جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Thursday, May 22, 2008

كلام آخر شخبطة

الحليب
موجة الغلاء التي اجتاحت العالم وصلت الكويت مما جعل بعض أسعار السلع التي تباع في الجمعيات ترتفع ومنها الحليب ، وعندما تدخل الجمعيات في الكويت ليست مثل الجمعيات في مصر تتبع الحكومة وأنما هي عبارة عن مجموعة مساهمين ولها أسهم فتجد كل ما تريد من السلع المستورد منها والمحلي وتجد لوحة مكتوب عليها لمواجهة الغلاء اختار المنتج البديل ، يعني الناس بتعطيك الحل
بحثت عن بديل لنوع آخرمن الحليب الذي ارتفع سعره فوجدت علبة حليب لونها أحمر ومش هاقول أسمها علشان ميبقاش اعلان
وجدتها هي الارخص سعرا فى جميع الانواع المعروضة ، ثم عدت إلى المنزل وعادة أحب شرب الحليب بارد ثم بدأت أشرب واستطعم ولقيت طعمه طيب ومش بطال .. الله .. ده يمكن اطعم من الانواع الغالية .. قعدت أستطعم وأنا بيدور في ذهني الحليب اللي كان بيتباع للناس في مصر واللي اتضح أنه بودرة سيراميك .. وقعدت اقول لنفسي .. يا سلام .. الحمدلله أني باشرب حليب بجد مش بودرة سيراميك
وبعد ما بلبعت العلبة بحالها من كتر طعامتها قلت ابص اشوف ده صناعة ايه لقيت مكتوب على العلبة
Made in Egypt
...........................................
ست بـميت راجل
اعتاد امام المسجد الذي اصلي فيه الجمعة على القاء كلمة بعد انتهاء الصلاة استكمالا لموضوع خطبة الجمعة وكان موضوع هذه الخطبة معنى الرجولة ، وامام المسجد اسمه الشيخ مجدي رجل أحترم فكره لأنني اشعره انه ليس مجرد موظف في وزارة الاوقاف طالع يقول خطبة مدتها عشرين دقيقة منقولة من كتاب أو كاتبها في ورقة ولكنه رجل استشعر في الموضوعات التي يتكلم فيها أنه على فهم حقيقي لمفهوم الدعوة الاسلامية وانها ليست مجرد كلام في ان الفعل ده حلال والفعل ده حرام .. ولو عملت كذا هتخش النار ..إلخ
المهم الرجل تكلم على مفهوم الرجولة في الاسلام وفي اللفظ القرآني .. وأن هناك فرق بين الذكورة والرجولة
فالرجولة تعتمد على الفعل في المواقف الجادة وذكر بعد الصلاة في كلمته أن هناك بعض النساء يُعتمد عليهن ولهن مواقف جادة وتحترم وذكر عبارة: مش بيقولوا ست بميت راجل
عندها تذكرت ما قابلتهن بالفعل على مدار حياتي ووجدت ان هذه العبارة تنطبق عليهن
فعلى سبيل المثال لا الحصر أيام دراستي بالجامعة كانت الملخصات لجميع المواد النظرية اللي كنا بنصورها من بعض وبنذاكرها قبل الامتحانات كانت زميلة لنا هي التي تقوم بعملها وتلخيصها
بالذمة مش دي برضه تبقى ست بميت راجل
--------------------------
الغضب
من الصفات اللي ممكن تودي الواحد في داهية الغضب ، تعرضت لكذا موقف فقدت فيهم اعصابي ولولا ستر ربنا كنت اصبحت في خبر كان ، منذ سنوات وأنا سايق عربيتي في مصر وواقف في شارع جانبي في امان الله مستني الأخ اللي واقف بعربيته قدامي يتحرك أو يركن مش عارف له ، راح راجع بضهره بالعربية وراح حاكك عربيتي ، نزلت اقول له مش تاخد بالك ، وانا رايح عليه تقريبا البنت اللي قاعده جنب جنابه بتقول له ده جي لك ..عليا يعني ، فسمعته بيرد عليها فيما معناه انه مش فارقه معاه وراح سابب الدين ، أنا سمعت السب رحت ساحبه من قفاه من جوا العربية ، شوية والناس اتلمت وبعدتنا عن بعض .. أنا حبيت أطوله باي طريقة لأني كنت عايز اضربه لأن الدين ده مش بتاعه ده بتاع ربنا ومش من حق اي انسان أنه يسب الدين
المهم مطلتوش .. عربيتي من نوع الجيب ، رحت ناطط في العربية ومدورها وقلت لازم البس في عربيته .. جنان رسمي
وبالفعل جبت الفتيس ع الأول ودوست بنزين وهوب ... العربية بطلت
ليه ؟ نسيت انزل فرامل اليد
لقيت جد الشاب اللي كنت هأضربه ده جه يعتذر لي فاشتكيت له وقلت له ربوا ابنكم كويس ده بيسب الدين
وحمدت ربنا انه سترها معايا لأني لو كنت لبست في عربيته مكنتش اعرف كانت النتجة هتكون أيه
ساعات بقى وانا باتكلم في التليفون في موضوع ينرفز ملامح وشي بتتشقلب بشكل غريب
واحد صاحبي من مدة صور لي فيديو وأنا بأتكلم في التليفون وكنت متنرفز
الفيديو فيه مفاجأة غير متوقعة
لمشاهدة الفيديو اضغط هنا
:)
خالص تحياتي
تحديث : بناء على رغبة الجماهير تم رفع الفيديو على اليوتيوب حتى يتمكن الجميع من مشاهدته بسهولة


