جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, July 8, 2007

زباااااالة

عودة للشخبطة .. طبعاً كلكم عارفين ده يطلع ايه؟ .. وخصوصاً متابعي توم وجيري ... وشارع السمسم سابقاً وعالم سمسم حالياً
ده ولا مؤاخذة صندوق الزبالة بتاع بلاد بره .. تلاقوه شكله شيك جداً .. فضي اللون .. له غطاء محكم .. يوجد أمام المنازل
معندهمش بره زبال شايل على ظهره "زمبيل" ..أيوه ما القفه اللي بيشيلها الزبال على ظهره ويطلع وينزل بيها العشر أدوار دي أسمها زمبيل
المهم .. وبدون ما حد يتهمني أن عندي عقدة الخواجة .. الناس بتوع بلاد بره دول يا جدعان بيهتموا بالجماليات قوي حتى في شكل صندوق الزبالة
يوماً ما تم اسناد لم زبالة العاصمة القاهرة العامرة لشركة أجنبية .. والشركة الأجنبية كتر خيرها جابت صناديق بلاستيك شكلها مش بطال و زرعتها في الشوارع عشان الناس الطيبين يرموا زبالتهم فيها .. بعد ما أصبحت فلوس الزبالة بتتلم مع وصل الكهرباء .. ما علينا
الناس بقت ترمي زبالتها برضه خارج الصناديق .. والأدهى من ذلك الناس الحلوين بتوع محلات عصير القصب اللي مليان ميكروبات من التلج ابو دبان .. بدل ما بقوا يشيلوا المصاصة بتاعة القصب عن طريق عربية نص نقل زي ما كانوا بيعملوا سابقاً .. بقوا يرموها في الصناديق الشيك دي .. فبالتالي الصناديق بتتملي .. والناس الطيبين اللي نفسهم يرموا زبالتهم جوا الصناديق اللي بيتخصم ثمنها من جيوبهم مش لاقين مكان فاضي في الصناديق .. فبيرموا الزبالة حوالين الصناديق .. وزعازيع القصب لا تسمح للغطاء المخصص للصناديق بالاغلاق
يا ريت الناس تهتم بالنظافة وتساعد الناس اللي نفسها تبقى نظيفة وتبقى النظافة مش للمظهر الخارجي فقط لصندوق الزبالة

14 comments:

Unknown said...

للاسف كنت اسمع ان زمان كانت شوارع القاهرة بتتغسل بليل دلوقتى شوف الحال
المستفيد الوحيد فى موضوع الزبالة دة هو القطط تلاقى كل قطة قد الفيل من كتر الاكل
ياريت فعلا نحاول نخلى المكان الى بنعيش فية جميل ياريت

BaSsMa said...

ياصديقي لا حياة لمن تنادي

وأشكرك على سؤالك عني كلك ذوق
انا بخير الحمدلله
:)
بس مشغولة الفترة دي بدراستي وبمشاكلها
تقدر تقول بمر بمرحلة حاسمة للتخطيط للمستقبل
ادعيلي ارسالي على بر حلو كده ويكون بيطل على النيل
:)
وربنا يوفقنا جميعا
دمت بخير

semsem said...

هههههههههههه
احدث صايحه فى صناديق القمامه
اللى متعلقه على اعمدة فى الشوارع
جمياه جدا
بي احلى حاجه انك تيجى ترمى فيهتا حاجه تلاقيها وقعت من تحت

تحياى يافنان

koukawy said...

بالنسبه ان الصندوق شكله حلو .. كانت مامتي طول عمرها ان حاجات و ادوات النضافه لازم تبقي شكلها حلو و نضيفه امال ازاي هيبقي اسمها ادوات نضافه
اهن ده نفس الفكره الاهتمام بنضافة الشئ مهمه
انما انا مش معاك خالص انك تحمل الناس اعباء فوق اعبائهم و تخليهم يهتموا بالنضافه لأ انت كده يا كارتونيا بيه طلباتنك زادت
و ده اسمه كلام برضو انت بتطلب النضافه من شعب روجه في القرف و الزباله
ده انا لما بشيل ورقة البسكويت اللي بكله في السارع في شنطتي الناس بتتريق عليا تخيل ؟؟؟؟؟

Yasser Hussein said...

