جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, February 20, 2008

أين تذهب بقايا البيتزا؟

أعتبر نفسي واحد من عشاق البيتزا ومن رواد مطاعمها الشهيرة كلما اتيحت لي الفرصة لذلك ، ولكن في سؤال بيخطر على بالي كل ما أروح مطعم بيتزا واشوف الصورة اللي معروضة مع الموضوع دي ، الناس وأنا واحد من الناس دي بتأكل البيتزا وترمي الحواف الفارغة واللي بتشبه العيش الفينو الحاف ، طيب يا ترى لما أحنا بنرمي الحواف دي بتروح فين ؟
هل بتترمي في الزبالة ؟ ولا بيعطوها للناس اللي مش لاقيه اللقمة؟ ولا بيرموها للفراخ؟ ولا بيعيدوا تصنيعها تاني؟
أعترف أني بأشعر بوخز الضمير لما أرمي حواف البيتزا ..لأنها نعمة ربنا ولازم نحافظ عليها، وأعتقد أني ممكن أرتاح لو عرفت إن مصير هذه الحواف أن ينتفع بيها الغير وألا تلقى فى الزبالة
وياريت لو حد عنده معلومة يفيدني وأنا سوف أتوقف عن أكل البيتزا لحين الافادة
تحديث
بعد ما جاء لي من تعليقاتكم حول مصير الحواف قررت وبشكل نهائي إستبدال تناولي للبيتزا بفطائر الجبن المصرية والشامية
على الأقل بتتاكل كلها وسعرها أقل بكثير وأدينا بنشجع المنتج العربي وبنوفر في المصاريف

10 comments:

أسامة أبوالخير said...

تحياتي استاذ ياسر لقد لفت نظري إلى أمر مهم كنت غافلا عنه وهو غختلاف المفاهيم والكلمات المستخدمة في كل مجتمع عن الآخر.
اما بالنسبة لموضوع البيتزا فأول ما سمعنا عنها وبدأت تنتشر هذه الوجبة في مجتمعاتنا العربية كان الإعلان عنها أن تكويناتها من بقايا أو فضلات المطبخ يعني جبنه بالإضافة إلى الطماطم والبازنجان والكوسه وغيرها حتى تم تصنيف هذه الوجبات مرة أخرى إلى بيتزا بالجبنه وبيتزا بالكاتشب وبيتزا باللحمة وهكذا الشاهد في كلامي أنه منذ الغعلان عنها تأكيد على انها وجبه غير صحيه فلا تستغرب أن يتم إعادة تصنيع ما تبقى من وجبتك في التحضير لوجبه أخرى قد يأكلها شخص آخر وهكذا وسلمني على البيتزا

Empress appy said...

والله انا مش بحبها بس اللى اعرفه ان البواقى بتترمى فى الزباله اى نعم فى الزباله وده واحد ماسك صيانه التكيفات فى بيتزا وكنتاكى هو اللى قالى
ممكن بقى تحط عليها كاتشب وتأكلها علشان مش ترميها وتبقى حرام عليك
ميرسى على معلومه الزيت ربنا يكرمك كده خليتى اخد بالى منه علشان بطوط حبيبى

Ahmed Al-Sabbagh said...

عزيزى الاستاذ ياسر

اظن ان بقايا الطعام فى المطاعم الاجنبية عموما تذهب للنفايات ويمنعون تداولها مرة اخرى

بس بجد لفتة جميلة منك انك تفكر فى الموضوع ده

ومؤلم اوى ان فى ناس كتير فى مصر تعبانين اوى .. واظن ان مخلفات طعام المطاعم دى ممكن تستخدم فى منفعة .. بس معرفش ازاى

انا قريت انهاردة فى الدستور ان الفقراء متجمهرين فى جراج الاوبرا عشان ابو تريكة راكن عربيتة هناك ومستنينه عشان يطلبو مساعدة

لنا الله
وتحياتى ليك

وامنية حياتى انى اشوف حضرتك وجها لوجه
احنا بنعمل لقاء مدونين كدة كل فترة وبيكون لقاء اخوى
ومش عارف هل ممكن نلتقى بحضرتك

تحياتى
احمد الصباغ

AHMED SAMIR said...

في اكتر من حل:
يا اما تطلب البيتزا ديلفري وبالتالي هتبقى قاعد في بيتكم وتعمل ببقايا البيتزا بتاعتك ما بدا لك
يا اما تطلب بيتزا الحواف بتاعتها محشية سوسيس او جبنة علشان تاكلها وما تيرميهاش
يا اما تسألهم في مطاعم البيتزا اللي سيادتك بتاكل فيها انتم بتعملوا ايه ببقايا البيتزا؟
يا اما تريح نفسك وماتاكلشي بيتزا خالص
بس بجد بقى
المطاعم دي شاطرة جدا واكيد اكيد لهم تصريف لبقايا البيتزا دي
تحياااتي

أمل عبد الحكيم said...

بيتهيألى كدة والله اعلم بتترمى
بس انا شخصيا مش بسيبها بحط عليها كاتشب وجبنه رومى من اللى موجودة على الترابيزة
واكلها عشان الحرمانيه
وياريت تعمل زى كدة
او تتطلب بيتزا دابل استافت كراست لو بتاكل فى بيتزا كينج

Yasser Hussein said...

أسامة أبوالخير
حقيقي أشكرك على المعلومة التاريخية دي عن البيتزا
فعلا هي بقايا أكل المطبخ
ولكن انا من محبي الجبنة اللي بتعتبر مكون اساسي من مكوناتها
لكن حكاية انها وجبة غير صحية فأنا أتفق معك فيها لأنها فيها نسبة كبيرة من الزيوت والدهون المشبعة وأيضا الدقيق الابيض

تحياتي

Yasser Hussein said...

appy
شكرا على المعلومة دي
بس فعلا حرام انهم مش بيستفادوا من البواقي دي في شيء مفيد

تحياتي

Yasser Hussein said...

Ahmed Al-Sabbagh
يا راجل انت لسه بتقرأ الدستور؟
:)
أنا طبعا يسعدني مقابلتك وإن شاء الله لما أنزل مصر نتقابل بس أنت تواصل معايا بالايميلات

خالص تحياتي

Yasser Hussein said...

A.SAMIR
انا فعلا شكلي هابطل آكل بيتزا وهاستبدلها بفطائر الجبن
:)

تحياتي

Yasser Hussein said...

امل عبد الحكيم
نصيحة لوجه الله سيبك من بيتزا كينج
أنا كنت زبون عنده لحد ما قدم لي بيتزا فواكة بحر غير ناضجه وغالبا عاملينها بزيت التموين
الكلام ده من أقل من شهر

خالص تحياتي