جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Sunday, November 9, 2008

لبشة أفـــلام

عدسة المصور الصحفي : أحمد جابـــر
مصطلح لبشة كان يطلق على ربطة القصب ، يعني كان زمان الواحد لما يشترى كام عود قصب مع بعض عشان يمصمص فيهم هو وعياله في البيت قصاد التلفزيون كان بيروح يشتري لبشة قصب
من يومين وقع تحت ايدي لبشة أفلام مصرية مجانية تم تنزيلها من ع النت ومنها اللي نزل في الاسواق على هيئة سيديهات ومنها اللي تم تصويره من السينما مما اتاح لي رؤية جرعة لا بأس بها من الأفلام المتتالية في عطلة نهاية الأسبوع
وأسرد لكم انطباعاتي كمشاهد لهذه الافلام
كابتن هيما
بطولة : تامر حسني
زينـــــــــه
أحمد زاهــــر
الاخراج الاول : نصر محروس
بصراحة أنا مقدرتش أكمل نص الفيلم ورحت راميه من ع الجهاز ، قصة مستهلكة جدا وتمثيل ركيك ، قصة خريج تربية رياضية بدل ما يشتغل مدرس في المدرسة الخاصة ، اشتغل سواق للاتوبيس المدرسي بتاعها ، وسبحان الله بقدرة قادر تحبه أحد المدرسات بالمدرسة وتفضله على شاب غني جدا ، مش لاقى أي تفسير منطقى للامور التالية
ايه اللي جذب رجل اعمال غنى جدا لمدرسة مستوى جمالها متواضع
وأيه اللي عجب المدرسة في السواق اللى بيعاني من فقر وسوء حظ مستمر
بصراحة فيلم من أول لقطة فيه لم اشعر بأي ارتياح
----------------------------------------------
الشبح
بطولة : أحمد عــــز
زينــــــه
صلاح عبدالله
الفيلم ده يمكن قديم شوية .. يعني مش من افلام الموسم ده لكني اول مرة أشوفه، برضه زينـــه
مش عارف ليه المنتجين مصرين على الاستعانة بيها خاصة أنها بتكرر نفس أسلوب الاداء ربما تكون الاقل أجرا
لكن أنا محسيتش بفارق في آداءها في الفيلم الأول والثاني بالرغم إن كابتن هيما أحدث إلا أن أسلوبها في التمثيل واحد
المهم .. طلعت من الفيلم ده بكذا حاجة ممتعة
التصوير والمونتاج والانتقال من مشهد للتاني بنعومة واستخدام الجرافيك لدمج المشاهد ببعضها شيء ممتع فعلا
وجديد على السينما المصرية
الاخراج لعمرو عرفه مخرج فيلم افريكانو وده طبعا يفسر المتعة البصرية اللى موجودة في الفيلم
طلعت برضه من الفيلم باتنين ممثلين حلوين جدا
أحمد عــز منذ أن أفلت من المخرجة ايناس الدغيدي وهو يقوم بانتقاء الادوار بشكل انيق ومتنوع ولا يقدم ادوار بها اي مشاهد ساخنة مثل التي قدمها في فيلمه الأول مذكرات مراهقة ، وأرى أنه يمتلك مقومات الفتى الأول من حيث الوسامة واللياقة البدنية كما تستشعر تطور في الآداء من فيلم لآخر
الفنان الكبير صلاح عبدالله اللي بيمثل الشر بشكل يرعب .. مفاجأة فعلا أن ترى الشخص الذي يلعب أدوار الكوميديا منذ سنوات طويلة أن يغير جلده ويلعب أدوار الشر بكل اقتدار ربما فاق في الآداء أدواره في الكوميديا
الموسيقى التصويرية : خالد حماد .. عامل موسيقى في نفس مستوى الأفلام الامريكية واللى عايز يعرف خالد حماد يرجع لموسيقى فيلم عمارة يعقوبيان ، وموسيقى فيلم اللي بالي بالك أعتقد دي من الموسيقات المميزة اللي متتنسيش
التوزيع الموسيقى لأغنية الفيلم : نادر حمدي .. عامل شغل توزيع بيفكرني بموسيقى افلام جيمس بوند والمهمة المستحيلة ممزوجة بموسيقى الراي من الآخر شغل جميل
----------------------------------------------
مسجون ترانزيت
بطولة : أحمد عــــز
نور الشــريف
صلاح عبد الله
اخراج : ساندرا نشأت
شاهدت فيلم مسجون ترانزيت قبل أن اشاهد فيلم الشبح يعني شفت الفيلم الأحدث لأحمد عــز قبل الأقدم
ولكن يمكنني الاحساس بالفارق والتطور في آداء أحمد عـــز فنراه في فيلم مسجون ترانزيت أكثر لياقة في الآداء
كذلك نرى صلاح عبدالله مستمر في آداء الشخصية الشريرة باقتدار
نور الشريف بصراحة الدور ده مكنش بتاعه
كنت أتخيل مكانه خالد صالح أو خالد الصاوي كانوا هيقنعوني أكتر
لكن وجوده في الفيلم جعل الفيلم يسير على منوال الافلام الامريكية حينما يحبون أن يطعموا الفيلم بممثل كبير مثل
آل باتشينو أو روبرت دي نيرو حتى يعطي ثقل للفيلم
استشعر ازدياد نضوج المخرجة ساندرا نشأت من فيلم لآخر فهي في صعود مستمر وبتقدم للمشاهد فيلم ممتع بصريا
يعني فيلم قصة ومناظر
بغض النظر عما يقال عن الفيلم أن قصته مأخوذه من فيلم مكسيكي أو اسباني إلا أن الفيلم جيد
ولا يقلل من شأنه أن تكون القصة مقتبسة لأن هناك الكثير من الافلام المصرية الناجحة
والتي تعتبر من العلامات في تاريخ السينما المصرية ... مقتبسة
------------------------------------------
الحب كده
بطولــة : حمـــاده هــلال
الطفلة : منه عــرفه
باقى أسماء الممثلين لم تعلق في ذهني
حماده هلال يا جماعة زي السكر ، أنا بأحبه كانسان سيرته طيبة ويشهد له الجميع بذلك
أما كفنان فهو فنان يقدم فن خفيف ، بيغني ببساطة واحساس وتمثيله جيد وخفيف الظل مش بيستخف دمه زي كابتن هيما
فيلم الحب كده يعتبر من أفلام الأسرة خاصة أن البطولة الحقيقية فيه للطفلة منة عرفة وطفل آخر لا أتذكر اسمه
وركز الفيلم على ظاهرة الحسد والحقد الطبقى
فبطل الفيلم يشتري سيارة فارهة بالتقسيط واذا بشخص حاسد حاقد يحسده جهرا مما يتسبب فيما بعد لمواقف عجيبة للسيارة ولبطل الفيلم
فيلم مسلى فيه الاغنية والابتسامة والضحك أيضا
لكنه مش علامة في السينما خاصة إن المنتج الفيلم السبكى مصمم أنه يمثل
:)
--------------------------------
كان هذا عرض سريع للبشة الافلام اللي اتفرجت عليها في عطلة نهاية الاسبوع
وأتمنى أني أكون قدرت أوصل لكم انطباعاتي بشكل جيد
خالص تحياتي
:)

