جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Tuesday, December 25, 2007

يا ترى العيب في مين؟


في الدور الثامن حيث أسكن اقف منتظر المصعد للهبوط... ركبت المصعد واذا بالباب يفتح بالدور السادس ويصعد بجواري أربعة أشخاص .. أشرت إليهم بأن المصعد قد يتعطل لأن حمولته أربعة أشخاص فقط ولكن دون جدوى ... ابتساماتهم البلهاء المصحوبة بعبارات مثل : لا يا عم .. بيشيل أكتر متقلقش ، وإذا بالمصعد يصل للدور الأرضي ويرفض أن يفتح أبوابه فيقوم أحدهم بفتح الباب بيديه بالقوة ... ونخرج جميعًا من المصعد ... أنا بألعن في أم الغباء في سري ... وهم يضحكون ببلاهة


تمر الأيام أستقل المصعد مرة أخري للهبوط وإذا بنفس الأشخاص يصعدون فأجد نفسي بدون تفكير وبعصبية أدفعهم يميناً ويسارًا لأنجو بنفسي وأخرج من المصعد لأنني بصراحة خايف على عمري واللي ميشوفش من الغربال يبقى أعمي


سؤال قفز إلى ذهني .. ياترى العيب في مين؟


في صاحب العمارة لأنه وضع مصعد لا يحمل سوى أربعة أفراد فقط


أم في المصعد لأنه لا يحمل سوى أربعة أفراد فقط


أم فى الأشخاص الذين يصرون على صعود المصعد بالرغم أنه من الواضح أنه ممتليء ومعلوم للجميع أنه لا يحمل سوى أربعة أفراد


سؤال لابد أن يتفكر في كل من يريد أن يركب مصعد ... أو عبارة


في انتظار تعليقاتكم

17 comments:

اسكندراني اوي said...

العيب في ميراث يا عم ربك الستار

ان شاء الله حتعدي

يا عم قول يا باسط

وهو ده اللي جايبنا ورا على كافه المستويات

Unknown said...

العيب مش فى دول خالص
العيب على حارس العقار اللى سمح للعقول دى انها تطلع بالشكل ده
مشكله متكرره فى كل العمارات اسالنى انا
ههههههه
الحمد لله ان الواحد وزنه خفيف

تامر حسين said...

الله الله الله ايه يا عم الجو ده بجد عندك حق تلعن ابو الغباء
وانا مع اسكندراني اوي في الي بيقولو هو ده الي جايبنا ورا
بس احسن انك عملت كده ولو عرفت تكلم صاحب العقار المهيطل ده علي الحوار ده يكون افضل
اما العيب في مين العيب في الغباء بعيد عنك وعن القاريين
تحياتي وخلي بالك من نفسك

Bella said...

العيب في كل دول مع بعض

صاحب العمارة لانه عامل الاسانسير سعته صغيرة

وفي نفس الوقت لو كان عامله اكبر برضه الناس ح تطلع زيادة عن العدد المسموح

مفروض طريقتنا في التعامل مع الامور تتغير ونبطل التساهيل اللى بنرشها في كل مكان عمال على بطال والاستهتار اللى رجعنا مليون سنة لورا

يعني عن\ك مثلا حركة سخيفة جدا بتتعمل في الاسانسيرات ان يطلع واحد مدخن
او تدخل تلاقي واحد مدخن واقف ومستمتع جدا بالدخان في مكان ضيق والناس ح تفطس حواليه

حبك المزاج يعني

منتهي السماجة وقلة الذوق والاستهانة بالخطر اللى ممكن يصيب الناس بسبب انانية شخص غير مسؤول

نفس الامر مع عيب تاني بيحصل في ركوب الاسانسيرات

تقف مع مجموعة منتظرين وصول الاسانسير وتبص تلاقي واحد او كذا واحد جايين بعد الواقفين كلهم وبمنتهي الجلافة وقلة الذوق بكتف يخبطوا الواقفين ويدخلوا الاول واللى مايزقش مايطلعش

وهكذا تتحول بمرور الوقت لمواطن بكتف والا ح يخبطك غيرك وياخد مكانك

احنا محتاجين لاعادة تأهيل

بسمه عبدالباسط said...

العيب فى العقول اللى مش عايزة تفكر وبتستهتر بحياتها هما فاكرينها شطارة لكن لو حصلت حاجة ليهم بجد هيفهموا يعنى أيه نظام

tota_fm said...

انا شايفه ان العيب في معظم الناس اللى ما بقتش تتبع النظام والكلام ده مبقاش في المصعد بس بقي فى حاجات كتير اوى وعلى راى اسكندرانى اوى دا اللى مخليانا ورا والله يلعن ام وابو الغباء

Unknown said...

نعيب زماننا والعيب فينا وما لزماننا عيب سوانا
العيب فى الناس الى بستهون بكل شى وتقول يلا يعنى هيحصل اية
تحياتى

gogo we bas said...

