جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Saturday, May 19, 2007

فلحوط و زقلوط 3


بعد أن انفعل فلحوط بسبب تصريحات زقلوط التلفزيونية و فجر جهاز التلفزيون بزجاجة الكاتشب ، وبعد أن آتته مكالمة من زقلوط قابلها بهدوء ومجاملة كالمعتاد ، قرر فلحوط أن يخرج خارج البيت ليريح أعصابه قليلاً ، فلم يجد أمامه سوى مقهى عيش .. حيث يجلس الأدباء الكبار والصغار أيضاً .. جلس على نفس الكرسي الذي كان يجلس عليه الكاتب الكبير كريم وظووظ وطلب فنجان قهوة سادة بُن محوج ، وهو جالس في أمان الله فجأة وجد أمامه زقلوط يدخل من باب المقهى ، وما أن شاهده جالس حتى أقدم عليه مبتسماً قائلاً : أستاذي فلحوط .. منور قهوة عيش .. فلحوط يبتسم ببرود وتصنع للأستاذيه ويقول : أهلاً .. أزيك يا أستاذ .. أخبارك أيه ؟ كويس؟ .. زقلوط يرد مبتسماً : أنا النهارده محظوظ فعلاً .. أبقى لسه مكلم سعادتك في التليفون من ساعة ألاقي نفسي قدامك.. يرد فلحوط : هون على نفسك .. أنت بتبالغ قوي يا زقلوط إحنا أصلا نعتبر جيل واحد .. دول كلهم 3 سنين تقريباً فرق في السن بينا .. زقلوط ضاحكاً : بس خبرتك سبقتني يا نجم وكتبك اللي ماليه السوق ..بالمناسبة أنت بتحب تيجي قهوة عيش كتير؟ .. يرد فلحوط : آه .. أصل القهوة اللي بيقدموها هنا مميزة جداً .. زقلوط : ايه المميز فيها يعني ؟
فلحوط : كل القهاوي بتقدم القهوة بوش هنا القهوة تحس إنها بوشين

23 comments:

bos bos said...

بجد حلقات مميزة منك جدا وكل حلقة ليها درس معين بنطلع بيه
وفعلا أسوأ حاجة الناس اللى تبقى بوشين شىء صعب قوى بس من الحاجات الكويسة أن الواحد يبقى عارف الناس دول على حقيقتهم علشان يعرف يتعامل معاهم كويس
تحياتى

مشمش said...

حلوة اوي الحلقة النهاردة بجانب معناها المهم انها تنفع نكتة حلوة

Rosa said...

جميله جدا
الدونه كلها جميله واسلوبها ذكي و بيوصل للقلب باسلوب خفيف
تحياتي
في انتظار المزيد
:)

ياسر حسين said...

bos bos
فعلا الناس اللي بوشين دول مشكلة
وينطبق عليهم المثل الشعبي القائل
في الوش مرايه وفي القفا سلايه

مشمش
مش هتعملي بقى مدونة عشان نبقى نزورك فيها
الحلقة دي فعلا نهايتها تنفع نكتة

Rosa
مرحباً بيكي في كارتونيا
وأنا سعيد بتقيمك الرقيق ده لمدونتي
في انتظار المزيد
من تعليقاتك وزياراتك

خالص تحياتي للجميع

semsem said...

حلوة بجد يا استاذ ياسر
انتظر الحلقه القادمه يا فنان

yamen said...

:)

جميلة جدا بجد

في انتظار الجديد يا استاذ يا عظيم يا رائع يا فنان يا....

(وشين برضه)

باهزر طبعا
:)

تحياتي يا فنان

Arabian GiRl said...

:)

ياسر حسين said...

semsem
كويس أنها عجبتك
أصل في ناس بتقول إنها مش مفهومة

yamen
ومن غير ما تهزر يا دكتور
أحياناً الواحد بيقع في الخطأ ده
من غير ما يحس وبيبالغ في المجاملة

Arabian GiRl
مرحباً بكي في كارتونيا
:) :) :)

خالص تحياتي للجميع

نهى منير said...

حقيقى يا استاذ ياسر
أنا باستنى من الحلقة للحلقة
أسلوب كتابة حضرتك
بسيط ومرح وبيقول حاجات كتير
فعلاً فى ناس كتير بوشين
ربنا يكفينا شرهم
ميرسى كتير ع البوست اللذيذ ده

بــــاى

تامر حسين said...

حلوه اوي قهوه بوشين دي نقد لازع هههههههه

Doba said...

