جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Monday, June 25, 2007

!!! هو في أيه

يسعد صباحكم ومساكم اصدقائي الأعزاء .. امبارح حصل معايا موقف مش عارف اصنفه
هل هو موقف كوميدي ولا موقف ينرفز ولا ايه بالضبط؟
في المجلة اللي بأشتغل فيها بالخارج .. موظف إداري ..مصري الجنسية
قدم على استقالة بكامل ارادته وبدون اي ضغوط
وتم قبولها مع صرف كامل مستحقاته وعليهم بوسه .. المهم .. الموظف ده فاضل له
شهور قليلة ويمشي من المجلة ويمكن من البلد كلها .. بس العجيب أنه مصر على عمل مشاكل
واحتكاكات بالموظفين قبل ما يمشي .. عملاً بالمثل القائل : قال يا رايح كتر م الفضايح
والعجيب والغريب انه ساب كل الناس وجاي يعمل معايا مشكلة بالرغم أن شغلي بعيد عن مجال شغله تماماً
الموظف المذكور بيقول أنه سكرتير .. والمجلة بتقول لأ ده شغلته يكتب الموضوعات على الكمبيوتر
المهم لقيته بيكلمني بصيغة الأمر وبيقول لي : خد أكتب الموضوعات دي معايا .. خمس صفحات عايزينهم قبل الساعة اتنين..
رديت وقلت له أولا دي مش شغلتي .. ثانياً أنا مش فاضي .. أنا كمان عندي شغل مطلوب تسليمه قبل الساعة اتنين
المهم برطم وزعق وقال كلام كتير مالوش لازمه نتج عنه أني أنا كمان اتنرفزت وزعقت وقلت له .. يا بني آدم أنت بتعمل حاجة في المجلة غير أنك بتكتب الموضوعات .. أنا بأدخل صور سكانر وبارسم كاريكاتير .. وبأصمم جرافيك للمجلة
لو أنا عندي رسم كتير ممكن ترسمه أنت؟
تصوروا رد عليا وقال ايه؟ ... قال : أعتقد .. الموظف المذكور شايف إن الرسم اللي أنا بأرسمه حاجة سهلة وممكن هو يقوم بيها
المهم .. كل الهيصه دي تمت في غياب مدير التحرير .. وفور وصوله دخلت له المكتب وبشكل ودي وبصوت منخفض حكيت له الموقف
رد وقال : لا تضايق نفسك يا ياسر .. هو ماشي وعايز يسوي مشاكل .. لاترد عليه
ومن باكر لك غرفة وحدك بعيد عنه حتي لا يشوفك ولا تشوفه .. سبحان الله .. الله يسامحك يا بن بلدي .. الغريب يكرمني ويقدر شغلي .. وابن بلدي حاقد عليا وبيجر في شكلي ... ولكن سبحان الله .. لعله خير .. أهو الموقف أنقلب لصالحي وحصلت على غرفة مكتب لوحدي .. أعلق فيها رسوماتي وأمخمخ براحتي .. أغرب حاجة حصلت اليوم إن الموظف ده مشي بدري من الشغل وترك على مكتبه ورقة مكتوب عليها بخط كبير بالقلم الاسود الفلوماستر
حسبي الله ونعم الوكيل
تحديث
كانت خطبة الأمس الجمعة حول مرض قد تفشى بيننا وهو الغيبة
ولخوفي أن أكون قد وقعت في مثل هذا المحظور فأنا بصدد أن أوضح أنني لا أستنكر الشخص نفسه ولكنني أستنكر فعل متفشي بين بعض المصريين المغتربين بالخارج
و أول شيء فعلته اليوم أول ما رأيت الزميل صاحب هذه القصة .. ذهبت إليه والقيت عليه السلام وصافحته وقلت له : أوعى تزعل مني .. رد : أزعل منك ليه؟
قلت له يعني خلاص؟ .. قال لي خلاص
على فكرة أنا لا أدعي المثالية ولا أنا ملاك .. ولكنني أشعر بالضغط النفسي حينما أشعر أن هناك من يشعر بالضيق تجاهي وأنا لا أحب أن أكون مصدر ضيق لأي أحد
وأدعو له ولنفسي وللجميع بالهداية وراحة البال
واشكركم على تفاعلكم ومشاركتي في هذا الموقف الذي مررت به وأحمد الله أنه مر بسلام
خالص تحياتي وحبي للجميع

29 comments:

semsem said...

