جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, July 1, 2007

اساليب متنوعة

ازيكم يا جماعة ... وحشتوني جدًا
من المتعارف عليه أو الشائع إن رسام الكارتون أو الكاريكاتير بيكون له أسلوب أو ستايل معين في الرسم بيميزه عن أقرانه من الفنانين ... ولكن اليوم لما اطلقت للقلم الرصاص العنان وقعدت أشخبط كعادتي أكتشفت إن جوا دماغ الواحد أكتر من ستايل قد يكون تأثر بيه أو يكون نابع من داخله وده اللي ظهر في الاسكتش اللي فوق ده ... رسمت شوية حاجات .. وشوش .. زجاجة .. كلب .. حاجات طبعًا ملهاش علاقة ببعض ولكنها اترسمت بأكثر من أسلوب مختلف في الرسم
أسيبكم مع الشخبوطة دي واتمنى أن تنال اعجابكم .. وتسعدني جميع الآراء
تحديث
لاحظت من خلال تعليقات الأصدقاء أنهم لم يصل إليهم المقصود بالاستيلات المختلفة في الرسم .. وهذا طبيعي لأنه مصطلح متخصص إلى حد كبير، الاستيلات المختلفة في الرسم على سبيل المثال : الرسم الكارتوني مثل ما نراه في افلام الرسوم المتحركة ، الرسم الكاريكاتيري المبالغ فيه مثل ما نراه أحياناً في الصحف، الرسم التعبيري القريب الشكل من الطبيعي دون اي مبالغات ونراه ايضاً في الصحف وعلى أغلفة الكتب والمعارض التشكيلية ...إلخ
و يا جماعة لو الصورة مش واضحة أو حجمها صغير ممكن تضغطوا عليها هتكبر بالقدر اللي يتيح لكم مشاهدتها بشكل جيد

18 comments:

Unknown said...

اول مرة ابقى الاولى

شخابيط هايلة كلعادة استاذ بس لية السيدة حزينة كدة
فعلا الانسان بيختزن جواة اشياء كتير بتطلع فى رسمة فى كلمة فى تصرف او حركة فاختلاف الاسنيلات الى جواك من كتر المخزون الانسانى الى بتقابلة ومن المعارف والخبرات المختلفة
تحياتى

شيماء الجيزى said...

فعلا
اكتر من استايل...وبصراحه انا اسمع من خبراتى القليله والتى هى من خلال حضرتك
ان فنان الرسام وخصوصا الكاريكاتير انه لازم يتميز باسلوب معين
يتعرف من الصورة انها ...لفلان الفلانى

واعتقد ان حضرتك فعلا بتتميز باسلوب معين

واعتقد ان بالشخابيط دى
بتنمى لدى حضرتك نظريات لاستيلات مختلفه

بس ليا سؤال
هل يستطيع الفنان تغيير استايله من وقت لاخر
ولا لازم يتثبت على استايل

تحياتى استاذى

semsem said...

استاذى العزيز
انا شايفه ان الرسم كله يتمتع بروح واحده
ودا احلى حاجه فيها
لكل منا عده اساليب فعلا ولكن الشخصيه تظهر فى الرسم
يعنى ممكن انا ارسم جاف ورصاص وحاجات مختلفه بس لما اشوفها اعرف دى بتاعه مين
وهذة ما هو ظاهر فى الرسم
شخابيط رائعه
ونتمنى المزيد
شخبط يا فنان ولا يهمك
تحياتى

Hassan Laithy said...

وبرغم انهم مش باكثر من اسلوب ولا حاجة إلا انهم كويسين .. تحياتى

همسات دافئه said...

واو رائع ايه المدونه التحفه ده أنا عاشقه للفن ده ما شاء الله خطوطك جميله رغم انى مفهمتش ايه الى فى الزجاجه بس أكتر حاجه عجبتنى الراجل أبو شنب مش عارفه ليه:))
يالا عشان ألحق أقرأحاجات تانيه:)

Yasser Hussein said...

ايوية
إن شا الله دوما تبقي الأولى

شيماء الجيزى
مفيش رسام بيقعد ويقول أنا هأعمل أسلوب .. مع الممارسة بيصبح لكل فنان اسلوبه الخاص وخطوطه المميزة
أما بالنسبة للاستايلات المختلفة
فمن الممكن أن يتنقل الفنان فيما بينها
فهناك الستايل الكارتوني
وهناك الكاريكاتوري المبالغ فيه
وهناك ما يحاكي الطبيعة وهو رسم تسجيلي ... إلخ

semsem
عندك حق .. الروح واحدة لأن الرسام واحد
أما الاساليب فهي متنوعة
أحيكي على دقة التعليق

Hassan
بالرغم من أنهم بالفعل باكثر من اسلوب
إلا أني أحترم رؤيتك للرسم
وارحب بيك في كارتونيا

واحدة من الناس
أنا مش راسم حاجة في الزجاجة
أنا اللي يهمني الشكل الخارجي للزجاجة
ومرحباً بيكي في كارتونيا

خالص تحياتي وشكري للجميع

تامر حسين said...

جميل الرسم يا فنان بس القفا ده اان شفته قبل كده
ممممممممممممممممممممممممممممممممممممممممممممممممممممم
تحياتي

Anonymous said...