ايوية
الناس بتحب النظافة بس عايزه اللي يشجعها
:)

BaSsMa
حمدلله على سلامتك
وربنا يوفقك في دراستك
وعندي أمل أن الشوارع تصبح اكثر نظافة

semsem
مش آخر صيحة ولا حاجة
ده في كمان صناديق شكلها زي ما تكون خابطها بلدوزر
الناس بتنتقم من الزبالة ولا أيه؟

koukawy
لو الواحد ماشي في شارع نظيف هيستحي يرمي ورقة في الأرض
ولكن لو ماشي في شارع مليان زبالة
هيقول لنفسه ..يعني جت عليا أنا
أهوه .. يروح رامي الورقة هو كمان
لكن تعليقك يؤكد فكرة كانت بتدور جوا دماغي
إن النظافة شيء نابع من داخل الانسان
وحتى لو ماشي في شارع مليان زبالة
ممكن ميرميش ورقة البسكويت في الأرض ويحطها في الشنطة
ولو كره الحاقدون ...تحياتي ليكي

خالص تحياتي وشكري للجميع

تامر حسين said...

والله عندك حق بس كان نفسي بقي تشوف الحادث الي حصل في المقطم وفي شارع 9 بالتحديد
سيده لبست في صندوق زباله بعربيتها الميه سبعه وعشرين وكان جنبها طفلها الصغير بسبب ميكروباص زنق عليها علي الطريق ده بجانب ان صناديق الزباله موجود مش علي الرصيف لا بالعكس دي كانت في الشارع وعلي الجانب الشمال كمان وربنا يسهل واحاول اجيب الصوره بتاعته
بجد احنا في عصر الكفته
تحياتي وربنا يلطف بينا

شيماء الجيزى said...

ياريت

نتمنى ده

بس معتقدش...

تحياتى

Yasser Hussein said...

تامر حسين
مع الأسف بتم وضع صناديق القمامة الضخمة دي بشكل عشوائي
أنا شخصياً لبست في واحدة منهم بعربيتي
وفي انتظار الصورة اللي ذكرتها

شيماء الجيزي
خليكي متفائلة

خالص تحياتي

Anonymous said...

انا عايزة اقول ان الله جميل يحب الجمال وصفاء النفس ورقي المشاعر لازم يجي بمناظر جميلة ونظيفة تريح العين والاعصاب وبجد النظيف نظيف جابو صناديق مجابوش هيتصرف ويدور علي صندوق ويحط زبالتة فيها ولازم نبدا بنفسنا مش نستني شركات تنظفنا ولو مشو ورا كل مواطن واحد ماسك لية بسكت زبالة برضة الي مش نظيف هيرمي الزبالة في الشارع
ملحوظة لما بشتري عصير او حاجة حلوة بفضل ماسكة العلبة او الورقة لحد ما بلاقي بسكت ولو مش لقيت بحطها في شنطتي لحد مااروح وارميها في البسكت الي في البيت مع انها بتكون مزعجة شوية بس انا ببدا بنفسي زي ناس قليلين وياريت يكترو
تحياتي

Anonymous said...

افتكر مره كانت عندنا سلة زباله كبيره شكلها شيك قوى جتلنا من بره
وكنا سايبينها للزبال عشان ياخد منها الزباله
عارف ايه اللى حصل؟؟؟
الزبال طمع فيها وسرقها من قدام الباب
وعجبى

koukawy said...

اه ما هو موضوع هي جت عليا انا ده هيخلي الزباله اضعاف اضعاف
و انا فاكره بوستايه كننت كتباها زمان من اول البوستات بتاعتي
بعنوان .. فاشون في الزباله
هتلاقيها في شهر يناير في اوله لو تحب تقراها
كانت بتتكلم عن نفس الموضوع

Yasser Hussein said...

مشمش
برافو عليكي يا ما الواحد عمل الحكاية دي وساعات كنت أحط ورقة البسكويت في جيوبي لحد ما الاقى سلة .. ده لو لقيتها
:)

وينكى
واحد صاحب والدي عايش في ايطاليا
لما نزل اجازة في مصر حط الزبالة في كيس مخصص لكده جايبه من بره
الزبال خبط ع الباب وكان هيتخانق معاه
افتكره بيسخر منه عشان حاطط الزبالة في كيس نظيف

koukawy
إن شاء الله أقرأ البوست اللي عندك

شكراً وخالص تحياتي للجميع

Anonymous said...

بجدآ أنا من رأيك لكن لما بقول زيك كده بيتهمونى أنى بتاعت مظاهر و شكليات

و قولوا لى المهم فائدة الحاجة مش مهم شكلها أيه

ولما أطلب من حد أن مش يرمى حاجة فى الشارع بيعاملونى على أنى مجنونه أو شخصية مش طبيعة

لكن أنا مصممه أن المظهر الحضارى مهم

______________

و على فكره فى ناس بيكونوا مقروفين من صناديق الزباله آللى فى الشارع لأنها بتكون قزره جدآ

:(

ANN said...

يا فنان يعنى هى جت على الزبالة
اساسا بلدنا دى ما فيهاش حاجة بتتحط فى مكانها اللى خلة البنى ادمين مش محطوطة فى مكانها يبقى الزبالة هتتحط فى مكانها