جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, July 8, 2007

لماذا يهاجمون محمد سعد ؟؟

محمد سعد الشهير باللمبي نجد عليه دوماً هجوم علي اي عمل يقدمه .. متهمين اياه بالاسفاف واصراره على تقديم دور العبيط وأنه يكرر نفسه .. سواء كان في شخصية اللمبي أو عوكل أو بوحه أو كتكوت وأخيراً كركر .. متناسيين تماماً أن هناك في تاريخ السينما بعض الأسماء اللامعة والتي نعتبرها الآن رموز من رموز الكوميديا في السينما المصرية كانت تقدم دور العبيط وايضاً كانت تكرر نفسها باستمرار وربما على مدار تاريخها السينمائي لم تغير اسلوب الآداء او الشكل الخارجي لشخصيتها وعلى سبيل المثال
النجم عبد السلام النابلسي .. شاهدت كاريكاتير قديم عن عبد السلام النابلسي في مجلة روزاليوسف وهو يتحدث في التليفون محدثاً أحد المخرجين قائلاً : مفيش داعي تبعت السيناريو بتاع الفيلم لأن أدواري كلها زي بعضها ..
نستشف من هنا ان حتى عبد السلام النابلسي الذي نحبه جميعاً ونضحك على أدواره ونمجده كان في وقت ظهوره ولمعانه منتقد ومتهم بالتكرار وعدم التجديد



النجم اسماعيل يس .. على مر تاريخه السينمائي الطويل وكم الأفلام الهائل الذي قام بتمثيلها مابين أدوار السنيد وبين البطولات المطلقة إلا أنني قرأت أن اسماعيل يس كان قد انتهى كظاهرة فنية قبل وفاته ولولا وجود التلفزيون واذاعة افلامه باستمرار ما كان عرفه احد من الأجيال الحالية ... ومما لا شك فيه أن اسماعيل يس كان يؤدي دوماً دور العبيط ذو الحركات المفتعلة في الكلام والأكل والمشي وعلى مر تاريخه في التمثيل لم يغيرمن اسلوب آداءه ولا من شكله الخارجي بالمكياج إلا نادراً ما كان يلصق شارب وهنا نرى صور اسماعيل يس منذ ان ظهر إلى ما قبل رحيله بفترة قليلة .. لم يتغير شكله ولا حركاته

نعود لمحمد سعد .. نعم هو يؤدي دور العبيط .. ولكن في كل فيلم تجده نمط مختلف من العبط .. عبيط ولكن في الحركات فقط .. لأنه في كل فيلم لا نجده صايع او بلطجي بشكل مطلق .. ففي فيلم اللمبي .. نجده يريد ان يكون انسان نافع فيساعد أمه لعمل مشروع لتأجير الدراجات للسياح الأجانب فتواجهه شرطة السياحة وتوقفه .. ثم يعود ليخرج عربة الكبدة التي كان والده يعمل عليها حتى يستطيع أن يوفر مصاريف الزواج فتواجهه البلدية وتأخذها منه .. إلخ ..إذن اللمبي ليس بلطجي ولا صايع بشكل مطلق .. ده شخص عقله على قده وبيحاول يعيش زي الناس