أل مرة ليا فى دونتك.......واضح ان الكل بيحبك جدا وبيشكر فيك جدا جدا

هلف لفات فى المدونة ويمكن تلاقيلى ردود تانية....اتمنى سعة قلبك

صعب قوى الشخص اللى بوشين انا بيهنجلى مخى وبيخلينى مش قادرة اتعامل او افكر.....قدراته بتبقى اقوى من قدراتى

عندى بوست جديد يهمنى جدا ردكم عليه
هتنورونى طبعا

متنشوس ....عاوزة حقيقى رأيكم وبصراحة

سلامى.........هبة

شادي فايد said...

انت عارف يا فنان
مشكلة الحواديت دي ايه
انها طفولية شوية
وحاسس انك كاتبها لناس معينين
عشان هما بس اللي يقروها
لكنها مش اضفتلي اي شيء
ومش عجباني

وده رأيي اللي يارب مش يزعلك

خالص تحياتي

:)

ياسر حسين said...

نهى منير
العفو كتير على ميرسي كتير بتاعتك
هاهاهاهههه

تامر حسين
ما هو لازم النقد يبقى لاذع
كويس إنها عجبتك

Doba
مرحباً بيكي في كارتونيا
صديقة جديدة للمدونة
وشكراً على دعوتك ودعوة قراء مدونتي
لقراءة الموضوع الجديد
في مدونتك

خالص تحياتي للجميع

ياسر حسين said...

شادي فايد
انا سعيد جداً برأيك
ولو تلاحظ أنا عامل استبيان
عن الحلقات دي
إذا كنت أستمر في نشرها ولا لأ
وعلى ضوء النتيجة
هاستمر أو أتوقف
على فكرة .. لو في حد حاسس أنه مقصود بالحواديت الطفولية دي
المثل بيقول
اللي على راسه بطحه ...
خليه هو اللي يكمل
:)
خالص تحياتي

نهى منير said...

ولا يهمك يا أستاذ ياسر
إذا كان فى واحد حاسس أنه مخه كبير
وإن الحواديت دى طفوليه
فكل الناس وأنا منهم اللى سابوا كومنتات معجبين بيها
وعلى فكرة ده مش جديد ع الاستاذ شادى
قبل كده بعت لى كومنت خلانى اشيل البوست من أصله
ميرسى كتير يا استاذ ياسر
دى ضريبة نجاح البلوج بتاعك

باى

تامر حسين said...

هههههههههه الي علي راسه بطحه يملس عليها بقي ههههههههه

ياسر حسين said...

نهى منير
أشكرك على كلامك
بس أنا مع شادى أنه من حقه يقول رأيه
ومش شرط كل حاجة أعملها تعجب كل الناس
غير كده لو تلاحظي أنا مش عامل كنترول على التعليقات وعمري ما شيلت تعليق لحد إلا إذا كان مخالف لتوجه المدونة أو فيه لفظ خارج وده نادر أنه يحصل
اختلاف الرأي لا يفسد للود قضية
ومفيش داعي نزعل من بعض على أمور لا تستدعي الزعل

تامر حسين
أخي العزيز
كملت ليه المثل كده الناس هتفتكر إنك المقصود بالحواديت الطفولية دي
هاهاهاههههه

خالص تحياتي للجميع

تامر حسين said...

ههههههه عيب عليك انا بكملها للي مش عارف المثل مش اكتر يمكن الي علي راسه بطحه ده مبيعرفش في الامثله
هههههه تحياتي ليك
وياريت تبقي تبعتلي رساله خاصه علي المنتدي بتاعك يوميا عشان تطمني عليك عشان كل يوم بخش عليه الصبح
تحياتي ليك

ياسر حسين said...

تامر حسين
ولا يهمك يا أخي العزيز
بس المثل ده مشهووور جداً
خصوصاً إن المبطوحين كتروا
اليومين دول

هاهاهاههههه
خالص تحياتي

الفارس الوحيد said...

أيه الكلام الكبير ده يا فنان
قهوة عيش
وكريم وظووظ
هو فيه أيه بالظبط
بس حلوة القهوة ام وشين
فى انتظار الحلقة الرابعة
:D

وينكى said...

عسوووووووووووووووله
:)

ياسر حسين said...

الفارس الوحيد
أهلاً بيك
الحلقة الرابعة إن شاء الله
هيتم كتابتها بناء على الاستبيان
اللي عامله هنا بالمدونة
عن الحلقات

وينكي
أهو أنتي
:)

خالص تحياتي

ياسر حسين said...

اصدقائي الاعزاء
اصدقاء كارتونيا
بناء على الاستيبان الذي تم
حول هذه الحلقات
تقرر استمرار نشرها
حيث حصلت على 64% من الاصوات المؤيدة
وترقبوا صدورها أيضا
مطبوعة في كتاب أنيق

خالص تحياتي وشكري للجميع