انا جيت الاول هههههههيه

يا فنان سيبك هو تلاقيه غيران منك بس

ولا يهمك منه

sabsoob said...

جري الشر يا عورة....
:D :D
و مبرووك عي المكتب ;)

تامر حسين said...

ينفع كده سمسم لحقت تقعد جنب الشباك
مبروك يعم علي المكتب الجديد
عقبالي لما امشي من الشركه خالص وافتحلي شركه خاصه بيا
ومن الواضح انه انسان معقد علي فكره بس سيبك المهم انت عامل ايه ؟
تحياتي
انا مش شايفك عندي يعني

Egyptiana Trapped Soul said...

اولا مبروك على المكتب الجديد، ربنا بيسبب الاسباب

انما الفكرة هنا فعلا هو تصرفات وسلوك المصريين مع اقرانهم فى البلاد الغريبة، يبصوا لبعض بقرف، يتعاملوا مع بعض بتحفظ وساعات بخبث ومكر، والسؤال هو ليه

على رأى المثل اجرى يا بنى ادم جرى الوحوش غير رزقك لن تحوش

ممكن اطلب منط طلب
ممكن ترسم ساحرة طيبة وتعلقها عشان اى حد يزعلك تسخطة قرد!!!

Doba said...

مبروك عالمكتب الجدي ومستنيين تفانين جديدة وحلوة - مليش دعوة يا عم انا عاوزة اقعد جنب الشباك زى تامر

ممكن تعمل البلوج كله شبابيك علشان نخلص ونقيم الأفراح والليالى الملاح بمناسبة فوز الأستاذ المبجل ياسر وحصوله على غرفة ومكتب بمفرده فى شركة تيكلملم لولولولولولولى

تحياتى يا أستاذ وبالنسبة لبتاع المشاكل هو ربنا كان حاطه مجرد سبب فى طريقك علشان يوصلك للمكتب الجديد

سلاموز وإلى لقاء قريب مع شخبوطة جديدة ورهيبة - هبة

Anonymous said...

صباح الفل يا عم ياسر
تصدق احنا لينا الجنة والله
اصل انا عارفه انسان يجب الضغط
دا ياما قرف اهلي لحد ماكنت هطلع من هدومي
يالله ربنا يسهلوا
وعلى رأي المثل
اصبر على جار السو
يايرحل ياتجيله مصيبة تاخده
ومبروك على المكتب يا زعيم
وحسبي الله ونعم الوكيل في كل بياع مقرف
;)

تامر حسين said...

صحيح بما انك بقالك مكتب بقي مش عاوز سكرتير
هههههه
تحياتي

Unknown said...

المهم انك اخدت مكتب لوحدك
على فكرة دة مشكلة بتواجه مصريين كتير لما بيكونوا بيشتغلوا فى شركات او اماكن اصحابها مش مصريين او دول عربية بدل منقف جنب بعض لا بيحاولوا انهم يعملوا مشاكل لبعض ودة بيخلى صورتنا وحشة جدا
ربنا يهدى

Anonymous said...

اول الف مبروك علي المكتب الجديد ثانيا ممكن يكون الانسان دة حصلة حاجة وحشة تخلية يعمل كدة او انة حاسس انة مظلوم يمكن وصلني الاحساس دة من الورقة الي كتبها بس لو كان هو دة طبعة يبقي انسان غبي جدا والحمد لله ان ربنا بعدك عنة وكمان طلعت انت الكسبان وربنا معاك ويوقفلك ولاد الحلال دايما ولاد بلدك باة او اغراب مش مهم كل مكان فية الكويس والوحش
تحياتي ومبروك المكتب الجديد

Anonymous said...