في الجزء الثاني من اللمبي .. اللي بالي بالك .. يحاول استرداد حقه المنهوب من عمه .. فيتسبب عمه في دخوله للسجن .. وباقي الاحداث معروف لمن شاهد الفيلم ..عندما اخذ مكان مأمور السجن تصرف برجولة وشهامة تجاه أسرته وتجاه السجين الهارب والضابط المرتشي .. إذن فالفيلم ليس تافه ولا عبيط ... فيلمه عوكل .. عوكل ليس صايع ولا بلطجي ولا حرامي ... عوكل سمكري سيارات وبيحب التمثيل .. شخصية ممكن تقابلها في الشارع .. محمد سعد هنا غير في الشكل الخارجي للشخصية من حيث تسريحة الشعر وشكل الشارب .. وطريقة الكلام ايضاً مختلفة .. يتورط في هذا الفيلم مع عصابة تهريب ماس وتخرج كاميرا المخرج إلى تركيا .. عوكل يستغل حرفته في اعادة تصليح سيارة والدة حبيبته .. ويقوم بعمل مشروع سمكرة سيارات في تركيا .. أرجع واقول يعني مش عبيط ولا اهبل ولا صايع ولا بلطجي .. ولا ننسى آداءه الرائع لشخصية جدته اطاطا .. فكثير من الناس ظن أنها شخصية اخرى غير محمد سعد لولا انهم وجدوا اسم الماكيير الأجنبي في تتر المقدمة ..
فيلم بوحه .. رجل له حق يبحث عنه في القاهرة .. ويعمل جزار .. ويعمل كمرشد للشرطة حتى يساعدهم في القبض على شخص فاسد ... في هذا الفيلم أيضاً نجد شكل خارجي مختلف وطريقة آداء وأسلوب كلام مختلف
الشكل يعطي انطباع كافلامه السابقة أنه عبيط .. ولكنه عبيط مختلف .. بنكهة مختلفة
فيلم كتكوت .. نجده الصعيدي الهارب من الثأر .. الذي يتم تجهيزه فيما بعد ليحل محل العميل الفاسد يوسف خوري .. هذه الحبكة تذكرنا بفيلم اخطر رجل في العالم للنجم الراحل فؤاد المهندس .. وتذكرنا بالفيلم الهندي دون الذي قام ببطولته النجم الهندي اميتاب بتشان في اوائل الثمانينيات واعاده النجم الهندي شاه رخ خان في عام 2006 ، ولكننا نرى محمد سعد في شخصيتين مختلفتين .. وشخصية كتكوت .. العبط بنكهة مختلفة عن أفلامه السابقة .. والآن يوجد فيلم كركر ومن الاعلانات التي رايتها له في التلفزيون استطيع أن أقول أنه دور عبط جديد باسلوب عبط مختلف .. ولكن ما قصة الفيلم ؟ حتى الان لم اشاهده .. ولكنني لست مع الهجوم على محمد سعد لأنه لو كان متهم بتقديم ادوار العبط فقد سبقه اسماعيل يس .. وإن كنت ارى أنه يتميز عن اسماعيل يس بتنوع أداءه وتنوعه في تغيير الشكل الخارجي ولنا حديث آخر عن محمد سعد بعد مشاهدتي لفيلم كركر

تحديث

فوجئت بمحمد سعد يقلد طريقة كلام وصوت الداعية الاسلامي عمرو خالد في البرومو الخاص بفيلم كركر ، وهذا شىء غير مقبول أخلاقياً ، فالسخرية من شخصية مثل عمرو خالد أو غيره ليس من مكارم الأخلاق ، اما المفاجأة الثانية والتي أكدت ملاحظتي هذا الخبر .. وهو أن هناك محامي رفع قضية لوقف الفيلم لسخريته من عمرو خالد .. الفنان محمد سعد .. إن كنت متعمد تقليد عمرو خالد فأنا وغيري لسنا سعداء بذلك .. عمرو خالد ليس من التابوهات .. ولكنه شخص محترم ويدعو إلى الاصلاح في مجتمعاتنا العربية

ولا يستحق السخرية حتى وإن كنت تراه كممثل أنه كراكتر ممكن تجسيد طريقته في الكلام وصوته في فيلم كوميدي

لقراءة الخبر أضغط هنا

33 comments:

semsem said...

انا جيت الاول

محمد سعد
فى الحلو وفى الوحش

koukawy said...

احييك علي كلامك لأن في ناس بتهاجم لمجرد الهجوم و بس مش بسبب
و انا معاك
و انا من الناس اللي بتحب اطاطا موتتتتت

Unknown said...
This comment has been removed by the author.
Masria said...

بوست هايل .. تصور أنا أول مرة اشوف محمد سعد بالطريقة دي .. عندك حق .. كان في غيره كتير .. و لازال .. اشمعنى هو يعني .. و بعدين ما هو افلامه بتجيب فلوس .. يعني الناس بتحبه
:)
تحياتي

مدونة كسبان said...

