جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Thursday, May 24, 2007

اللقاء الأول

هو يعمل معها في نفس المكان .. هو شايف نفسه حبتين .. كذب الكذبة وصدقها ..إنه واد مطقطق ومقطع السمكة وديلها .. هي فتاة مهذبة جدأ .. جميلة .. واسعة العينين .. بيضاء البشرة .. فارعة الطول .. متدينة
هو يراها لأول مرة فينجذب إليها ويهم بالحديث معها حين يراها تجلس أمام جهاز الكمبيوتر الخاص بها في العمل هي يلفت نظرها هو حيث يراقبها من بعيد وتستشعر أنه يريد أن يكلمها ولكنها تتظاهر بأنها مشغولة وأنه غير ملفت بالمرة
هو يجلس بجوارها ويسألها : أنتي من المنصورة؟
هي بحياء : هو فيه ايه؟ ليه يعني؟
هو باستعراض ورفع حواجب : أصل بنات المنصورة حلوين.. بيقولوا إن أعلى مهور في المنصورة ..صحيح الحكاية دي؟
هي تحدث نفسها : هو الجدع ده عايز ايه بالضبط؟ ثم تقول : عموما هابقى أسأل ماما لأنها من المنصورة
هو مبتهج ويغمره الشعور بالانتصار : شفتي .. مش قلت لك أنتي من المنصورة .. ههههه
لحظة سكوت
ينظر إلى أصابع يديها الجميلتين وهي تتحرك على أزرار الكي بورد كعازفة البيانو .. وفجأة يسألها
هو أنتي بتعزفي بيانو؟
هي بتعجب : وعرفتها منين دي كمان؟
هو باستظراف : باين من صوابعك
هي تحدث نفسها ثانية : الجدع ده شكله بيبصبص .. ثم ترد : أيوه .. أنا بأعزف أورج من أيام المدرسة
هو يغمره الشعور بالانتصار مرة أخرى لأنه شعر أن كل تكهناته وفراسته أصابت
هو يخرج من جيبه بحركة استعراضية الكارت الشخصي الخاص به ويقدمه إليها قائلاً
اتفضلي .. ده الكارت بتاعي فيه تليفوني .. ابقى خلينا نسمع صوتك
هي آخذت الكارت وقالت لنفسها : عشم ابليس في الجنة .. هو آي حد هديني كارت هاكلمه ولاأيه؟
ثم قالت : ميرسي .. ووضعت الكارت داخل حقيبتها
هو أنصرف من المكان وانتقل إلى مكان عمل آخر
هي لم تتصل به أبداً بالرغم من إعجابها به الغير معلن طبعاً
هو يقرر أن يتزوج هي .. ويتزوجها بالفعل .. عارفين ليه؟
من تعليقاتكم وردودي عليها هنعرف ليه
خالص تحياتي

35 comments:

ايوية said...

لو فكرنا بنظرة الرجل الشرقى اقدر اقولك انة اتجوزها لانها متصلتشى بية
ولو فكرنا بنظرة الانسانية والحب يبقى اتجوزها النة حبها وحس انها هية الى هتقدر تسعدة

semsem said...

طبعا على شان متصلتش بيه
وهو قرر ان تكون له باى طريقه
انت مش قلت انه مودبه وجميله ومتدينه
عاوز ايه تانى
وتلاقيها طلعت من المنصورة
ههههههههههه

نهى منير said...

هو يمكن شاف فيها فتاة أحلامه
وده اللى خلاه يتجوزها
منطقى طبعا

بـــاى

حــلم said...

تزوجها لأنه غير مكان عمله
لو كان استمر فى العمل لاكتشف فيها أكيد شىء لا يحبه
الاقتراب الشديد يولد التنافر أحيان كثيرة

Bella said...

اتجوزها لانها لم تتصل به

الانسان غريب جدا

ينجذب لمن يبتعد عنه او لايعيره انتباها

لو كانت اتصلت به واقترب منها لعرفها اكثر ولريما لم تعجبه

الممنوع مرغوب

والمجهول دائما مثير

بالإضافة لامر آخر وارجو الا تغضبوا

الرجال يحبون من تضحك عليهم

ههههههههههههه

يعني عدم اهتمامها به ربما اعتبره شدة أدب منها ولهذا قرر ان يكون الفارس الاول في حياتها

اما لو عبرت عن اعجابها فلربما اعتبرها اي كلام وقرر يطنشها او ينفض لها بلغة اليومين دول

ههههههههههههههه

ياسر حسين said...