اولا 1000 مبروك على المكتب
ثانيا فى مثل بيقول عدوك بن كارك و للاسف بقى الحال عدوك بن بلدك و دى مش اول مره اسمع موقف زى ده دول كتير
كنت متخيله ان فى السفر بيكون ولاد البلد الواحد جنب بعض زى الاهل بس دائما بيكون عكس كده
سيبك منه و خاليك فى حياتك و ابداعك و خليك احسن منه و عامله كويس يمكن يكون مظلوم و متضايق من الدنيا كلها و جت فيك المره دى
some one

شيماء الجيزى said...

تعرف يا استاذ ياسر

حسيت انه بيعمل زى الى عليا وعلى اعدائى
رغم انه بكامل إرادته

لكن يمكن هو حس باضطهاد
او ممكن يكون ...مش عارفه اقول
عقدة يمكن؟

..............

على العموم لعلها خير
واديك فوزت بمكتب خاص بحضرتك
فى احسن من كده؟

تحياتى لاستاذى العزيز

Alaa said...

حضرة الفنان الكارتوني الجميل
محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

Unknown said...

thank you for the kind words on my blog. Theres alot of strenght in your designs and I look forward in the next batch Yasser!

Yasser Hussein said...

semsem
المشكلة ان مجال شغلنا مختلف تماما
بس هو اللي الظاهر عنده مشاكل نفسية

sabsoob
أنا مش فاهم المثل .. ده لو كان مثل
بس الله يبارك فيكي

تامر حسين
أتمنى لك يا أخي العزيز كل الخير وتفتح لك سلسلة شركات مش شركة واحدة
وأنا بالفعل متجاهل الشخص ده تماماً

Miss Egyptiana "Trapped Soul"
لذيذة قوي حكاية الساحرة اللي هتسخطه قرد
:)

Doba
تعليقك لطيف ومرح .. فعلا ربنا كان حاطه سبب مش اكتر

أحمد الحسيني
صباح الجمال يا جميل
كويس أنك عرفته .. حاكم دقات النقص بتاعته مسمعه عند الكل
ربنا يزيح عننا الناس المنفسنة
:)

ايوية
وأي صورة وحشة
إحنا الجنسية الوحيدة اللي مع الاسف بتحب تطلع عقدها على بعضها خارج .. وداخل الوطن
يبدو اننا كلنا تربيتنا غلط
كان المفروض نتربى على اننا نحب بعض مش نقهر بعض

مشمش
الشخص ده له سوابق في مواضيع الحقد دي كتير .. ده غير أنه قدم استقالته قبل كده 3 مرات والناس هنا عشان عندهم احساس بالشفقة عليه وخصوصا انه مبيعرفش يعمل حاجة غير اللي بيعمله هنا .. وأنه لو نزل مصر مش هيلاقي اللي يشغله الا بقى اذا فتح له دكان ولا مطعم
كانوا بيرفضوا استقالته .. او بمعنى اصح مش بيمشهوها له
لحد ما زهقوا منه ومن عمايله
تخيلي شخص قاعد بيراقب الناس
فلان بيقبض كام .. وفلان بيصرف قد أيه
بالله عليكي ده يبقى شخص طبيعي

some one
مظلوم ايه يا بنتي
ده بقى له في الخليج اكتر من 15 سنة
مابين السعودية والكويت
وأهله تجار في مصر
هو بس اللي مش قنوع وعنده مركب نفسي أجمع عليه جميع الزملاء

شيماء الجيزى
الظاهر انه متأثر بالادب اليهودي
وقصة شمشون ودليله
عليا وعلى اعدائي ويهد المعبد على دماغه هو أن شاء الله
كفايه انه لما يمشي محدش هيفتكره بالخير

علاء
عزيزي أنا لا أؤيد أي تجمع
لأنه بداية النهاية لأي شيء جميل
كم من المشروعات بدأت بنوايا حسنة
وتحولت بعد ذلك إلى صراعات حول المناصب
والمادة .. فلو تم عمل تجمع للمدونين بالتالي لابد من انتخاب رئيس لهذا التجمع .. والباقي معروف

GhettoFab
thanx my friend
u r welcome

خالص تحياتي للجميع

Unknown said...