أحترم رأيك ياياسر بيه
وأحييك على تحليلك للموضوع تحليل دقبق ومنظم
وأحترم رأى كل الناس اللى علقت قبلى
ولكن
عمرها ماكانت دى الكوميديا
حضرتك بتقارن محمد سعد بعبد السلام النابلسى واسماعيل ياسين
أعذرنى فالمقارنة غير منطقية

هل حضرتك ممكن تتفرج على فيلم لمحمد سعد بعد 40 سنه؟؟؟

ممكن تتفرج على فيلم من أفلام محمد سعد أكتر من 10 مرات؟؟


هل ممكن حضرتك تدخل بعد 40 سنه محل فيديو فيلم بيبيع سيديهات علشان تشترى فيلم اللمبى ولا بوحه؟؟؟


هل ممكن ابن ابنك وا بن بنتك أو العكس هيتفرجوا على فيلم لمحمد سعد بعد حوالى كده 50 سنه؟؟


بيحصل ايوه بيحصل...كل يوم أفلام لإسماعيل ياسين وعبد السلام النابلسى وأفلام من 40 سنه الشباب بيسمعها
الأطفال .الكبار
ولسا بنضحك واحنا بنسمعها
بتضحك انت كمان؟؟

ياياسر بيه ده انت بتبقى حفظت عبد السلام النابلسى هيقول ايه من كتر تكرار مشاهدة الفيلم وبتضحك تانى برضه


أقول لك الناس بتضحك ليه على أفلام محمد سعد؟؟
الناس بتضحك عليه..ايوه بجد
مش بتضحك على الموقف
وبيضحكوا على الموجود
ماهو ده الموجود هو فيه غيره؟؟

أقول لك الناس بتنزل من بيتها علشان تروح السينما ليه
علشان يغيروا جو..وأهو أحسن من أى مكان تانى النور طافى وناس بتمثل وقاعد فى التكييف واهو تغيير


أنا مش غاوى مهاجمة خلق الله ..ولا محمد سعد مثلا ادالى ميعاد ومجاش
ولا حتى من أعداء النجاح

أنا بس بيصعب عليا لما تحط واحد زى عبد السلام النابلسى ولا اسماعيل ياسين فى مفارنه مع محمد سعد

كوميديا ايه ياياسر بيه؟؟

ممكن حضرتك تجيب لى فنانه دلوفتى ممكن تخليك تضحك أو حتى تعيط

انا لسا مدمع من كام يوم من فيلم بقاله سنييييييين
واتفرجت عليه 500 مره
وياسى دى فى لقطة رومانسية فى فيلم
فى بيتنا رجل

حرااااااام عليك بجد


هات أى شاب جان دلوقتى زى عمر الشريف فى شبابه وفى أفلامه


لو سمحت تدلنى على أى ممثله دلوقتى فى رقة فاتن حمامه

طاب فين الكوميديا النسائيه؟؟
هو فيه اى ممثله بتخليك تضحك

بتقارن نجوم الكوميديا والناس اللى ممتتش بقالهم 60 سنه بمحمد سعد

انا هكتفى بقى بالكلام ده..انا طولت شويه فى الكلام بس ده كلام جوايه ولازم أقوله طالما انت اتكلمت عليه
ممكن يكون كلام ميعجبكش
أو ميعجبش بعض الناس
لكنه وجهة نظرى

خالص تحياتى

Yasser Hussein said...

semsem
وأيه الجديد يا فنانه
كل بني آدم فيه الحلو وفيه الوحش
:)

koukawy
على فكرة اي واحد من اللي بيهاجم محمد سعد لو جت له الفرصة أنه يطلع كومبارس في فيلم من أفلامه ..هيروح جري وبدون مقابل
:)

Yasser Hussein said...

