جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Monday, May 19, 2008

أول خبر

أول حاجة من كل حاجة هي أجمل حاجة ، أول هدية تجيلك في عيد ميلادك هي أجمل هدية ، وأول قطعة جاتوه تتذوقها هي أجمل قطعة جاتوه ، و أول خبر ينزل عنك في الجورنال ومعاه صورتك هو أجمل خبر ، الخبر ده يا جماعة كان نزل في جريدة المساء في أكتوبر سنة ألف وتسعمائة وواحد وتسعين كنت وقتها لسه طالب في الجامعة بأحبو خطواتي الأولى في مجال احتراف الكاريكاتير وكنت مازلت متحير مابين الفن التشكيلي والموسيقى التي أعتبرها من أجمل الفنون التي جعلت لحياتي طعم خاص ، فلقد نشات في بيت يعشق الموسيقى ويشجع الفن فوالدي يعزف العود بمهارة وكان معتمد كمطرب وملحن في الاذاعة والتلفزيون ولكنه لم يستمر في مجال الاحتراف ، وأخي الأصغر منذ طفولته وهو يغني في فرقة كورال أطفال الأوبرا وهو الآن صوليست في فرقة نادي الصيد المصري للموسيقى العربية ، فعندما أنظر إلى هذا الخبر الذي قصصته من الجريدة وأشتريت وقتها حوالي عشر نسخ احتفظت ببعضها ووزعت بعضها على الاصدقاء من شدة فرحتي بأن أسمي وصورتي نزلوا في الجورنال ، يمر أمامي شريط الذكريات بين سطور الخبر الذي ينتهي بعبارة "يتمنى أن يكون رسام كاريكاتير محترف في الصحافة المصرية" حينها أسجد لله شكرا لأنه سبحانه وتعالى حقق لي أمنيتي وأكثر وحينها تتأكد لدي وجهة نظري أنه سبحانه لم يعطي اي انسان موهبة هباء بل اعطاه هذه الموهبة لتحقيق هدف ما على هذه الأرض ، ومع الوقت ومع تعدد نزول أخبار عني بالصحف مصحوبة بصورتي أصبح الأمر معتاد ولم أعد أتذوق حلاوة نزول الخبر مثل أول مرة وكلما أردت أن أسترجع هذا الشعور .. أنظر لهذا الخبر .. أول خبر

10 comments:

اهو ده عيبه said...

فعلا يا استاذ ياسر مفيش اجمل من احساس المرة الاولى فى كل شئ

لكن برضه فى ايدنا اننا نحافظ على الاحساس ده جوانا فى كل مرة بنعمل الحاجه لو بنحبها بجد

يعنى بيتهيالى ان كل لوحه بترسمها بيبقى احساسك ناحيتها ومجهودك فيها كانها اول لوحه ترسمها

سعيده ان ربنا حققلك اللى بتتمناه وان شاء الله تحقق المزيد

اهو ده عيبه said...

عندك حق يا استاذ ياسر مفيش اجمل من احساس المرة الاولى

بس فى ايدنا اننا نعمل الحاجه كل مرة بالاحساس ده لو بنحبها بجد

يعنى بيتهيالى ان كل لوحه بترسمها بتحسها وبتبذل فيها جهد كانها اول حاجه ترسمها

سعيده انك قدرت تحقق اللى تمنيته وان شاء الله تحقق اكتر من كده

Yasser Hussein said...

اهو ده عيبه
اشكرك على تعبك وتعليقك مرتين
وإن كان حدث ده بدون قصد
فأنا أشكرك لاصرارك على التعليق
وده شيء يسعدني ويشرفني
لذلك أنا نشرت التعليقين
بالفعل يا عزيزتي أنا في كل عمل بأقوم به أجد سعادة مختلفة
ولكني أتحدث هناعن الاخبار التي تنشر عني في الصحف
مع التكرار لم تعد لها طعمها الأول
مما جعلني أهملها أحياناولا أهتم مثل ما سبق بجمعها وأرشفتها
ولكن هذا لا ينفي سعادتي بها
ولكن ليست مثل أول خبر
:)

خالص تحياتي وشكري
ملحوظة: أنا شاهدت الموضوعات الجديدة اللي بخصوص صفات المرأة ولكني لم أعلق بعد فسامحيني
:)

Anonymous said...

فعلا اول مرة عادة بتكون اكتر ذكري اتحفرت في قلوبنا. و بيكون احلي كمان لما نحتفظ بيها و احنا بنكمل في نفس المجال.

Yasser Hussein said...

Amy
فعلا بتكون ذكرى جميلة
وبتكون علامة في حياة الانسان العملية
ونوع من أنواع النجاح عند البعض
ولكن مع الوقت أعمالك هي اللي بتتحدث عنك
أكثر من أخبار الصحف عنك
:)

خالص تحياتي

Unknown said...

اول شى فى اى شى هو اجمل شى
كلام ملخبط صح

اهو ده عيبه said...

معلش يا استاذ ياسر الخطا غير مقصود
مكنتش اعرف ان فى اشراف على التعليقات فافتكرت ان التعليق متضافش فكتبته تانى

اشكرك انك نشرت التعليقين

وسعيده ان الموضوع عجبك

ٍSOU said...

ياااااااااة اد اية جميل انك تتمنى شيئ بجد,كل خلية فى جسمك بتتمناه و يتحقق فى الاخر ...ربنا يوفقك

عبد الرحمن أبو بكر said...

الفنان ياسر حسين


ياااااااا بجد دي بتبقي احلي ايام

والاجمل لما ترجع تدور في دفاترك القديمة وتلاقي حاجة زي دي بتبقي فرحان قوي

وكونك انك حقتت هدفك دة دا في حد ذاته سبب ادعي انك تبقي فرحان ومزأطط كمان

بجد فرحان جدا ان ربنا بفضلة وبمجهودك يافنان وصلت للهدف اللي كنت بتحلم بيه

Yasser Hussein said...

ايوية
بالعكس
كلام موزون
:)

اهو ده عيبه
ولا يهمك
علقي أنتي بس ومالكيش دعوة
إن شا الله عشرين تعليق
هيتنشروا برضه
موضوع الادارة ده معمول لسبب
بسيط وهو ان في تعليقات بتجيلي على موضوعات قديمة ومن حق الناس اللي علقت أني أرد عليهم
:)


ٍSOU
ثبت إن كل الحقائق والاختراعات
كانت قبل ما تبقى حقائق ملموسة
كانت أحلام وأمنيات
:)

عبد الرحمن أبو بكر
فناننا الشاب الواعد
إن شاء الله هتمر السنين هوا
وأنت بتنتج فن .. وأنت بتحب الفن
وقتها هتلاقي نفسك بتقول يااااه كل دي سنين عدت وأنا مش دريان
لكن صدقني المكسب المعنوي وقتها ما يتوصفش
خصوصا لما تحس أنك حققت اللي كنت بتتمناه
ربنا يوفقنا جميعا
مازلت أتعلم ....
:)

خالص تحياتي وشكري للجميع