جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, November 2, 2008

إنسف معارفك القدامى

عدسة المصور الصحفي : محمد العادلي
عمرك اعطيت اهتمام لشخص ولم يبادلك نفس الاهتمام؟
عمرك اتصلت بشخص على الموبايل وماردش عليك بحجة أنه مشغول للغاية؟
عمرك كبرت واحد وهو صغرك؟
أكيد مفيش حد فينا لم يتعرض لمثل هذه المواقف
تهتم بشخص وتنتظر منه نفس الاهتمام ومتلقيهوش
وتتصل بشخص علشان تسلم عليه أو تطمن عليه من منطلق الصداقة أو الزمالة أو اي منطلق إنساني وميردش على اتصالك
ولو حصل عن طريق الخطأ وفتح الخط يقول لك معلهش انا كنت مشغول قوي .. سلام بقى عشان بينادوا عليا في الشغل
ولا الشخص اللي أنت تتعامل معاه كأنه أخوك الصغير وفجأة تلاقيه انقلب ضدك أو قاطعك في حين أنك لو لم تعطيه أي إهتمام
تلاقيه يتقرب منك ويبقى مش عايز يسيبك
إحنا ليه بنعمل مع بعض كده؟
هل تحولنا إلى شخصيات مادية لهذه الدرجة حيث لا مجال للتعاملات الانسانية بينا
وهل المصلحة فقط هي اللي بقت تربط الناس ببعض
وهيحصل ايه لو الشخص اللي اتصلت بيه وكان مشغول لما جنابه يفضى يتصل بيك يشوفك كنت بتتصل ليه
مش يمكن تكون في مأزق وبتتصل تستنجد بيه؟
حقيقي أناشخصيا بعد ما واجهت العديد من النماذج السالف ذكرها
قررت أنسف معارفي القدامى اللي بينطبق عليهم هذا الأسلوب في التعامل
وقررت أن لا أهتم ولا أعطي إهتمام إلا لمن يقدر هذا الاهتمام
لكني واثق إن الانسان اللي بيتعامل من هذا المنطلق وعايش في دور عبده المهم هيجي عليه وقت هيلاقي نفسه وحيد ومش هيلاقي حد يعبره أو يخبط عليه باب أو يرن عليه بتليفون أرضي أو محمول
معلهش دوشتكم لكن الموضوع ده كان بيدور في بالي من فترة
وحبيت أعرضه عليكم
خالص تحياتي
:)

20 comments:

طالب ثانوى said...

لا مدوشتناش ولا حاجة ياترى انا بقى من نوع المعارف دى ولا حاجة

ياسر حسين said...

طالب ثانوى
عيب عليك يا فاروق
معقول تعتقد كده برضه
ده انا لسه معلق عندك يا راجل قبل ما اشوف تعليقك ده
:)
ربنا يديم المحبة

خالص تحياتي

مواطن مصرى نايم said...

بج دو الله عندك حق فعلا يا فنان
بجد بتحصل معايا كتيييير اوى
بس بطبعى انى بنسى اى حاجة وحشة حد عملها معايا بمجرد انه يرن عالموبايل بس
و ده مش عارف عيب و الا ميزة
بس فى ناس نسفت علاقتى بيهم فعلا

عندك حق فكل كلمة
تحياتى

اسلام

اهو ده عيبه said...

والله يا استاذ ياسر فيه ناس تحس انهم من عيله مصيلحى
يعنى ميعرفوش طريقك غير وقت المصلحه
وبس وبعد كده ينسوا كل حاجه
وناس تانية حاسين بنفسهم وبيتعاملوا باستكبار
يبقى قله معرفتهم احسن وعلى راى المثل القديم اللى ميحطنيش كحل فى عنيه محطوش.........

تحياتى لك

Amy said...

وفيه ناس بيصيبها الاككتئاب و بتحب تبعد عشان ما تعديش اللي حواليها
و فيه ناس من كتر المشاكل مش بتقدر ترفع راسها فوق السطح
و فيه الف سبب
سيب الناس تلاقيك وقت ما تحتاجك. و اعرف تلاقي الناس اللي تحتاجلهم وقت الشدة

تحياتي

ياسر حسين said...

مواطن مصرى نايم
على فكرة انا فيا نفس الطبع
بمجرد ما يجي لي تليفون من الشخص
اللي مضايقني تلاقيني تسامحت بسرعة
وده مع الاسف احيانا بيكون عيب
لكن داخليا بين الشخص ونفسه ميزه
لأنك بتنام وانت مش شايل في نفسك شيء لحد
:)

خالص تحياتي

ياسر حسين said...