أبو لهب
يا عزيزي أنا بأتكلم ع السينما
تدخلنا في الانفتاح والليبرالية
:)
بس على فكرة افلام محمد سعد فيها فكرة
ورمز .. واللي يدقق هيعرف إنها مليانة اسقاطات

Masria
الناس عندنا بتحب تنقد أي حاجة
أي حد قاعد ع القهوة تلاقيه يتكلم في الفن والكورة والسياسة والاقتصاد وتحس أنه ممكن يقوم من ع القهوة يروح يمسك منصب وزير ..أو يحكم البلد
الناس اللي بتنتقد محمد سعد
تلاقيهم أكتر ناس بتضحك على أفلامه

كسبان
محمد سعد يتفوق بقدراته كممثل على اسماعيل يس وعبدالسلام النابلسي
والدليل .. نجاحه في آداء أدوار أخرى متنوعة منها الشرير ومنها التراجيدي .. اسماعيل يس لم ينوع في طريقة الآداء ولا عبد السلام النابلسي
وإن كنا بنضحك عليهم حتى الآن
فمن باب العشرة .. وإلحاح التلفزيون في تكرار عرض أفلامهم بأستمرار
فيلم عوكل شاهدته أكثر من 30 مرة على إحدى القنوات الخاصة التي تعرض الفيلم لمدة شهر متواصل 3 مرات يومياً أو يزيد
ولم امل منه بل في كل مرة أشاهده أكتشف فيه فقرات مضحكة لم الاحظها من قبل
حالياً أنا لا ابحث عن ديفيهات لأفلام اسماعيل يس لأني حفظته وحفظت حركاته
ولكنى ممكن ابحث عن أفلام محمد سعد لأنه في كل فيلم مختلف حتى ولو كان بيؤدي دور العبيط
فآداءه في كل فيلم مختلف عن الآخر
والسنوات القادمة هي التي سوف تحكم
على مدى نجاح واستمرارية محمد سعد

خالص تحياتي وشكري للجميع

تامر حسين said...

انا عن نفسي بموت فيه
وعلي فكره لو عمل فيلم درامه هينجح جدا وانا متأكد
واكبر دليل في فيلم الي بالي بالك ساعه لما قال لحسن حسني
انت بعت نفسك عشان تعرف تعيش وانا هموت واعرف انا مين
في اخر الفيلم
لو تتذكرو اللقطه دي
هتعرفو ان فعلا مؤثر ويعرف يعمل مشاهد مؤثره
وعلي فكره اخي العزيز ياسر حسين
النجم الهندي شاه رخ خان في عام
اسمه شاه روخ خان
تحياتي الاخويه

Anonymous said...

انا عن نفسي شايفة انة ناجح نجاح باهر وهو مش بيكرر نفسي هو ممكن بيدوس علي امكانيات معينة عندة ميقدرش غيرة انة يعملها ودة لوحدة نجاح وشايفة فية كمان انة لما بيمثل مشهد جد ومؤثر بينسيني تماما انة دة الي كان بيتكلم من دقيقة بصورة مختلفة تماما انا افتكر لية مشهد في اللمبي لما قالة اثبت ان انا مش انا وقلب تعبير وشة تماما في نفس اللحظة ورفع شفتة وبقي رياض بية
افتكر دة مش تكرار وامكانيات جامدة جدا انة يتحول بسرعة كدة من شخصية حاسمة وجادة لمجرم وبلطجي
هو النقد دايما ملازم للنجاح ودليل علية ولو مكنش ناجح مكنش حد هيبصلة ولا هينقدة ومدام لقي نفسة في الادوار دي يبقي نجح انة يكتشف نفسة وللناس لان محمد سعد بيمثل من زمان ومكانش مشهور الا لما ادي النوع الكوميدي دة
انا بحبة جدا وبيموتني من الضحك وهموت واشوف فيلم كركر

Anonymous said...

أشكر الفنان ياسر حسين على أهتمامه بالكلام عنى وعن أعمالى وأنا طبعاً مع كل الناس اللى قالت أن مفيش وجه مقارنة بينى وبين عمالقة زى اسماعيل يس وعبدالسلام النابلسى دول ناس رواد وأنا لسه باشق طريقى وشىء جميل لما فنان فى مجال تانى غير مجالنا يتابعنا ويكتب عننا وده لاحظته من خلال كتاباته عن خالد الصاوى لأنى عرفت طريق المدونة دى من تعليق لك فى مدونة خالد
أشكرك مرة تانية واشكر كل الشباب اللى علقوا سواء بالسلب أو الايجاب
محمد سعد

شيماء الجيزى said...