21 comments:

A.SAMIR said...

طبعا بداية مبروك عليك السيراميك المصري اللي انت شربته في الكويت
شوفت بقى الحليب السيراميكي طعمه بيبقى حلة ازاي؟
اما فيما يخص الستات اللي بميت راجل فدول بيبقوا هدية من ربنا
اما بالنسبة للغضب
الغضب حماااااقة يا حورية
مع الاعتذار لمحمد صبحي
تحياتي

ياسر سليم said...

انا سعيد جدا بالوصول الى مدونتك يا استاذ ياسر

واحب بس اعلق على موضو الحليب

ما حدش بيهرب من قدره :)

صاحب المضيفة said...

متفرقات جميلة ورقيقة


دمت بخير

ياسر حسين said...

A.SAMIR
أشكرك على تعليقك بس واضح جدا أنك متفرجتش ع الفيديو
:)

ياسر سليم
مرحبا بك في كارتونيا
صديق دائم ان شاء الله
انا زرت مدونتك
ثرية جدا بالصور الانفرادية
:)

صاحب المضيفة
أشكرك
:)

خالص تحياتي وشكري للجميع

نهى منير said...

فناننا الجميل
بالنسبة لموضوع الحليب
مش كل الحليب في مصر سيراميك
ومعروف من زمان ان مصر بتصدر انضف حاجة عندها
:)))))
بالنسبة لموضوع ست بميت راجل
فانا اشكرك على نظرتك لينا
واشكر الشيخ بتاع المسجد اللى مش طالع يرص كلمتين وخلاص
--------
موضوع الغضب بقى
أنا عصبية جدا
وكتير بيوقعنى ده فى مشاكل وبيزعل الناس منى
لكن انا قلبى ابيض
على فكرة الفيديو تحفة
ومش هاقول شفت ايه عشان محرقش المفاجأة
:))))))))))))
ملحوظة:
أنا غيرت اللنك بتاع السايت بتاع حضرتك بالعنوان الجديد
بــــــــــــــــــاى

ايوية said...

والله انا مبقول انك شربت سيراميك لان الانتاج الى بيتصدر بيكون غير الى بيقدموهولنا فى مصر لية تسال فى ذلك الحكومة الجليلة

ٍSOU said...

يا سيدى الفاضل احنا المصريين ,.زى القرع نمد لبر.. و اركرام الضيف واجب..يرضيك اننا نصدر حاجة كدة و لاكدة للدول الشقيقة ..دى حتى تبئى عيبة و احنا ناس نفهم فى الاصول كويس ..الضيوف نبعتلهم وش القفص... و اهل البيت يقرمشوا القفص

الفيديو تقيل فى التحميل لما ا شوفة هارد عليك ان شاء الله

Amy said...

الحليب السيراميك دا انتاج مصري للمصريين فقط لا غير. بيدعم ارضيات مفاهيمهم كويس.

طبعا معروف من زمان قوي ان مصر بتصدر احسن منتجاتها و تستورد اسوأ حاجة عشان يعملوا قرشين. منهم لله.

-----------------------
الفيديو لطيف. و رعبني شوسة :)

واحد من البلد دى said...

كان واجب عليك بعد ما قريت على العلبة الكلمة دى تشرب بعدها شوية أسمنت علشان السيراميك يثبت فى معدتك..
أما الستات بميت راجل أنا قابلت نماذج كتيييييير منهم..
ربنا يكرمهم جميعا..
أما الغضب بقى...إيه الفيديو التحفة ده..برافو عليك
تحياتى

ياسر حسين said...

