جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, December 5, 2007

الواجهة الفنية

اعتاد الناس على رؤية الفنان التشكيلي وفنان الكاريكاتير غالباً ما يكون مطول شعر رأسه بشكل مبالغ فيه
أو مطول شاربه ولحيته .. السكسوكة
وأنا يومًا ما .. تحديداً عندما كنت أدرس الفنون في الجامعة كنت أتخيل أن هذا هو الشكل الطبيعي للفنان التشكيلي أو فنان الكاريكاتير وأتخذت من هذا الشكل في فترات متقاربة كواجهة شكلية لي كفنان .. ولكن مع مرور السنين وازدياد الخبرة أتضح لي أن الفنان بفنه وليس بشكله حتى ولو كان شكله مثل أي موظف أو أي مواطن بسيط .. وليس الشعر المسترسل أو السكسوكة هما من يقومان بالرسم .. فقد ينسى الناس شكل الفنان وربما يكون شكله مجهول بالنسبة لهم ولكن لا ينسون اعماله .. لذلك اعلنت التمرد على الشكل التقليدي لفنان الكاريكاتير وقصرت شعر رأسي وتخلصت من شاربي وسكسوكتي ... حلوة سكسوكتي دي ..هههههههه
وأكيد يهمني رأيكم
خالص تحياتي

20 comments:

Anonymous said...

انا قارئة جديدة للمدونة الجميلة اللى لفتت نظرى بمواضيعها المتنوعة. انا رأيي يا فنان ان الشنب أو السكسوكة أو اللحية ملهاش دعوة فعلا بالمهنة زى مقلت . عموما انا اعتقد ان شكلك هيبقى احلى بالشنب والسكسوكة meme

كمال سلطان said...

شكلك اتغير خالص يا أستاذ ياسر
وبصراحة اناكمان الرسام بالنسبة لى يعنى سكسوكة وشعر طويل وبيريه
عالعموم مسيرنا نتعود عالشكل الجديد

كمال سلطان said...

بالمناسبة انا حلم من أحلامى اترسم بريشتك
ياترى الحلم ده ممكن يتحقق !!

Unknown said...

هههههه
طيب يعنى المفروض اعاكسك ولا ايه
لا بس حاسه ان حضرتك صغرت شويه ولا ايه
;)

Yasser Hussein said...

meme
مرحبا بيكي في كارتونيا
وأتمنى أن تكوني صديقة دائمة للمدونة
حكاية شكلي هيبقى أحلى بالشنب والسكسوكة دي لطيفة جداً
:)
أنا بشكل عام بأحب التغيير لما أزهق من شكلي كده هأبقى اربيهم تاني

تحياتي

Yasser Hussein said...

كمال سلطان
أهلا بيك صديق جديد لكارتونيا
على فكرة شكل الرسام مش قاعدة وفي فنانين مشاهير أذكر منهم الفنان عفت والفنان جمعه وأحمد عبد النعيم وسعيد ابوالعينين وعمرو فهمي .. كلهم لا عاملين سكسوكة ولا مطولين شعرهم
أنا شخصيا لو حصل وطولتهم تاني هيكون نوع من التغيير مش أكتر
بالنسبة لصورتك أبعتهالي ع الايميل بس متستعجلنيش عليها وانا اوعدك ان شاء الله أني ابقى أرسمهالك وأبعتهالك
تحياتي

Yasser Hussein said...

لماضة
بطلي لماضة .. تعاكسي مين
:)
اولا انا عمري 36 سنة إلا شهر يعني مش عجوز قوي
ثانياً أنا وزني قل عن الصور السابقة لأني بأمارس رياضة بشكل مستمر في الفترة الاخيرة .. وطبعا مع ازالة الشارب واللحية أكيد هيبان شكاي اصغر
مش كده أحسن ولا أيه
:)
خالص تحياتي

تامر حسين said...

انت فكرتني بالفيلم بتاع الفنان البوهيمي الي مكنش بيستحمي و بوب مارلي والناس دي
الي فهمين ان الفن انك تكون مختلف
بس هما فهمين انك تكون مختلف بأنك تكون سوري في اللفظ متعفن
بس انت بما انك فنان فانك تفننت في شكلك بأنك استغنيت عن الاشكال المصطنعه للفن
ان الله جميل يحب الجمال
وانا كمان في رأي ان الجمال مش جمال الشكل فقط بل جمال الروح وكفايه انك لما بتضحك اي حد برسوماتك او كاريكاتيرك ده في حد ذاته جمال للروح
معلش جمالي ملعبك شويه بس يمكن عشان مش عارف اعبر
تحياتي يا فنان وعلي فكره انت كده صغرت عشريين سنه
سي يو علي خير

تامر حسين said...

تعديل

معلش جمالي ملعبك شويه بس يمكن عشان مش عارف اعبر
تحياتي يا فنان وعلي فكره انت كده صغرت عشريين سنه
سي يو علي خير

هي مش جمالي هي كلامي

Anonymous said...

أكيد الشكل مش كل حاجه.....الشكل أو الجسد مجرد رداء مش بيعبر عن أى حاجه المهم داخل الرداء أيه؟؟؟؟
بسكسوكه او من غير أنت هو انت و فنك هو فنك و الى كلنا بنحبه :)
some one

السـيد شبـل said...