حضرتك عرضت ادوار محمد سعد فى شكل جميل جدا
عايزة اقول ان محمد سعد له فكر فى ادواره زى محضرتك وضحت

انا عايزة بس اسأل اذا كانت ادوار محمد سعد فاشله

ليه دلوقت فى سنوات قليله بيتنافس مع النجم عادل امام

وليه كل هذا الكم من الناس بتستنى انها تضحك مع افلامه

مش شئ تافه
بس شئ مميز اكيد

تحياتى

Unknown said...

محمد سعد بيتهاجم عشان أفلامه نظيفة رجعية يعنى خالية من الأبداع هو فيييييييين و أبداع عادل أمام فييييييييين

voice of love said...

سواء اختلفنا مع أعمال محمد سعد أو اتفقنا معها
مما لا شك فيه انه عنده موهبة
بس أنا بطمع فى استغلالها فى أدوار أفضل لأنه يقدر يقدم الأجود والأفضل
انا عجبنى جدا تقييمك ليه ولأفلامه
بس ياريت يقلل من موضوع الرقص ده فى أفلامه لأنى شايفة انه بيقلل من موهبته اللى المفروض يحافظ عليها أكتر من كده ويستغلها فى أدوار أهم من كده
يعنى مثلا الناس هتفضل فاكرة للسقا فيلم مافيا
ولكريم فيلم واحد من الناس
ولحلمى فيلم سهر الليالى
ولمنى أيام السادات وسهر الليالى والقتل اللذيذ واضحك الصورة تطلع حلوة
ياريت نفتكر محمد سعد بنفس القدر من الأهمية لأنه يتمتع بموهبة ولكنه لم يحسن استغلالها بشكل كافى حتى الآن
تحياتى واحتراماتى

سعيد انحراف said...

اول مشكلة في محمد سعد انه لما طلع في فيلم الناظر بشخصية اللمبي و معاه احمد و علاء و غيرهم من النجوم الكبار كان متألق لوجود روح الفريق في الفيلم، لكن لما ابتدت شخصية اللمبي تخش في قصة الانتاج بتاع السبكي و هوه انتاج الفيلم لمجرد بيع اللحمة بقت الشخصية لا مؤاخذة بتاعة ناس مساطيل عايزين يتفرجوا على اللمبي لمجرد انه هوه ده اللمبي بتاع الون مان شو او الموضة اللي حتقعد شوية و تبطل زي موضة هنيدي كده

اسماعيل يس مختلف لأنه اولا مش ون مان شو، ثانيا له اسلوب معين و محدد زي اي فنان في الدنيا مش مجرد تريند طالع شوية و خلص نحط تريند غيره و لو اني شايف ان محمد سعد كان بيسرق وش من جيم كري في فيلم الغبي و الاغبى منه

تاني حاجة فيه حاجة مينفعش اننا نضحك على بعض فيها ... يعني بصراحة مقالك ده جميل و كل حاجة بس خلينا صرحا مع بعض .. في الاخر اسماعيل يس ده عملاق كبير مش حينفع نقارنه بحد لأنه من المؤسسين للكوميديا المصرية

Yasser Hussein said...

تامر حسين
هو فعلا لو مثل غير كوميدي هينجح لأنه نجح في غير الكوميدي قبل كده
أسم الممثل شاه رخ خان
أنا كاتبه صح .. رخ بضم الراء

مشمش
هو عنده القدرة في الانتقال من شخصية لأخرى بمهارة وده لأنه دارس تمثيل في المعهد العالي للفنون المسرحية باكاديمية الفنون بالهرم
و مش مجرد واحد طلع فجأة أو أبن مخرج أو ممثل كبير وطلع على أكتاف الوالد

Yasser Hussein said...

