جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, July 15, 2007

شعب اللحظة الأخيرة

شعب اللحظة الأخيرة .. هذا المصطلح أستعرته من صديق لي أسمه أحمد فاروق .. حينما وجدني منهمك في إنهاء جميع أعمالي قبل قيامي بأجازتي .. فوجدني قد أجلت إنجاز أعمالي لآخر لحظة .. فقال لي أنه طبع شعبنا .. شعب اللحظة الأخيرة .. ننتظر لآخر وقت قبل الامتحان ونذاكر .. ننتظر لآخر وقت لتسليم الشغل ونتزنق ونشتغل .. م الآخر لازم نزنق نفسنا علشان ننجز عملنا .. في الحقيقة أنا حاولت كتير أقاوم الحكاية دي .. والحمدلله بقيت أنجز شغلي قبل ميعاد تسليمه بيوم أو يومين علشان ابقى في الأمان .. حالياً أنا فعلاً مشغول جداً .. عندي شغل كتير مطلوب مني تسليمه قبل قيامي بالاجازة وسفري ... وعلى فكرة هو مش كتير بسبب إن اللي طالبين الشغل ناس كتير ..لأ .. هو كتير لأن اللي بيطلب شخص واحد و بيحب يطلب كتير .. ويا سلام لو يدفع كتير .. هأكون مبسوط كتير .. الخلاصة يا شباب حاولوا تتخلصوا من آفة تأجيل آداء أعمالكم لآخر لحظة .. حتى لا نكون شعب اللحظة الأخيرة

16 comments:

Anonymous said...

انا اول تعليق هيييييييييييييييييييييييييييه
انا و لله الحمد ما عنديش المشكله دى ابدا و لا اقدر اجازف بانهاء اى شىء فى اخر وقت لكن تقريبا كل الى حوليا كده مع ان دى حاجه تجيب انهيار عصبى و تطلع الشغل مش متقن و تفضل قلقان و تلف حوالين نفسك على ايه....!!!!
بالنسبه لعمرو خالد مش فكرة اختلاف بس فكرة تفضيل يعنى مش مفضل لدى
some one

Unknown said...

فكرتنى بالمسرحية الجميلة ال خمسة كان فيها تعليق فعلا ينطبق على كلامك اننا دايما بنيجى وخمسة لو مرة بس جينا الاخمسة

Masria said...

أنا أحب أجل اللي عليا على قد ما اقدر .. على اساس ليه أأجل عمل اليوم إلى الغد لما ممكن أأجله ل بعد الغد
:)
هى بتبقى مشكلة في المذاكرة .. ف باحاول اغيرها .. بس تقدر تقول الطبع بيغلب التطبع
:)

محمد زكى عبد الرحمن said...

صحيح يا أخى الواحد فى الكلية يقعد يتدلع طول السنة و يداكر آخر أسبوع .. وحتى الأسبوع دة بتبقى المداكرة فيه أى كلام .. ما عدا آخر يومين طبعًا !-
أنا أعرف واحد صاحبى كان بيأجل المداكرة لدرجة إنه كان فى اليوم اللى قبل الامتحان كان يصحى م النوم و يأجل المداكرة لبالليل !!-

نهى منير said...

حكاية إن الواحد يعمل الحاجة فى آخر لحظة دى عند ناس كتير وأنا منهم
مش عارفه ليه؟
بس أنا لاحظت إن الواحد لما بينضغط ممكن ينجز
بس الحكاية دى مش مضمونة
خصوصا قبل دخول الامتحان
بوست لذيذ يا استاذ ياسر
وصورتك دى عسوله خالص
كلها فن
بــــاى

Doba said...

