جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Friday, January 18, 2008

أيس كريم في يناير

أصبت باحتقان في الحلق بسبب برودة الجو , وفجأة تذكرت احدى حلقات برنامج العلم والايمان
التي كان يقدمها الدكتور مصطفى محمود
وكانت عن علاج البرد بالبرد حيث عرض فيلم تسجيلي عن بعض الرجال المصابين بالروماتيزم
وقد خلعوا ملابسهم ونزلوا ليستحموا في البحر المتجمد وسط الجليد ، فقلت في عقل بالي وماله لما أجرب ، نزلت الشارع وعند أقرب محل بيعمل عصائر طلبت واحد فخفخينا بالأيس كريم واحنا في عز يناير ودرجة الحرارة أربعة ، قعدت أمزمز في الأيس كريم وقطع الفاكهة المجمدة وسبحان الله لقيت احتقان الحلق أختفى ، يبدو والله أعلم إن النظرية دي سليمة وإن علاج البرد بالبرد ممكن ، عموما أنا حبيت أحكي لكم اللي حصل معايا ولا أنصح بتقليدي إلا بعد استشارة طبيب

15 comments:

bos bos said...

الحمد لله أنك خفيت
وأكيد كل واحد عارف هو بيعمل أيه فأنت مش محتاج تحذر الناس لأن أكيد عندهم عقل

بس تصدق أنا بحب الحاجات دى وبحب فى عز البرد أكل أيس كريم
عملتها مرة من زمان ونفسى أجربها تانى
بجد بيكون أحساس جميييييييييييييل

تحياتى لك

ايوية said...

الف سلامة عليك
على فكرة عندك حق تتصور انى بالرغم من الشتاء الا انى بشرب مية ساقعة المهم احلى شى ايس كريم فى يناير

امل عبد الحكيم said...

الحمد لله انك خفيت
والف سلامه عليك
وبعدين ماهو المثل اللى قال
لايفل الحديد الا الحديد مكدبش
انا كل سنه كان مجرد ماالشتا يدخل الاقى البرد اشتغل وبيقعد طول الشتا
السنه دى كل يوم ولا حاجه اكل ايس كريم والحمد لله لسه مشرفنيش البرد وياريت لو ميشرفش
الف سلامه عليك وبعد الشر عنك

لماضة said...

انا لا انصح معالجة البرد باى حاجه ساقعه ما عدا الايس كريم
الدواء الوحيد المسموح بيه
ويا سلام لو فى بحرى
:)

اسكندراني اوي said...

سلامتك يا فنااان
احلى حاجه الايس كريم حتى في عز البرد
الله عليه من عزه وانت على البحر يجنن
اييييييه ايام

appy said...

انا ههمل كده ولو جرى ليه حاجه هروح لاونكل الظابط اقوله
لاونكل الظابط اقوله ههههههههههههه
الف سلامه عليك

Nabila said...

انا بقا بعمل كده على طول وطول الشتا الحمد لله مش بشوف البرد بجد والله

لانى من ذوات الصوت المبحبوح لما بييجى برد ببقى خرساء هههه

بس بنصح بيها بقلب جامد

ياسر حسين said...

bos bos
مع احترامي لتعليقك
بس حاسس ان محتواه أن أنا معنديش عقل
:)

ايوية
العجيب بقى انى مبشربش ميه ساقعة في الشتا ولا في الصيف .. باحب اشربها متوسطة البرودة

امل عبد الحكيم
الحمدلله لقيت حد متفق معايا في النظرية
:)

لماضة
واضح أنك بتحبي الأيس كريم

اسكندراني اوي
اسكندرية مريه وترابها زعفران

appy
وتفتكري أونكل الضابط ممكن يعمل أيه ..!!!؟
:)

Nabila
حلوة من ذوات الصوت المبحوح دي
:)

خالص تحياتي للجميع

Carol said...

أول زيارة لي
مدونتك دمها خفيف
مريحة بعيدة عن الزحام
تحياتي لك

ياسر حسين said...

Carol
مرحبا بيكي في كارتونيا منورة
:)
أشكرك على تعليقك

تامر حسين said...

انا هجرب بس مقولتليش قبل الاكل ولا بعد الاكل
نياهاهاهاه
والله مصطفي محمود ده
انا بموت فيه بسبب حلقات العلم والايمان وفعلا الراجل ده مبيقولش حاجا الا لما تكون علميه
تحياتي ليك وليه

ياسر حسين said...

تامر حسين
أخي العزيز جرب ولكن على مسئوليتك
:)

ياسمين حميد said...

جربت ذلك كثيراً من قبل. في رأيي الآيسكريم دواء ناجح لالتهابات الحلق الخفيفة.

ياسر حسين said...

ياسمين حميد
عندك حق
بس الناس بتخاف تجرب
:)

تحياتي

مشمش said...

مشمش
انا مش هتكلم علي الايس كريم سوري انا عايزة اسلم سلام حاااار جدا ممكن يسيح الايس كريم وسعيدة بعودتي جداا ياتري فاكريني
انا مشمش