جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, June 11, 2008

قلبي معاكم

إلى كل طلبة الشهادة الثانوية وأهاليهم دعواتي لهم بالنجاح وإن شاء الله الأهالي يفرحوا بالابناء ويدخلوا الكليات اللي بيتمنوها ، الصورة اللي مع الموضوع دي صورتي سنة 1989 وأنا باذاكر للثانوية العامة ومن شدة اضاءة الاباجورة عملت كاب ورق مصنوع من صفحتين من نص الكراسة ، أياميها وأنا باذاكر كان أهم هدف عندي أني أنجح ، فكرة التفوق دي مكنتش بتلح عليا ، عمري ما أخذت درس خصوصي حتى وأنا في الثانوية العامة ، كنت باتفرج على البرامج التعليمية اللي في التلفزيون وأسجلها كاسيت مش فيديو لأني من النوع اللي بيخزن اللي بيسمعه من المدرس أكثر من اللي باقرأه ، كنت بأحاول بقدر الامكان محسسش أهلي بالقلق سواء نفسيا أو ماديا ، كنت باتمنى دخول كليتين عكس بعض تماما ، كلية الشرطة لأني كنت رياضي ولحبي أني يكون في ايدي سلطة زي أي شاب مراهق في السن ده ده غير أنها وقتها كانت بتاخد مجموع صغير ، وكلية الفنون الجميلة لأني كنت بارسم كاريكاتير من طفولتي ، الحمد لله لا دخلت دي ولا دي ، سبحان الله للنصيب أجيب مجموع صغير لدرجة أنه لا داعي لذكره ، ولكني أنجح في امتحان قدرات الفنون ، ولأن لي نصيب أدرس الفنون بالرغم من مجموعي الضئيل كانت هناك كليات جديدة افتتحتها وزارة التعليم العالي لسد العجز في مدرسين التربية الفنية والموسيقية ، وهي كليات التربية النوعية للفنون والموسيقى وكانت ثاني دفعة تدخل هذه الكليات وتتخرج منها هي دفعتي ، وقتها مكنتش مصدق أني بعد وصولي للمرحلة الأخيرة في التنسيق أني ممكن أدخل كلية وكمان في الدقي ، اللي انضمت بعد كده لجامعة القاهرة ، والحمدلله دخلت الكلية واتخرجت واشتغلت واديني باكتب ذكرياتي أهوه ، خلاصة الكلام ده أيه .. ذاكروا وأمتحنوا وأعملوا اللي عليكم واللي مكتوب لكم في المستقبل عند الله هو اللي هيتحقق ، مش لازم تخش طب ولا هندسة علشان تكون ناجح ، ومش معنى أنك تخش أي كلية غير دول عشان مجموعك صغير أنك فشلت .. الحياة العملية اهم من الدراسية بس أنت بتعمل اللي عليك
وفي النهاية إلى كل الاصدقاء اللي مش في ثانوية عامة ولهم أخ ولا أخت أو قريب فيها يا ريت تبلغوه تحياتي ودعواتي له بالنجاح

23 comments:

نعكشة said...

انا بحب قوي لما حد يحكي عن الزكريات

كانت لما جدتي ( الله يرحمها) تحكيلنا عن حاجات مع اني قد اكون مش مهتمة بيها بس مهتمة اسمع الزكريات

امو هند

عندك حق و بشدةةةةةةةةة

مش كل واحد في طب و هندسة هيبقي شخص ناجح
او شخص سعيد
واكبر مثال لكدة
انا و اصدقائي
بالرغم اننا اخترنا طب
مع اني موت في الهندسة
وبموت في فنون الجميلة
إلا اني اخترت طب
انا بحبها برضو و نفسي ابقي دكتورة
بس مش دية الفكرة خالص
كلنا حاسيين بالقهر ( انا و صحابي مش كل اللي في طب ) عشان الجمع وحش
وكلنا حاسيين ان الافضل كنا ندخل اي كلية سنتين ولا اربع سنين
ونتجرخ و نتجوز و خلاص
ماهو احنا كدة كدة مش هنشتغل بالشهادة إلا بعد طلوع الروح ( ربنا يستر بقة ) امو هند

حقيقي نصيبك حتاخدوا
ولازم تستمتع بية و إلا الدنيا هتبقي وحشة قوي في عينك
ومين عارف الخير فين

وهبقى احكي عن قصة -لعله خير- في حلقات اخري عشان انا طولت جامد

سلامون عليك

الميكروباص said...

الحمد لله انك لم تدخل كلية الشرطه

مواطن مصرى نايم said...