سبحان الله تلاقي كل المغتربين يقولولك في مصريين في الغربة بيبقوا عاوزين الحرق
سبحان الله
ولا يهمك هو مش ماشي وانت خدت الأوضة خلاص؟
ابسط بقا ياسيدي ولا يهمك

feeling said...

اكيد تصرفاته غريبة
هوا يمكن ندم على استقالتة ودا سبب تصرفاته يحاول يستفز اي احد وبما انك ولد بلده .. الاقربون اولا
عارف انا ملاحظة شىءاغرب من تصرفات زميلك
...........
إن العرب المغتربين
يحاولو يبتعدو عن بعض خاصتة اذا كانو
من نفس البلد عكس المتوقع تمامآ
سبحان الله
...........
مبروك على المكتب

أشرف حمدي said...

مبروك المكتب الجديد

حاجة تغيظ بجد خاصة اننا بنحب قوي نعمل مشاكل قدام الغريب
أمال لو كان في مصر كان عمل ايه ؟

Anonymous said...

معلهش يا استاذ ياسر
هما كده الناس الحقودة موجودين فى كل مكان
كان ليا رأى فى موقع حضرتك الرسمى
مع احترامى للمصمم
بس واضح أنه مبتدىء أعتقد إن فيه أحسن من كده خاصة إنه موقع لفنان
لو تحب حضرتك أنا ليا اصحاب ممكن تخدم فى الموضوع ده ومجانا
لكن مدونة حضرتك والمواقع التانية ممتازة
أسف للاطاله

Yasser Hussein said...

fanan fa2eer
مع الأسف فيه بعض النماذج السيئة بتشوه صورتنا بالخارج بس هذا لا يمنه أني قابلت مصريين كتير محترمين ووقفوا بجانبي وقفات في منتهى الرجولة

feeling
مرحبا بك في كارتونيا
أعتقد أن سبب الابتعاد في الغربة يرجع إلى تكويننا النفسي الناتج عن تربيتنا على عمل الفرد الواحد لا العمل الجماعي
نحن نفتقد روح الجماعة .. فلا يوجد عندنا ما يسمى فريق عمل بشكل حقيقي

الفنان اشرف حمدي
الله يبارك فيك
لحسن حظ الشخص ده أنه مش في مصر وإلا كان شاف مني ما لا يسره
أنا لم اصعد الموقف وأكتفيت بالسكوت والرجوع إلى المدير المباشر بهدوء حتى لا يقال عنا همجيين أو نصبح مصدر للسخرية
ولكن في مصر .. كنت اتصرفت معاه بأسلوب الشبراوية
أنا من شبرا يا جدعان
:)

picsawy
مرحباً بك في كارتونيا
مصمم موقعي هو صديق محترف
ولكن الاذواق بتختلف
من وجهة نظرك أنه مبتدىء
ولكن هناك من يرى أنه مبتكر ومميز
بالنسبة لجميع مفاتيح الموقع عندي والهيدر فهي من تصميمي
أما بالنسبة للبرمجة وتحميل الموقع ع الشبكة فأنا أعتبره حتى الآن في غطار التجريب
اهتمامي حالياً منصب على المدونة لأنها أسهل فى التحديث وافضل في التواصل مع الجمهور
خاصة بعد أن اكتشفت أن جميع فناني الكارتون على مستوى العالم لهم مدونات على البلوجر
واصبح الموقع الرسمي شبه روتيني

خالص تحياتي وشكري للجميع

مدونة كسبان said...