نهى منير
أشكرك يا نهى على اهتمامك وتغيير اللنك بتاع موقعى
واشكرك على تعليقك اللطيف
:)

ايوية
هو أنا فاضي اسأل الحكومة
:)

ٍSOU
حلوة نظرية وش القفص دي
:)
أنا حملت الفيديو ع اليو تيوب علشان يبقى متاح للجميع

Amy
سلامتك م الرعب
مش قصدي أرعب حد والله
:)))

واحد من البلد دى
بقى يا راجل عايزني اسف أسمنت
أنت عارف طن الاسمنت بقى بكام
:)
أنا سعيد إن الفيديو عجبك

خالص تحياتي وشكري للجميع

FemTo said...

:) ايه حكاية تناسخ الارواح فى العالم التدوينى الايام ديه ههههههه شكلها موضة ولا ايه , انا كمان حعمل فيديو بقه :) بس ياريت الطريقة يا فنان

ياسر حسين said...

FemTo
تناسخ ارواح ايه يا مان
انا عمري ما قلت ان الفيديو ده عن تناسخ ا|لأرواح
على كده فيلم كده رضا بتاع أحمد حلمي
فيلم عفاريتي ع الآخر
:))))))))

خالص تحياتي

عاليا حليم said...

انا انا عارفة من زمان ان خير بلدنا بيروح برة مع الاسف مع الالم على راى عبد السلام النابلسى

-------

بالنسبة لسرعة الغضب شئ فظيع مأرق و دخيل و مكتسب منالعوامل الخارجية و ل ما ضغوط الحياة بتزيد كل ما العصبية بتزيد
انا عن نفسى مش لاقية للموضوع حل

تحياتى

ياسمين حميد said...

هذا الشيخ فعلاً راجل بمائة ست
يعني بعشرة ألف راجل
!!!
هههه

فيديو ظريف جداً، كيف عملته؟
لا تغضب، لاتغضب، لاتغضب
;-D

Anonymous said...

ما تبطل تقلد دكتور أشرف حمدي بقى
.. أكبر شوية
هاهاهاهاهاهاهاه

تامر حسين said...

تعلالي هنا هو احنا لينا اخ تالت ولا ايه
انت كده هتلخبطني اكتر منا متلخبط ههههههههه
تحياتي ولذيذ اوي الحوار ده بس لو عملته تاني بسيناريو روش اوك تحياتي

تامر حسين said...

تعلالي هناهو احنا لينا اخ تالت هربان بره مصر ولا ايه ههههههه
تحياتي

ياسر حسين said...

عاليا حليم
اشكرك على تعليقك
فعلا الغضب ناتج من ضغوط الحياة
ومن الزحام والغلاء وغيرها من الضغوط

ياسمين حميد
:)
بس ميصحش نقول كده على عالم جليل في الدين ولو من باب الطرافة
الفيلم معمول على برنامج ديجيتال مونتاج مشهور جدا
اسمه أدوب آفتر ايفيكت
اعتقد ان في ناس كتير بتعرف تشتغل عليه ومش صعب المهم توظفيه ازاي
:)

خالص تحياتي

ياسر حسين said...

Anonymous said...
ما تبطل تقلد دكتور أشرف حمدي بقى
.. أكبر شوية
هاهاهاهاهاهاهاه

تصدق وتؤمن بالله أنا كنت مستني تعليقك السمج ده من زمان
واشرف صديق عزيز ولو افترضنا جدلا وده مش صحيح أني باقلده
ده شيء لا يقلل من احترامنا المتبادل لبعض
أطلع أنت منها يا
(....)
واكبر أنت ومتلعبش مع الكبار

ياسر حسين said...

تامر حسين
متشكر يا تيمو على تعليقك
الفيديو ده كان قديم عندي بقى له شهرين تقريبا
بس لما عملت موقعي الرسمي الجديد
أضفت له تتر واضفته في قسم الفيديو عندي
ومكنش في دماغي الصراحة أعمل فيلم
ده مجرد مشهد كنت بأجرب فيه
امكانيات البرنامج
:)

اهو ده عيبه said...

اخيرا فى حاجه صنعت فى مصر طعمها حلو
اكيد اللبن ده غير اللى هنا خالص والا مكانوش سمحوا بدخوله البلد
-----------------------------
فعلا فى ستات بمية راجل لان الرجولة تصرف وحكمة وتحمل مسئولية
وفى الزمن ده كتير من الستات بقت مطرة تطون كده
--------------------------------
ربنا يقينا شر الغضب
لانه ممكن يدفع الانسان لفعل يندم عليه