كنت البداية بعمل كده وده سببلى مشاكل كتير فى شغلى غير انى كنت دايما عندى احساس بأنى مقصرة فى حاجت كتير وبقضى وقتى بملل لأنى ورايا حاجات لازم كده او كده هعملها

عملت وقفة قوية مع نفسى وقلت كل حاجة اخلصها اول بأول وظبطت شغلى جدا الحمد لله وكذلك برده كل حاجة متعلقة بأمور المنزل

وسبحان الله لقيت ان عندى وقت كبييييييير قوى ممكن اقضيه فى منتهى السعادة والاستمتاع الحقيقى - احساس جميل ان الواحد ميبقاش وراه حاجة ويقوم عامل فنجان قهوة ويمسكله كتاب ويقعد مع نفسه لفترة

تحياتى يا افندم -- هبة

أشرف حمدي said...

أعطنا مما اعطاك الله
أقصد فلوس طبعا مش شغل :) ههههه
احنا شعب يحب الأنتخة
انا كمان برسم الكاريكاتير اليومي في آخر لحظة قبل ميعاد نشره بنص ساعة !

Mirage said...

انا مرة كنت شغال مع واحد اجنبى
كان بيقوللى ان انت لازم تسيب يوم احتياطى كده لاى خازوق طارق

بس احنا بعادتنا المصريين شعب يحب النوم فى الغيط

semsem said...

متالق دائما يا فنان
ايه البوست الرائع ده

بجد احنا فعلا عندنا ازمه اللحظه الاخيرة
بس الحمد لله بنخلص فى المعاد وبدرجه اممتياز

بوست هايل

تحياتى يا فنان

Yasser Hussein said...

some one
أحيكي على سلوكك المنضبط

ايوية
وخمسة بس .. قولي بعدها بساعة .. ساعتين

Masria
لا يا بنتي حاولي تغيري الحكاية دي أحسن خطر .. خصوصاً أيام الامتحانات

محمد زكى عبد الرحمن
أهلا بيك يا أخي..الفنان
يا ريت تنصح صاحبك يحاول يغير من نفسه
أحسن كده ممكن يغرق

نهى منير
حمدلله ع السلامة
وشكراً على مجاملتك الرقيقة

Doba
فعلا ياهبة الواحد لما بيخلص شغله بدري بيفوق وبيبقى عنده وقت يستمتع بالحياة

الفنان أشرف حمدي
الأنتخة إختراع مصري صميم
وبرافو عليك انك بتنجز شغلك في وقت مش كبير كده
الشغل اليومي مش سهل بالمرة

Mirage
تحياتي للأجنبي صاحب نصيحة الخازوق

semsem
متشكر يا فنانة
بعض ما عندكم

خالص تحياتي وشكري للجميع

Anonymous said...

صدقنى مش هاينفع
هاتلى طالب ممكن يذاكر قبل الامتحان بمده
هو احنا كده لازن نتزنق وناخد على دماغنا عشان نشتغل
افتكر لما كنت فى المسرح كان الوقت كله بيضيع فى اللعب وبنيجى لحد يوم العرض نفسه ونبتدى نفوق
ولحد ما تدخل اللجنه والجمهور نكون لسه بنخلص فى حاجات وحاجات لسه ماتعملتش
بتبقى هيصه

Yasser Hussein said...

وينكي
لازم نتزنق عشان لازم نذاكر عشان لازم ننجح
واديكي نجحتي اهوه
مبرووووووووووك

خالص تحياتي

koukawy said...

بقك بينقط عبر الحقيقه

ANN said...

انا عن نفسى بحس انى لما بعمل حاجتى قبل الميعاد بكام يوم بحس انها عادية ومش مهمة
لكن لما بقعد قبل الحاجة بيوم واعملها بأحس بأهميتها ومش ببقى فاضية خالص
بس بصراحة بحس بمتعة اكتر

BaSsMa said...

انا اعتقد اني أكثر وحدة بعاني من المشكلة دي
:(
بس تعرف اعمل الحاجة في آخر لحظة ده يعتبر انجاز مش احسن من اني ماعملهاش خالص
اصل الكسل ده حبيبي

Anonymous said...

أرجو الي يعرف ايميل الفنان محمد سعد او طريقة التواصل معه ان يرسله لي
لاني حابه اعطي محمد سعد بعض الملاحظات من جمهورة في الامارات والخليجي

uae.lady2007@gmail.com

أمل
الإمارات