الفنان محمد سعد
أتمنى أن يكون هذا التعليق تعليقك فعلاً
وإن كنت لا أعتقد ذلك
في جميع الأحوال
أهلا بك سواء كنت الفنان محمد سعد الذي أعنيه
أو محمد سعد آخر

خالص تحياتي

Yasser Hussein said...

شيماء الجيزي
أنا شايف إن أفلام محمد سعد أفلام تصلح إن الأسرة تشاهدها خلاف أفلام عادل إمام اللي مازالت تتخللها مشاهد ساخنة

عاليا حليم
لو كان ابداع عادل إمام المتركز في المشاهد الساخنة هو ده التقدم
فمرحباً برجعية أفلام محمد سعد بما فيها من ضحك نظيف

voice of love
عندك حق فيما يخص كثرة رقصه في الأفلام
ولو تم توظيف قدرته على الرقص في عمل استعراضي منظم لكان أفضل من العشوائية التي يرقص بها

سعيد انحراف
إن شاء الله بعد 10 أو 15 سنة من الآن
سوف يطلق على محمد سعد وهنيدي
مؤسسي الكوميديا المصرية الحديثة
لكل زمن فرسانه
وأنا لا أنحاز ولا أقارن
بل أرتكز على معايير عقلانية ودلائل مما قرأت عن اسماعيل يس وتقييم آداءه الدرامي من خلال كتابات متخصصة حول مدارس الآداء الدرامي في السينما المصرية
بدون دخول في تفاصيل كتير
مرحباً بك في كارتونيا
وأبقى نورنا دوماً

خالص تحياتي للجميع

تامر حسين said...

بضم الراء يبقي انا بردو مغلطش
تحياتي الهنديه

سعيد انحراف said...

و الله يا استاذ ياسر الاختلاف في القضية لا يفسد للود رأي
و خلاصة الاعراب ان حمدي بتشان صاحب قصيدة ايه الاساتوك ده اللي عمال يتوك ده فات عليه 10 و 15 سنة و محدش قال عليه انه كان علامة من علامات الاغنية الشعبية لأنه الاغنية بتاعته هيه اغنية كباريهات، مع اني عارف انه راجل جامد وعلامة جامدة في فن الاعلانات

الفن هوه اللي بينجح في كل زمان و مكان و فيه فرق بين الفن و الموضة .. الفن بيبتدي دايما بشهرة قليلة و يفضل يشتهر و يشتهر و يكبر مع الزمن .. لكن الموضة و التريندات بتبتدي مشهورة و فرقعة و هيصة و هوبا بينا يالا نعيش الحياة و ننتعش و بعد شوية تترمي في الزبالة و محدش يسمع عنها

ما هنيدي عندك بعد ما فرقع و سمع و لم الناس حواليه و ابتدا يخش في النازل بعد ما الناس ما زهقت منه مع الوقت.

طب تعالى كده نقارن بين نانسي علقم و هيفاء وهفي .. نانسي علقم عاشت في الاول دور فتاة الاغراء اللي بترقص في القهاوي و بتاع .. و بعد كده مفيش حتتين تلاتة قلبت على صورة البنت الشقية المودرن الكوكاكولا
هيفاء وهبي واخدة الانحراف عن اقتناع و شغالة بصوتها الوحش الله ينور من كليب لكليب و من واوا لواوا بس هيه لو كانت ماتت في الحادثة الاخيرة ولا حد كان حيفتركها لأنه من الاخر محدش بيلود الام بي سري بتاع هيفاء عشان يسمعه و يطرب .. بس كله بيلود دلوقتي شخبط شخابيط

فده ذكاء من نانسي انها بعد ما فرقعت بترند راحت خادت لنفسها استايل و مشيت عليه .. و هيفاء وهفي لحد دلوقتي عايشة في التريندات و الاغراءات و امان يا ربي امان

و ده رأيي و عاجبني و ده مقالك و رأيك و برضو عاجبني .. و نترك للجمهور حرية الاختيار .. امضاء سعيد انحراف .. مش الانحراف لأ .. ابوه

Anonymous said...

