفسه
خصوصاً إن الاطفال يوماً ما هيكبروا ويعتمدوا على أنفسهم ساعتها هتفضى له عزيزة .. بس يصبر شوية

تامر حسين
حالة عزوز بيمر بيها أزواج كتير بيعتقدوا إن زوجاتهم مبقوش مهتمات بيهم فين حين إن الزوجات شايلين حمل كبير زي الاهتمام بالبيت والاطفال .. وأحيانا بيكتفي الزوج بمصروف البيت وخلاص وده غلط

Sarah Daw
عزوز ربنا هداه هو ومراته بعد ما وصلنا له تعليق هبه صاحبة مدونة دوبا
وعلى فكرة أنا أنقل قصة واقعية حدثت أمامي
أما بالنسبة لموضوع الست اللي جوزها بيسيبها لوحدها
فأعتقد إن لو كتبت في هذا الموضوع إمرآة هيكون الاحساس اقوى .. فأنا كرجل أعبر هنا عن شعور الرجل .. وأعتقد أنني أستطعت أن أوصل لكم الحالة بمنتهى البساطة

خالص تحياتي وشكري للجميع

Miss Egyptiana "Trapped Soul" said...

لا كلام بعد ما قالته دوبه
هذا رأى الصواب والحكمة.. والحقيقة التى يحاول ان يعمى الرجال نفسهم عنها
ويعلقوا سلبياتهم على ملامه المرأة

تحياتى

ياسر حسين said...

Miss Egyptiana "Trapped Soul"
أنا كنت ناوي أنشر بوست رد عزيزة على عزوز
لكن دوبا ردت وقالت المفيد

خالص تحياتي