رسمك لذيذ ومتمكن بشكل كبير
بس انا حاسه ان كل رسوماتك ليها طابع مميز ليك انت لوحدك
يعنى ممكن لو شفت الكاريكاتير ده فى اى مجله هاقول دا كاريكاتير استاذ ياسر
لانه مميز
تحياتى واسفه على التأخير
انا ماعنديش نت فى البيت

مدونة كسبان said...

جميل او ى ياأستاذ ياسر والله
ولكن لأنى مش فنان ولا حاجه
مقدرش احدد هل هما من استايل واحد
ولا اكتر من استايل
علشان مش عارف بالضبط ايه جوانب الإستايل اللى حضرتك بتتكلم عليها
لكن بنظره عامه على شخابيطك
فهى شخابيط فنية جميلة جده
وياريت كل الشخبطه كده

sabsoob said...

عاجبني الكلب جداًًًًاًاًأًاً
جميل أوي ما شاء الله
تحياتي

Anonymous said...

انا رايي ان الفنان لازم يكون لية استايل يميزة عن باقي الفنانين ممكن كمان يكون سبب شهرتة ونجاحة بس مفيش مانع انة يعمل نيو لوك مادام جواة طاقة فنية لسة مطلعتش يعني ميخليش حاجة تقيدة يقول الي في نفسة يعني امال هيكون فنان ازاي

ta5areef said...

ازيك يا استاذ ياسر
اخبارك ايه
مدونة هايلة بجد
موضوع الاستايلات ده احنا منفهمش فيه زيك برضه
احنا يادوب شوية احاسيس خفيفة لسه محافظة ع نفسها من الزمن

ta5areef said...

بمناسبة الاعلانين اللى انت حاططهم فى المدونة
معناهم انك فى الكويت
بس مش عارف ازاى تعلن لشركتين متنافسين
وياترى بتاخد فلوس ع الاعلانات دى
لو ايوه قولى الله يكرمك
سلام يا استاذ

Yasser Hussein said...

تامر حسين
القفاوات قد تتشابه احياناً
:)

وينكي
طابع الرسومات الواحد ده شيء طبيعي لأن الرسام واحد .. بالنسبة للاستيالات أو القوالب فقد وضحتها في تحديث للموضوع .. ومفيش تاخير ولا حاجة أنا عارف عدم وجود النت في البيت مش بيتيح للواحد التواصل بشكل سهل

كسبان
اشكرك يا عزيزي .. أنا وضحت معنى الاستيالات بشكل مبسط في تحديث للموضوع
وأنا سعيد أن شخابيطي بتعجبك

sabsoob
فعلا صورة الكلب مرحة وده استايل كارتوني مثل ما نراه في أفلام الرسوم المتحركة

مشمش
فينك بقالك مده مختفية
عموماً التنقل بين الاساليب المختلفة للرسم هو شيء ممتع بالنسبة للفنان ولو انتج رسومات جيدة بالتالي بتكون ممتعة للمشاهد

تخاريف دكتور
مرحباً بك في كارتونيا
مش مطلوب منك أنك تفهم في موضوع الاستايلات .. كل الحكاية أني بأحاول أوصل بعض المصطلحات الدارجة عندنا كعاملين في مجال الكايكاتير والكارتون بشكل مبسط بحيث يستمتع المشاهد أكثر بما يراه حينما يعلم عنه أكثر

بالنسبة لسؤالك التالي
مش عارف ازاي تعلن لشركتين متنافستين؟
الإجابة
شيء عادي جداً فالتلفزيون وجميع القنوات الفضائية تعلن لجميع الشركات المتنافسة جنباً إلى جنب

أما بقى حكاية معنى الاعلانين أني في الكويت .. وبآخد فلوس ع الاعلانات دي ولا لأ؟
فأنا بالفعل مقيم بالكويت منذ سنوان
وحكاية بآخد فلوس أو مش بآخد دي
لاتعليق
:)

خالص تحياتي للجميع

Hassan Laithy said...

برغم انك وضحت يعنى ايه استيلات مختلفة إلا إنى باردو مش شايفها فى الرسومات دى وانها كلها قريبة من بعضها .. تحياتى

koukawy said...

لأ واضح مش بس الستالي واضح الخطوط المختلفه بين الرسومات
معلرف ان كان تعبيري متخصص و هتفهمه و لا لأ بس انا قصدي ان احساسي ان مسكة القلم في كل رسمه بتتغير و ده اللي بيدي استايل او شكل مختلف للخط و بالتالي بيعكس الاختلاف علي الرسمه
مش عارفه صح و لا لأ

Yasser Hussein said...

koukawy
بيعجبني فيكي تذوقك للفنون بشكل عام
وبيعجبني اكثر أني بأشعر إن اللي باقصده بيوصل لك وتعليقك مهما كان متخصص او غير متخصص بأفهم منه انك فاهمة كويس جداً
:)

خالص تحياتي

ANN said...

لا على فكرة هى واضحة جدآآآآآآ
من غير ما نكبرها
بس ما شاء الله عليك
دى شخبطة
امال لما ترسم عادى باتقان تبقى ايه
على فكرة انا عينى مش مدورة