ناس بتهاجم وخلاص
دايما الناس بتقول فين ايام زمان وفن زمان واكل زمان واخلاق زمان
مع انك لو بصيت كويس هاتلاقينا احسن من زمان ميت الف مره

koukawy said...

اه انا معاك
صح

Anonymous said...

السلام عليكم على كل الموجودين

أولآ أنا بحب محمد سعد

ثانيآ أقول رأيى
محمد سعد فنان جيدآ جدآ لأنه يقدر يعمل أفضل من كده بكتير ولأنى كل ما أشوف "الطريق إلى إيلات" و مسلسل "من الذى لا يحب فاطمة" بقول بجد خساره أنه مش بيمثل بالأداء ده أحيانآ بيكون الفنان مضطر أنه يعمل أدوار فى بداية حياته تكون حسب ما السوق ماشى لكن بعد كده بيعمل أعمال هادفه أدوار محمد سعد حلوه لكن إلى حد ما متشابهة
وأخيرآ أقول محمد سعد ممثل جدآ و لكن يحتاج للتنوع لأن الجمهور الحالى يختلف عن جمهور زمان بيحتاج أن نجمه المفضل يقدم له الجديد و المفاجأت دآئمآ

و أرجو تقبل رأيى
____________

و تحيه كبيره جدآ على المدونه الجامده دى

طهقان said...

متفق معاك
بس
فيلم كتكوت

عبيط قوي

قصدي الفيلم
يعني بصراحة ملل
وماقدرتش اكمله

ونفس الافيهات
واعتقد ان كركر نفس الشيء

على عكس عادل امام
مع اني مش باحبه
بس بيختار السيناريوهات بجد
تحياتي يا ياسر

S H A H said...

الفنان الجميل ياسر
وجهة نظرك و طرحك للموضوع جميلة جدا
انا عن نفسي بحبه جدا

الاعلان انا فعلا حسيت انه بيقلد عمرو خالد و البيت كله يقولي لا ده متهيالك انا مشفتش الفيلم لسة

و اشكرك على البوست الرائع

koukawy said...

اطلب طلب منك لو مفيهاش غتاته و رزاله مش كميله
ممكن تشخبطلي شخبوطه من شخابيطك لتصور لشكل كوكو الكميل عشان احطه عندي في العشه
ميرسي
و ابعتهولي علي الميل ده
koukawy@gmail.com

BaSsMa said...

بغض النظر عن ماكتب
انا لااطيق محمد سعد ومش عارفة طلع للسينما منين
ومع احترامي لكل الآراء انا مش فاهمة الناس بيعجبهم فيه ايه ؟
لو قعدت اتفرج عليه ححس ان عمري سنتين
من كثر ماهو بيستهتر بعقلية المشاهد والناس مبسوطة دي حاجة غريبة جدا
ده حتى مش بفهمه بيقول ايه في أدوار الهبل دي كلامه مش مفهوم ومعتقدش ان في حد في الواقع بيحمل الشخصية لي بيمثلها

ياريت يرجع بنفسه لأرض الواقع ويمثل حاجة معقولة وواضحة وليها قيمة
ساعتها ممكن اغير رأيي فيه
واننا نحطه في مقارنة مع اسماعيل ياسين او غيره ده مش حيغطي على فشله التمثيلي

أشرف حمدي said...

انا بقالي اسبوع قاعد أقنع في المدام انه بيقلد عمرو خالد تقول لي لأ دي مجرد صدفة
شكرا علي تأكيدك هذه المعلومة
تحياتي يا فنان

Yasser Hussein said...