فى كل مكان هتلاقيه
فى الشارع فى الأتوبيس
بره مصر
جوه مصر
فى المكتب
فى الشغل
تصدق ان بعض
الشخصيات اللى من النوع ده
بيصعبوا عليا
مش ممكن ابدا واحد طبيعى يحاول بكل طاقته انه يكره الناس فيه بالشكل ده

احسن حاجه فى الدنيا ان انت تعمل مش واخد بالك
خصوصا مع الناس دى

Yasser Hussein said...

عزيزي كسبان
ده اللي بالفعل انا باعمله
باحاول اتجاهله بشتى الطرق حتى ولو حاول يتصنع مشكلات
نسأل الله أن يهديه
ويهدينا جميعا لما هو فيه الخير

خالص تحياتي

همسات دافئه said...

ههههه
وكمان بيحسبن عليك بالخط الأسود العريض يالا أهو مشى هنيالك ياعم المكتب
:)))

Anonymous said...

بره بلدك ماتخافش الا من ابن بلدك
حكمه الكل عارفها من قديم الازل
لكن انا سعيده انها جت لصالحك فى النهايه

Yasser Hussein said...

واحدة من الناس
الأخ لسه قاعد .. ماشي أول أكتوبر
ومازال بيحاول مضايقتي حتي وقت كتابتي لهذه السطور .. أنا باشك أنه مريض نفسياً ..ربنا يشفيه

وينكي
والله الحكمة دي كنت بأسمعها من زمان وكنت باحاول أتناساها لأني قابلت ناس محترمين كتير بره ووقفوا معايا وقفات أخوية كتير
لكن مع السف كما يوجد الأسوياء يوجد الغير اسوياء
وحسبي الله ونعم الوكيل

koukawy said...

بسمع كتير ان المصريين وحشين مع بعض في الغربه مش عارفه ليه ؟؟؟؟

moneer said...

على فكرة هما المصريين كده فى الخارج دايما بيكرهوا بعض و مش بيتمنوا الخير لبعض
تصور ده الاتراك فى اسكندرية كلهم يعرفوا بعض و ميسيبوش فرصة للتجمع الا و تلاقيهم كلهم متجميعين مع بعض و عارفين بعض كلهم و قيس على كده باقية الجاليات الاجنبية فى مصر
يمكن المصرى ما بيصدق يطلع بره فيلاقى مصرى تانى هيقول هما ورايا ورايا
ولا ايه؟

تحياتى

Yasser Hussein said...

koukawy
مش كل المصريين وحشين مع بعض في الغربة
أنا شخصياً قابلت من ضمن عشرين واحد كويس تلاقي واحد أو أتنين بالكتير وحشين
لكن مع الاسف الحسنة بتخص والسيئة بتعم

moneer
كل الجاليات الاجنبية في كل العالم تلاقيها متكاتفة ومترابطة
حتى النوبيين اللي بيعتبروا نفسهم مش مصريين بالرغم من أنهم بيحملوا جواز السفر المصري
تلاقيهم متكاتفين مادياً ومعنوياً خارج مصر
ولكن مشكلتنا اننا تم تربيتنا كلنا على النجاح الفردي
ولا نعمل بروح الجماعة
لذلك اللي بيسافر وبينجح بره لو قابل ابن بلده بره بيبقى مستكتر عليه انه ينجح مثله
الا من رحم ربي من عباد الله الاسوياء نفسياً
ومرحباً بك في كارتونيا

خالص تحياتي للجميع

S H A H said...

ده حالالمصريين مع بعض مرة ياياسر

الغريب, انك تلاقي الجالية الهندية او حتى المصرية النوبية اللبنانية

قلوبهم على بعض, و يشيلو بعض, الا احنا اللي منا جديد كأنه جي ياخد مكاني

Yasser Hussein said...

S H A H
أكيد إحنا المصريين بنعاني من بعض الأمراض النفسية الجماعية
منا من استطاع أن يقاومها ويعدل من نفسه
ومنا من أستسلم واصبحت في طباعه
الشخصية

خالص تحياتي