اقولك انا الجديد

العيب فيك انت


ازاى يا راجل تعترض؟؟!!!
ده انت غريب جدا


الاسانسير حمولة 4 وانتو 5 او6 او ان شالله تكونو10 ايه المشكلة؟؟
هيحصل ايه يعنى؟؟


الاسانسير هيقع مثلا؟!! هتموتو يعنى

ساعتها ياعم هتطلع فى العاشرة مساءا
و90 دقيقة واحتمال كمان تطلع فى الغيط غيطك.... يا بختك ياعم

حد طايل بس
بص لنص الكوباية المليان
بلاش تشاؤم
مش الاخ من مصر برضه؟
هههههه

ودمتم

عــلاء ســالـــم said...

للأسف من أكبر عيوب الشعب المصري إنه غير ملتزم في بلده وفي نفس الوقت هو أكتر شعب بيلتزم لما بيكون خارجها.

يعني من الآخر شعب يخاف مايختشيش

Yasser Hussein said...

اسكندراني اوي
على رأيك .. قول يا باسط تلاقيها هاصت

لماضة
وحارس العقار هيقعد للناس في كل دور وهما نازلين ازاي ؟
:)

تامر حسين
أخي الحبيب الكلام مع صاحب العقار مالهوش أي معنى لأنه مش هيمسك عصايا للسكان أو هيقف ينظم ركوبهم للمصعد
أو يعطيهم دورة تدريبيةعن كيفية ركوب المصعد
المشكلة في السكان ...المصريين
بعضهم طبعاً مش كلهم

Bella
حتى لا نظلم أحد سأشرح لك الصورة كاملة بايجاز
يوجد في العمارة 2 اسانسير
واحد للادوار الزوجية والآخر للفردية
كده يبقى صاحب العقار عمل اللي عليه
بالنسبة لما أشرتي إليه من ظاهرة التدخين بالمصعد فحدثي ولا حرج
لدرجة إن واحد كتب لهم جوا المصعد على حيطانه بالقلم الفلوماستر ممنوع التدخين داخل المصعد ولا حياة لمن تنادي
الخلاصة إننا كمصريين شعب اعتاد ع الزحام والتكدس بداية من الفصول المدرسية مرورا بالاتوبيسات وطوابير العيش وزنقة مترو الانفاق فمن الطبيعي أن نتكدس في أي مكان في العالم داخل الاسانسير .. إدمان
:)

bos bos
وليه البني آدم ينتظر مصيبة عشان يفوق
أنا شخصياً مش مستعد يقع بيا الاسانسير عشان أتعلم النظام
:)

tota_fm
يلعن ابو وام وابن أخت الغباء كمان
:)

ايوية
الناس اللي بتقول وأيه يعني هيحصل أيه
دول الناس اللي بيلقوا بايديهم إلى التهلكة

gogo we bas
عايزاني أطلع في 90 دقيقة
والخبر يقول فنان كاريكاتير مصري يقع به الاسانسير في الغربة نتيجة لغباء أبناء بلده

alaa salim
أضحكك يا شاعر الجيل
الموقف اللي بأحكي عليه خارج مصر
يعني برضه المصريين مع الاسف بعضهم لا يلتزم بالنظام داخل .. وخارج مصر أيضاً

خالص تحياتي وشكري للجميع

تامر حسين said...

سيبك انت
انا مش عاجبني غير النيو لوك الجديد
تحياتي يا فنان
صحيح في موضوع جديد حطيتو ومستني تشريفك انت وكل الزملاء تحياتي كتير

Doba said...

الكل بيتبع سياسة قل لن يصيبنا الا م كتب الله لنا

هو المفروض انت لقيتهم جماعة مع بعض من الاول فتقوم واخد نفسك وماشى لكن هما بقى يركبو على مرتين مينفعشى

قول يا بااااااااسط
الهمة يا ردالة

تحياتى
هبة

son's egypt said...

السلام عليكم
متعرفيش العيب فين بالضبط
لان البللاه وعدم الاهتمام بالاشياء هي سبب اللي احنافيه

Yasser Hussein said...

تامر حسين
شكرا ياباشاأنت ملك الشياكة
أنا رحت مدونتك وعلقت

Doba
تقولي أيه بقى
أصل الشعب المصري زي ما بيقول الاعلام
شعب متدين وطيب
:)

son's egypt
العيب عند أهل العيب
وان طلع العيب من أهل العيب ميبقاش عيب
:)

خالص تحياتي

Cleo said...

العيب فى ثقافة الاستهتار والاستخفاف اللى سيطروا على عقول الناس.. إيه السبب؟؟ السبب إن محدش اتعود انه لو غلط هيتحاسب، وعشان كدة كل غلط بيعدى..

أمل عبد الحكيم said...

العيب فى العمارة نفسها
اللى سكن فيها ناس بالعقليه دى
هههههه
طبعا العيب فى الناس كل حاجه فى الدنيا بقت عافيه
لو دخلت المترو
تلاقى الناس والمترو ماشى وبيركبوا بالعافيه
تلاقى واحد عايز يركب الاتوبيس بالعافيه
دى طريقه تفكير ولازم تتغير
وكويس والحمد لله انك نجيت بنفسك
لمرة اللى جايه ابقوا وسعوا الاسانسير

Yasser Hussein said...

Cleo
وأي استهتار وما خفي كان أعظم

امل عبد الحكيم
شغل العافية شغال ع الفاضي والمليان
:)

خالص تحياتي