تامر حسين
عداك العيب وقزح
هو أنت تقول حاجة غلط ابداً يا تيمو؟

سعيد انحراف
كلامك عن نانسي وهيفا
كلام فى الصميم
أحييك على تحليلك النقدي الانحرافي
:)

وينكى
دي افلام زمان مليانة مسخرة أكتر من دلوقت
بس من كتر تكرارها في التلفزيون الناس اعتادت ومبقتش تاخد بالها


Sarah Daw
مرحباً بيكي في كارتونيا يا فنانة
وأتمنى انك تكوني من زوارنا الدائمين
أنتي بتؤكدي وجهة نظري في محمد سعد كممثل يمتلك أدوات التمثيل
ولكن يحكمه لغة السوق والمنتجين اللي هما اصلا مش فنانين

طهقان
عندك حق
كتكوت السيناريو بتاعه والحوار ضعيف
وفي اطالة في بعض مشاهد ااستظراف اللي ممكن تصيب الواحد بالملل
وطبعا واحد سيناريست قوي زيك
اكيد لازم كان يلاحظ ده
مرحبا بك ومنور كارتونيا

S H A H
مع الاسف يا عزيزي
مش أنا ولا أنت ولا المحامي اللي لاحظ الحكاية دي

koukawy
من عينيا يا عزيزتي
بس طبعاً حقوق النشر محفوظة
:)

BaSsMa
على فكرة الممثل أداة توصيل بيكون وراه سيناريست ومخرج وفريق عمل كامل
بمعنى إن مش محمد سعد اللي بيستهتر لعقليةالمشاهد
ولو أفترضنا أنه بيقدم حاجات عبيطة
فالصغار والكبار بيضحكوا عليها من قلوبهم
جربي وخشي له فيلم في اسينما وأنتي تعرفي اللي بأقصده
بس بصي على سعادة الناس اللي حواليكي

الفنان أشرف حمدي
اي خدمة يا فنان
بس بصراحة أنا أخدت على خاطري من محمد سعد بعد ما شفت البرومو ده
وقرأت الخبر

خالص تحياتي وشكري للجميع

Anonymous said...

معلش يا جماعة أحب بس أرد على عليا حليم

محمد سعد يقل عن عادل أمام إلا فى عدد الأعمال و و مدة التواجد

لكن كجوده فهو لا يقل عنه هو مجرد أتخلاف فى الأداء لكن من الناحيه الأبداعيه المستوى متقارب
_____

و شكرآ كل الموجودين فى ساحة الحوار

Anonymous said...

انا مش شايفه ان فيها شيء مشين
بالعكس دا بيبين قد ايه عمرو خالد شخصيه قوية الحضور ومؤثره
على فكره انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

semsem said...

انا بقول لو خبر تقليد محمد سعد لعمرو خالد صحيح

يبقى لازم نقاطع الفيلم


اعتقد ان الشخصبات المحترمه ليست مجال للسخريه
وان كنا نسخر من ما يحاولان اصلاح المجتمع ويتكلمون فى الدين

يبقى قول على الدنيا السلام


تحياتى ليك يا فنا ن

وعلى الامانه الفظيعه فى نقل الاحداث

Anonymous said...

hello yaser
بالرغم من عدم حبى الشديد لعمرو خالد او اختلافى معه الا ان السخريه منه امر سىء و مالوش سبب ولا داعى و السخريه من شخص لسبب مالوش يد فيه زى صوته دى تدل على عدم احترام الشخص لأى شىء
نهاية القول ان ده شىء مزعج و سىء للغايه
some one

Yasser Hussein said...

وينكى
مع احترامي لرأيك
أني أقلد اسلوب كلام شخصية محترمة زي عمرو خالد
وأركبه علي كراكتر أهبل
ده يبقى طبعاً شيء مشين
ألف مبروك النجاح وعقبال الدكتوراه

semsem
معتقدش إن ممكن الناس تقاطع الفيلم
لأنهم في عرض أي حاجة ترسم الابتسامة على شفاههم
ولكني بأعاتب محمد سعد
إن كان متعمد هذا التقليد
أما بالنسبة للأمانه في نقل الأحداث
فأنا في موضوعي هذا كنت أقيم محمدسعد بشكل فني محايد .. ثم تحول الموضوع إلى شكل أخلاقي رغما عني

some one
أولاً حمدلله ع السلامة من مدة مشفتش ليكي تعليقات
ثانياً أحييكي على رأيك
ولكن ايه حكاية اختلافك مع عمرو خالد؟

خالص تحياتي للجميع