ايوية
وليه ميكونش للسببين مع بعض؟

semsem
ممكن برضه .. ليه لأ

نهى منير
فتاة أحلامه!!هو لسه فيه حد بيحلم؟
:)

حلم
وجهة نظرك قوية
وتلفت الانتباه .. فعلاً عندك حق
الاقتراب الشديد يولد التنافر

Bella
يعني من الآخر
هو .. شرب المقلب .. واتخدع
صحيح .. التقل صنعة
:)

خالص تحياتي للجميع

A.SAMIR said...

علشان ماردتش عليه
سهلة خالص
بسيطة جدا
حسسته انها تقيلة رغم انها هتموت عليه
تحياتي ليك

bos bos said...

أتجوزها علشان شاف أنها ممكن تكون غير بنات كتير عرفهم وأداهم تليفونة وكلموة
شاف أنها مؤدبة ومحترمة وممكن تصونة
وكمان ممكن يكون لأنه حبها
تحياتى

bos bos said...

ندعوكم للمشاركة فى حملة المليون توقيع لنصرة الأقصى
الموضوع فى مدونتى

وينكى said...

بمنتهى البساطه
اتجوزها ...لأنها نصيبه

ياسر حسين said...

A.SAMIR
عندك حق .. الممنوع مرغوب

bos bos
كلام جميل .. كلام معقول
مقدرش أقول حاجة عنه

وينكى
أي حاجة نصيب .. إلا الزواج إختيار
وما يترتب عليه أقدار

خالص تحياتي للجميع

007 said...
This comment has been removed by the author.
•«ρяoιd»•™ said...

هو اتجوزها عشان من وجهة نظره اموره

هيتجوز لوحه جميله يعني

من غير ما يفهم مضمونها

الجواز ده حياه و مستقبل

و بدون تفاهم يبقي اكبر مشروع فاشل في الكون

مما لا شك فيه ان اول حاجه بتشدك لحد عنيك

بس برضه مما لا شك فيه ان في اختراع اسمه عقل

اما بقي بو هو عارفها كويس و حس انها فعلاً تحمل كل المواصفات اللي بيحلم بيها

و العكس طبعا

يبقي إن شاء الله هيبقي جواز ناجح

و الله اعلم

تحياتي

ياسر حسين said...

007
أشمعنى أنا يعني اللي أجاوب
ما تجاوب إنت
:)

•«ρяoιd»•™
عندك حق في كل كلامك
بس أنا مش بسأل عن الجواز ده هيبقى ناجح من عدمه
السؤال كان ليه اتجوزها هي بالذات ؟

خالص تحياتي

شيماء الجيزى said...

حبها

ببساطه

مواطظ مصرى said...
This comment has been removed by the author.
ياسر حسين said...

شيماء الجيزى
حبها من أول نظرة؟
مش سبب برضه
:)

مواطظ مصرى أو 007
القصة مش بتاقش هي قبلته ليه
القصة بتركز على هو إختارها ليه
هي بقى قبلته ليه
دي قصة تانية عايزه لها تدوينة تانية
:)

خالص تحياتي

مشمش said...

اتجوزها عشان حبها وعرفت تشدة ليها وحسستة انها غالية واخفت مشاعرها عنة ومتصلتش وكان ممكن يتجوزها لو اتصلت وكان هيحبها برضة بس مكانش هيحترمها اوي كدة بس كان هيتمني من جواة انها متتصلش بية

ياسر حسين said...

مشمش
وليه ميكونش شاف فيها مواصفات شكلية هو بيحبها
هناك قاعدة تقول
الرجل يحب بعينيه
والمرأة تعشق بأذنيها
يعني الراجل بيحب يشوف الجمال
والست بتحب تسمع الكلام الحلو

خالص تحياتي

أشرف حمدي said...

مبروك اللوجو الجديد المتميز للمدونة
تحياتي يا فنان

sabsoob said...

عشان ادته فوق دماغة في الأول..أو لقي اللي تهزمه
أو طمعان في البيانو
:D :D ....