انا كان فى حاجات قبل امتحانات الثانوية العامة
اولا احلق اقرع على الزيرو
عشان ما اخدش وقت فى التسريح
افتكر كل حاجة بتخلينى اقلق
و دة كان اكبر حاجة بتزيد من توترى

اخنق المدرسين منى بسبب الاسئله اللى هما اصلا بيكونوا مش عارفين اجابتها

و الله انا لو ارجع ثانوية عامة ارحم من الكلية

موضوع جميل

العيال بتوع تانية ثانوى النهاردة
اتعفصوا فى التفاضل و حساب المثلثات
العيال بتعيط مش دموع لا سيول

ربنا على الظالم


سلامى ليك يا فنان

نهى منير said...

لو كنت دخلت شرطة
كان الفن خسر كتير
:)))))
بـــــــــــــــاى

عبد الرحمن أبو بكر said...

يااااااااااااااااااااااااااه

يا فنان احلي حاجة بتعجبني فيك اني بحس انك مسجل حياتك فترة بفترة بالصور

ودا ان دل علي شي دل انك بتعتز بالحياة دي جدا ومهتم انك تسجلها وتفتكرها كل شوية لان دة شي بيسعدك

بس انا عاتب عليك لازم تفكرنا بايام البعدية دي اللي اسمها الثانوية العامة

يارب ما يعودها ايام ....... ويارب وفق كل اللي في الثانوية العامة سواء المرحلة الاولي او التانية

كمال سلطان said...

ازيك يافنان

بجد نصايح غاليه جدا

وياريت الكل يعمل بيها

وفعلا الحياة العمليه ملهاش علاقة خالص بالدراسة

وتحياتى لحضرتك

Unknown said...

امييييييييييين يارب
يكرمهم كلهم
فكرتوني باللذي مضى
الثانويه العامه اليومين د ول محسسني انهم داخلين حرب فعلا
ربنا يستر عليهم
انا بيصعب عليا اهاليهم بس

Unknown said...

على فكره انا شفت البرنامج
عجبني جدا جدا
كمل بقيت الحكايات

Yasser Hussein said...

نعكشة
اشكرك على تعليقك
لكن في كلمة اتكررت مرتين ومش فاهمها مع الاسف
أمو هند
:)

لورنس العرب
الحمدلله فعلا اني مدخلتش شرطة
:)
لي صديق ضابط شرطة
وكان ناجح في امتحان قدرات الفنون
حاليا لا علاقة له بالفن بالمرة


خالص تحياتي

Yasser Hussein said...

مواطن مصرى نايم
على ايامي كنا من تانية ثانوي يا أما أدبي يا أما علمي
وأدبي لا بياخد احصاء ولا رياضيات
معرفش ايه الافتكاسات بتاعت اليومين دول
بالنسبة للحلاقة زيرو
هي كانت موضة عند طلبة الثانوية العامةقبل الامتحانات
لكن انا شخصيا معملتهاش غير من سنتين
ومن يومين
:)

نهى منير
أشكرك على الجملة الرقيقة دي
لكن لو كنت دخلت شرطة
كنت خسرت كل هواياتي


خالص تحياتي

Yasser Hussein said...

عبد الرحمن أبو بكر
ازيك يا فناننا الواعد
منور كارتونيا
حكاية تسجيلي للحظات حياتي بالصور
يرجع لحبي للتوثيق
والصور بتحيي الذكريات الجميلة
وفي مواقف بتمر علينا في وقتها بنحس انها سخيفة
لكن لما بتمر وتمر السنين بنفتكرها ونضحك وبتبقى ذكريات جميلة
زي ايام الجيش مثلا
أو أيام الثانوية العامة اللي فكرتك بيها
:))))))

خالص تحياتي

Yasser Hussein said...

كمال سلطان
صديقي الصحفي الهُمام
منور كارتونيـــا
وأنا سعيد إن كلماتي عجبتك
الحياة العملية هي الفيصل
أكم من دارس للفنون مثلا
وغير ناجح ولا يعرف كيف ينتج ويروج لفنه
:)

خالص تحياتي

Yasser Hussein said...

لماضة
عودا حميدا
كنتي غطستي كتيير الفترة اللي فاتت
بسبب ضغوط شغلك
ربنا يوفقك
:)
فعلا اهالي طلبة الثاوية العامة
تحسي يا عيني أنهم هما اللي بيمتحنوا
ده غير الضغط المادي والدروس الخصوصية
كان الله في عونهم

بالنسبة للبرنامج انا سعيد أنه عجبك
إن شاء الله في حلقة قادمة من إعداد الصحفية أمل عبد الحكيم

خالص تحياتي

نعكشة said...

اموهند = المهم :D

معلش معلش هيا الدنيا كدة :(

Yasser Hussein said...

نعكشة
آها
بالضبط زي
ساميه وأحمد = ثانية واحدة
:)

خالص تحياتي

Anonymous said...