8 comments:

Dr- Hema said...

شوف ياباشا

السينما المصرية عبارة عن ضحك على الدقون

وأهى ماشية


تحياتى

تامر حسين said...

والله عندك حق
انا كل الي خنقني ان احمد عز افلامه الاخيره يبقي في لغز وفي الاخر يطلع حاجا تانيه ويقعد يتلولو علي الكرسي ويبص بعنيه بزغرتين تلاته وفي الاخر يطلع هيييييييييييه المخرج هو السبب
بجد الافلام المصريه بقت كوبي بيت مالاخر
وانجز الي يعرف يعمل الدور يعمله
حتي لو عامله قبل كده
وربنا يخليلنا حسن حسني الي خايف في مره افتح الحنفيه الاقيه نازلي منها
تحياتي

ياسر حسين said...

Dr- Hema
مرحبا بيك في كارتونيا
صديق جديد ودائم ان شاء الله
هي ضحك على الدقون
على سبوبة للناس اللي شغالين فيها
أكل عيش يعني
:)

ياسر حسين said...

تامر حسين
عندك حق
ولكن أحمد عز تطور عن اول
ضيف على ذلك
مفيش ولا فيلم من اللي اتكلمت عليهم كان فيه حسن حسني
:)
خالص تحياتي الاخوية

البحث عن الذات said...

لا لا لا لا يا جماعة بصراحه انا مش
موافقكم ف موضوع ان السينما المصريه كلها ضحك ع الدقون

هو فعلاً ف كتير هبل واستهبال وهرتله ع الفاضي من امثالها افلام السبكي وافلام المقاولات بتاعة زمان الي ف السبعينات يعني عصر الريس السادات

بس ازاي تقولو انو مفيش سينما
امال راحت فين افلام احمد زكي
وافلام المخرجين الكبار و محمد خان و عاطف الطيب
وفين الكيت كات
و حديثا
احلا الأوقات
ملك وكتابه
ارض الخوف
ويعقوبيان
وكتيير انا مش فاكر

بس انت ليك حق وحق بجد من الأفلم الجميله الي شفتها والي مش عارف طلعينلي فيها اليومين دوول
من اشباه الهواة الي بيحرقو دمنا
بس فيه احساس وزوق زي الرسام والمصمم الي بيعرف ازاي يطلع لوحه جميله بدون ما يزود او يكتر فيبقي ف زحمه

..........

ياسر حسين said...

البحث عن الذات
مرحبا بك في كارتونيا
صديق جديد ودائم ان شاء الله
أشكرك على تعليقك وان كنت أؤكد على نقطة انه يوجد جيل جديد من المخرجين يقدموا صورة حلوة
وتقنيات تصوير عاليه
بيعرفوا يستخدموا التكنولوجيا الحديثة صح وبيمتعوا المشاهد

خالص تحياتي

koukawy said...

انت بس نسيت في فيلم الشبح محمود عبد المغني انا شايفاه لطيف الي حد كبير

ياسر حسين said...

koukawy
فعلا عندك حق
محمود عبدالمغنى آداءه جيد
وفي تصاعد مستمر من فيلم للتاني

خالص تحياتي