كن نفسك وما تريد انت
تطول شعرك تقصره هذا يعنيك انت ف المقام الاول وليس لاحد شانا فيه
لكن بما يوافق الذوق العام وبما لا ينفر الناس منك... هذا بالطبع لانهم يعنوا لك شيئا........

اول مرة ادخل ع المدونة مدوونة جيدة واتمنى لك التوفيق

Anonymous said...

يااستاذى الفنان بفنه
لابشكله ولا بشعرة ولا بسكسوكته
وانت فنان طول عمرك

أمل عبد الحكيم said...

الفنان بفنه لا بشكله ولا بشعرة ولا بدقنه ولا سكسوكته
وانت فنان جميل وموهوب اوى
ودى اهم حاجه

tota_fm said...

استاذ ياسر انا اول مره ادخل المدونه بس انت فعلا فنان عظيم ومبدع وفعلا عمر الفن مكان ليه شكل معين وكمان المبدع بيعبر عنه فنه وروحه وربنا يوفقك وعلى راي لماضه المفروض تتعاكس
تحياتى لك

AHMED SAMIR said...

تصدق بالله
كنت بسأل نفسي السؤال دة من كام يوم وانا بتفرج في التليفزيون على افتتاح احد المعارض للفن التشكيلي
سألت نفسي
هم عاملين كدة ليه؟
ايه العلاقة بين الشعر والرسم؟
مالقيتش اجابة غير عندك
تحياتي ليك
تطول شعرك تقصره...هتفضل برضة فنان جامد جدا

son's egypt said...

السلام عليكم
فعلا الانسان مش بالشكل
لان الموهبة هي الاساس
ممكن يكون الواحد شكلة كويس جدا ولكن مفيش موهبة الفنان عنده

الصقر الجارح said...

الله عليك يا فنان

حلو قوى السكسوكه دى

ابقى عدى عليا بقالك كتير ما جتش

Yasser Hussein said...

تامر حسين
أخي تيمو .. أهوه تغيير وعدم تقيد بشكل معين

some one
أشكرك على تعليقك الجوهر أهم من المظهر

السيد شبل
مرحبا بك في كارتونيا صديق دائم إن شاء الله
أكيد الواحد بيهتم إن شكله يكون غير منفر والا يمشي وراء التقاليع بدون تفكير

Anonymous
أشكرك

امل عبد الحكيم
متشكرين يا ست الصحفية
مدونتك جميلة

tota_fm
مرحبا بيكي في كارتونيا
واشكرك على ذوقك

A.SAMIR
علاقة الرسم بالشعر جاوب عليها سلفادور دالي لما اتسال عن شاربه اللي كان واقف لفوق فقال لأنه لما بتكون في ايديه الوان زيت كان بيمسحها فيه
غالبا ممكن الواحد يشيل في شعره الاقلام والفرش بتاعة الرسم بالمرة
:)

son's egypt
وعليكم السلام ورحمة الله وبركاته
عندك حق

الصقر الجارح
من عينيا يا باشا
بس انا رحت وشفت صورتك وانت بتتزحلق ع الرمل في سيوة محبتش أعلق أحسن تتكعبل
:)

خالص تحياتي وشكري للجميع

حسن ارابيسك said...

ياسر
سعيد جداً بزيارتك لي
سعيد جداً بتواجدي هنا
بجانب رسام كاريكاتير
وقد أعجبت بهذا الكراكتر المميز في خطوطك
أنا أيضا عملت في مجال الكاريكاتير في مجلات عده
اعجبت بالمدونة كلها أول عن أخر

وبخصوص ماتدعيه الشكل التقليدي لفنان الكاريكاتير وانا اعرف بالطبع انك تقصد الفنان بصفة عامة في الفروع كلها من نحت وتشكيلي وجرافيك ..الخ
ولكن اختلف معك في ان الواحد منهم يبحث عن هذا الشكل المميز عندما يدخل كلية الفنون.. الحقيقة المضووع بيجي لوحده كده انا مثلا شعرت منذ الصغر برغبتي في الحصول على هذا الشكل فكنت منذ الصغر بالشعر الطويل جدا والذقن الكاملة دون سكسوووووووووووكة
وكنت اجد في هذا الشكل راحة نفسية وتوافق مع الذات ومع تركيبتي وتكويني كفنان

سعدت فعلا بالتعرف عليك
ويكون لي الشرف في اضافة رابط مدونتك عندي والأن اسنح لي أن اتجه لبقية مواقعك الفنية لكي اكتشف ما فيها من جواهر فنية..اكيد

Yasser Hussein said...

حسن ارابيسك
منور يا عزيزي وإن شاء الله تكون صديق دائم لكارتونيا
بالنسبة لموضوع الشكل فهو حرية شخصية وراحة نفسية ولكني أتحدث هنا حول الانطباع المأخوذ بشكل عام عن شكل الفنان التشكيلي لدي رجل الشارع
وما نراه أيضاً في الافلام والمسلسلات التي يظهر فيها فنان تشكيلي بنفس هذا الشكل .. كما لاحظت أيضا أثناء دراستي للفنون أنني وزملائي كنا نتأثر باساتذتنا ونحاول تقليد شكلهم معتقدين أن هذا شكل الفنان التشكيلي
وما سردته هنا مجرد تجربة شخصية ورأي خاص لا افرضه على أحد ولكل شخص حرية أختيار الشكل الخارجي الذي يرتاح إليه نفسياً ويعبر بشكل أو بآخر عن جوهره

خالص تحياتي