ادم المصري said...

القصة اكثر من رائعه
.
.
مجرد وصفك للحظات لم تدم الثواني ولكن البراعه في النقل والتصوير هي الحرفية بعينها
.
.
لا يهمني كيف ولماذا تزوجوا بقد ما يهمني مدي الامتاع الحادث عند القرءة
.
.
لك تحياتي
والسلام

ياسر حسين said...

أشرف حمدي
الله يبارك فيك يافنان
وفي انتظار لوجو لمدونتك اكثر تميزاً
أنا أعلم أن في جعبتك الكثير
:)

sabsoob
هههههههههههههههههههههه
الا طمعان في البيانو دي كمان
اضحك الله سنك

ادم المصري
أشكرك على تقييمك الأنيق

خالص تحياتي للجميع

عمرو غريب said...

المدونة رائعة احيك عليها

tota said...

لأنه وجد فيها مايرضي غروره كرجل بلإضافه الي ان وصفك لها يكاد يكون خاليا من العيوب تكاد" هي" أن تكون كامله
ولكن أغلب الظن لاْنها تجاهلته والانسان عاده يحب ان يكون مرغوباً صارت اجمل في عينيه عندما لم يستطيع نيل اعجابها الواضح عندما تجاهلته ..."مجرد رأي"وبوست ذكي علي فكره احييك عليه سيدي الفاضل
سلامي ليك

ياسر حسين said...

عمرو غريب
اشكرك يا كابتن على كلامك الحلو
مدونتك أنت كمان حلوة
بس أنتقى الصور اللي جودتها أعلى

tota
مرحباً بيكي في كارتونيا
وأتمنى إنك تكوني صديقة دائمة للمدونة
تعليقك بيقول كلام كتير
وفعلا الانسان بينجذب إلى الشخص اللي بيمتنع عنه
الممنوع مرغوب
ولكن هذا لا ينفي أنها جذابة

خالص تحياتي للجميع

Doba said...

كل رجل ليه مواصفات محددة فى شريكة الحياة وكده برده البنت

لما عجبته جمع مميزاتها فكسبت السباق بتاع عقله + قلبه علشان كده حاذت على لقب زوجته وعن جدارة.

وزى مقلت ان الست بتعشق من اذنيها فهو عجبها ومدام لف ورجع تانى يعنى اختارها والست بتحب قوى لما تفوز لما تنصر بحياءها وتفوز بقلب رجل يستحقها

تحياتى........جميلة الحدوتة قوى
سلامى

Doba said...

المثل بيقول كل زير بيدور على غطاه لما بيلقاه

فهو دور لحد ملقى اللى تملى عنيه وقلبه وعقله

Dalia said...

اتجوزها عشان هى صوابعها جميله على الكي بورد
:))


لا بجد من غير هزار هو اتجوزها عشان هى ماتصلتش بيه

ياسر حسين said...

Doba
المثل اللى بيقول إن الراجل زير والست غطاه
يرادفه مثل إن الست حلة والراجل غطاها
:)
تعليقك مرح للغاية

Dalia
أنت فاكره إن كلامك هزار؟
فعلا في رجال بتعشق جمال أصابع المرأة
وده مش عيب أبداً
لأن المرأة مخلوق جميل
وفعلاً علشان متصلتش بيه
لأن الرجل بيحب البنت اللي يسعى إلى الوصول إليها
مش العكس

خالص تحياتي للجميع

أبو أمك said...

اتجوزها عشان كان مايسترو
وعازف الأورج بتاعه سافر بره, وكان بيدور على عازف أورج رخيص

ياسر حسين said...

أبو أمك
حلوة دي
ملعوبة

تحياتي

koukawy said...

اولا النصيب
ثانيا عشان كانت محترمه
و انا فهمت اللي انت تقصده من بين السطور
وصلت الرساله

ياسر حسين said...

koukawy
حقيقي من مميزاتك
ومميزات كوكو الكميل
قراءة ما بين السطور

خالص تحياتي

ahmedmyangel said...

اتجوزها عشان هوة تعبان قوى ولازم يتجوز بسرعة وكمان عشان من المنصورة



طبعا هتقول ايه الانسان السطحى اللى بيعلق ده

سلااااااام