اهو ده عيبه
فعلا عندك
اللي محطنيش كحله في عيني
ما أحطهوش رباط في ماي شووز
تكملة المثل
:))))))))))))

خالص تحياتي

ياسر حسين said...

Amy
الله ينور عليكي
كلام سليم
لكن المفترض لما يخرج من موود الاكتئاب والابتعاد
يعبر الناس اللي عبروه
مش كده ولا أيه
:)

خالص تحياتي

يوميات نائمة في الأرياف said...

الفنان ياسر حسين
اول مرة ازور مدونتك وان شاء الله متكونش اخر مرة
اه حصل اني اتعرضت للموقف
ده
بس عارف
لما حصل وكنت فاهمة ان صديقتي دي مطنشة
بصراحة بعد شوية وقت حصل وفهمت انها كانت تعبانة جدا وان انا اللي كنت مقصرة في حقها
وبدل ما كنت فاهمة ان هي الغلطانة طلعت انا اللي غلطانة ومقصرة في السؤال عليها
انا شايفة اننا لازم نشوف الموضوع من كل جوانبه مش بس من الجانب اللي يخصنا بس
ولازم نلتمس للأخرين سبعين عذرا
رنا

ايوية said...

ياة فكرتنى ياما قابلت من من الناس دة كتير

بس خلاص ... said...

السلام عليكم
للاسف النوعية دى من الناس بقت موجوده كتير ...
ولكن فعلا كلام حضرتك صحيح
اللي محطنيش كحله في عيني
ما أحطهوش رباط في ماي شووز

ده حتى الشوز اليومن دول بقا غالى قوى قوى ... شوف بقا الرباط واحده يساوى كام
يعنى حتى مايستهلش يكون رباط

ياسر حسين said...

يوميات نائمة في الأرياف
مرحبا بيكي في كارتونيا
صديقة جديدة ودائمة إن شاء الله
على فكرة انا التمست للناس مش 70 عذر فقط ده يمكن عدوا ال170
لكن الفكرة أنا بأتكلم هنا عن نماذج كتير بنقابلها
أنا وأنتي وغيرنا
ومش مجرد موقف واحد او اتنين
دول اكتر من موقف لأكتر من شخص
:)

خالص تحياتي

ياسر حسين said...

ايوية
حمد لله ع السلامة .. فينك من زماااان
الناس دي موجودة وهتفضل موجوده
وأحسن حل تجاهلهم
:)

خالص تحياتي

ياسر حسين said...

بس خلاص ...
مرحبا بيكي في كارتونيا
انا كملت المثل اللي ارسلته
أهو ده عيبه
وطبعا هو مش نصه عربي ونصه انجليزي
:)
في غنوة قديمة بتقول
تراعيني قيراط اراعيك قراطين
هتشوفني بعين أشوف بأتنين
:))))))))

خالص تحياتي

اقصوصه said...

فعلا

اشاركك هذا الراي

وهذا نهجي فالحياه

صحيح ان الانسا يجب دوما ان يحاول ايجاد الاعذار لمن يحب

لكنها في احين كثيره..تكون اعذارا مختلقه

واهيه..غير صحيح

ومهما كثرت انشغالاتنا ومسؤلياتنا

لا اعتقد بانها ستستطيع اجبارنا

على نسيان من نحب!

سررت بمروري من هنا

ياسر حسين said...

اقصوصه
وأنا سررت بمرورك وتعليقك
وسعدت بأن هناك من يتفق معي في الرأي
وأنني لم أظلم أحد عندما أقاطعه لعدم اكتراثه باهتمامي به
:)
حلوةاكتراثه دي
:))))))))))
خالص تحياتي

نعكشة said...

من رأيي الخاص وبما اني مليش خبرة مع ناس وحشة صراحة
او محستش بان لو فية ناس وحشة اثرت معايا

بحب اعامل الناس بطبيعتي انا
مشكلتي بقة اني مبسألش علي حد
مع انهم بيبقوا في بالي
و بالتالي بدعيلهم و خلاص

بس لما حد منهم بيتصل بيا باخد سيل من الشتايم :D

يلا خير

عامتاً انا مش بعامل الناس علي قدر اهتمامهم بيا
بس علشانا نا بعامل كل الناس كدة

بس

سلام عليك

ياسر حسين said...

نعكشة
وجهة نظر تستحق الاحترام
:)

خالص تحياتي

تامر حسين said...

دلوقتي البني ادم بقي يصحي الصبح ويحي العلم ويقول مصلحتي يا مصلحتي

تحياتي

ياسر حسين said...

تامر حسين
مع الاسف فعلا المصالح بقت تتحكم في علاقات الناس ببعضها