رجعتنا لايام العكننه
بس كانت ايام حلوة
غريب ان الانسان مش بيحس بطعم الايام الا لما بتروح منه
يعني انا مش فاكر من ايام ثانوي و مذاكرة ايام ثانوي
الا صوت اذاعة الاغاني
و الساعة بتاعت القصائد الساعة 9 بالليل
و 11 ام كلثوم

و ريحة الربيع و التراب

ايام شقا بقا الربيع دا كان شهر 4 مثلا يعني كان باقي شهرين على الامتحانات

بس الحمد لله ربنا كرم و دخلت الكليةاللي انا عاوزها

رقص شرقي



اقصد هندسه

يلا ماهو كله هادف

بصراحه لو كانت فاتت مني الهندسه كنت هزعل اووي لاني من صغري و انا عاوز ابقى مهندس
مش زي هوجه الجيل بتاعي
اللي يجيب مجموع عالي في تانيه يحول علمي علوم عشان طب
انا من اول اعدادي يعني حوالي 12 سنه او 13 و انا عاوز ابقا

مهندس


Yasser Hussein said...

ketchup
مرحبا بيك في كارتونيا صديق جديد ودائم إن شاء الله
أنا سعيد لأنك حققت اللي نفسك فيه ودخلت الكلية اللي كان نفسك تدخلها وبتحبها فعلا
مش لمجرد ان مجموعك جابها وخلاص
:)

خالص تحياتي

حنين.. said...

يااه يا فنان فاكرتنا بايام زمان, مش زمان اوى,. من سنه بس, بس انا حاسه انى كنت فى سجن تحت الارض, وللاسف يا فنان ولا ولا كليه من الكليات اللى انا كنت نفسى ادخلها دخلتها, وبعد سنه بس من الكليه, بحمد ربناااااااا , انى دخلت الكلية دى. مع انى لسه مش حبتها اوى, , بس عرفت انها كانت الخير ليا عن كل الكليات. وكل ما افتكر الثانويه الهباب وايام العذاب. امسح دموعى من على خدى واقول الحمد لله يارب, واللله ربنا كرييييييييم. ودلوقتى كل ما اقابل اصحابى اللى فى طب ولا هندسه يحسدونى على اللى انا فيه مع ان المفرود العكس..... والغريب انى ببقى فرحانه لما حد بيسالنى واقوله فى كلية اداب, والغريب كمان. ان احساسى با الفشل لم يعد له مكان. وبفكر دلوقتى انى احضر بعد الكليه او اخد كلية تانيه ....... من الاخر الثانويه مش اخر الدنيا. وانا بحييك على مدونتك , ودى اول مره ادخلها...

Yasser Hussein said...

حنين
مرحبا بيكي في كارتونيا
صديقة جديدة ودائمة إن شاء الله
كلية الآداب من الكليات الجميلة
اللي ممكن من خلال دراستك فيها
تمارسي بجانب الدراسة هواياتك الأخرى
سواء كانت رسم او موسيقى او كتابة
بمعنى أنك ممكن تلاقي وقت لكده
ممكن طالب الطب يجد وقت لكده ولكن بصعوبة
طالب وخريج الطب والهندسة بيفضلوا طول عمرهم يذاكروا
حياة كلها عمل في تخصصهم
ده لو عايز ينجحوا في تخصصهم فقط
لا وقت للاستمتاع بالحياة
استمتعي بحياتك ودراستك في الاداب
صدقيني من الكليات الجميلة
:)

خالص تحياتي

Unknown said...

عندك حق يا فنان كلنا كان لينا احلام وطموحات ساعتها وزعلنا قوى لاختلاف الطريق اللى رسمناه عن اللى مشينا فيه بس فى الاخر كله نصيب واهم حاجة نتفوق فى مجالنا ونطور نفسنا فيه
شكرا على النصيحة والبوست

Yasser Hussein said...

ayman badr
والله ما اخبيش عليك انا حلمي في الشيء اللي نفسي أدرسه أتحقق بفضل الله
ودي حالة مع الأسف اصبحت نادرة بسبب التنسيق
:)

خالص تحياتي

بنوتة من وسط البلد said...

اشكرك على الدعوة الكريمة
وانا كمان عندى نفس التجربة وكنت نشرتها فى بوست قبل كده

والحقيقة هذه الحالة من الذكريات بتنتابنى مع كل سنة مع امتحانات الصانوية والى بنشوفه فيها على وشوش الاهالى

احنا فى اسرتين عندنا فى العيلة بقالنا سنتين ما نعرفش عنهم حاجة ..وده علشان عندهم عيال فى الصانوية :)

ادعوك لقراءة بوستى انا كمان
http://kalam-kholasa.blogspot.com/2007/02/blog-post_19.html

وتحياااتى

ع فكرة سنة 89 انا كان عندى 7 سنين
:P

Yasser Hussein said...

بنوتة من وسط البلد
منوره كارتونيا
الصانوية العامةعلى حد تعبيرك
هي بعبع كل البيوت
بس أنتي كده حسستيني أني جي من أيام الهجرة لما قلتي لي أنك وقتها كان عمرك 7 سنين
:)

خالص تحياتي