جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Thursday, March 29, 2007

نعيماً يا حبيبي نعيماً يا حياتي


نعيماً يا حبيبي نعيماً يا حياتي هي مطلع لأغنية شهيرة للمطربة الراحلة ليلى مراد وكانت تغنيها للفنان حسين صدقي وهو يحلق ذقنه في أحد الأفلام القديمة ... ترن دائما هذه الاغنية في أذني كلما وقفت أمام المرآة لأحلق ذقني ..وربما قد لا يصدقني البعض إذا قلت لكم أنني أسمع الأغنية ترن في أذني أيضاً حينما أحلق شعر رأسي بنفسي ... نعم فلقد أعتدت أن أحلق شعر رأسي بنفسي منذ حوالي ثلاثة سنوات مستعيناً بماكينة كهربائية حديثة لقص الشعر ... وأجد سعادة في القيام بمثل هذا العمل دون مساعدة أحد .. ودون الانتظار لدى الكوافير الرجالي لمدة ساعة أو أكثر كما لو كنت أنتظر في عيادة طبيب ... ولكن كما يقول المثل الشعبي مش كل مرة تسلم الجرة ... وقع المحظور

قصيت شعري بالماكينة وذهبت إلى المجلة حيث أعمل فإذا بأحد الزملاء يقول لي : أنت قصيت شعرك فين؟تعجبت من السؤال وأجبته ... قصيته كالعادة بنفسي ... عقب قائلا : ولكن الجنب ده مش مضبوط ..قلت له : معلش لما أروح هبقى أضبطه ... مر يوم العمل وأنا لا أغادر مكتبي متخيلا أن الجميع ينظر إلى شكل شعري الغير مضبوط

وعند وصولي إلى منزلي دخلت الحمام ومعي الماكينة الكهربائية وقد كنت شحنت بطاريتها

وأخذت أحاول ضبط الجزء الذي أشار إليه زميلي بالعمل .. ولكن فجأة قفزت في رأسي فكرة مجنونة

وقلت لنفسي . ماتيجي تشيل شعرك خالص .. هو بروس ويلز أجدع منك .. ولا برتني سبيرز عندها ماكينة حلاقة بالكهربا أحسن منك

رحت جايب شعري ع الزيرو

وقعدت أغني لنفسي نعيماً يا حبيبي ... نعيماً يا حياتي

وللذكرى الخالدة أخدت لي كام صورة وبصراحة حسيت براحة نفسية لما حلقت شعري ع الزيرو

عارفين ليه؟.... عشان لما في حاجة تنرفزني ما لاقيش شعر أشده خصوصاً إن الناس اليومين دول عماله تشد في شعرها من كتر اللي بيشوفوه من حماقات في الدنيا ... ولاأيه رأيكم؟

24 comments:

BaSsMa said...

معقولة انت لي في الصورة ؟؟
لو فعلا أنا أنصحك انك تحلقه على طول
:D
عموما نعيما ياأستاذ ياسر نعيما يافنان
:D
والصورة جامدة أوي
هههههههههه
وبريتني سبيرز كمان بتحلق ؟
أنا أول مرة أعرفها دي
بس كل حاجة متوقعة منها

Anonymous said...

هههههههههههههههه
لا تصدق شكلك احلى بكتير من غير شعر؟؟؟
نعيما يا فندم
وطريقه التصوير كمان مخلياك تححححفه
بجد عاجبانى الصوره والحلاقه
بس لما تتنرفز هاتشد ايه دلوقتى؟؟؟؟
سؤال يكرح نفسه

Yasser Hussein said...

BaSsMa
آه تصوري ..دي صورتي
أنعم الله عليكي يا باسمة

Ahmed AL-Hussany
الله ينعم عليك يا أبو حميد
عقبالك

وينكى
أفهم من كده إن كان شكلي وحش وأنا بشعر...عموما لما هتنرفز هأبقى أشد شعر اللي جنبي
هاهاهاهه

تحياتي للجميع

Anonymous said...

والله جامدة طجن فعلا مافيش احسن من ان الانسان يكون على راحتة ويجبها على بلاطة وصدقنى قريب هعملها كدا بس لية مش متصور من الجهة التانية لقطة حتى نشوف البلاطة كاملة المهم يامان والله حلوة وشكلك فرعونى اصيل.

koukawy said...

لايق عليك
نعيما يا ياسر

Yasser Hussein said...

Anonymous
المرة الجاية هبقى اتصور لك مخصوص من جميع الجهات .. وياريت تبقى تكتب أسمك عشان أبقى عارف أنا بكلم مين

koukawy
الله ينعم عليكى وشكرا على مجاملتك اللطيفة

خالص تحياتي للجميع

شيماء الجيزى said...

بجد ...انا زى بسمه انصحك على طول تحلقه
شكلك روعه ...من غير شعر:d

وياريتنى اعرف اعمل زيك ...عشان مشدش شعرى كل شويه
بس للاسف...مينفعش

على فكره حضرتك زورت مدونتى الخاصه
الى بتكلم عن نفسى فيها

مش كل موضوعاتى ساخره ...ده اسلوب اتخذته وانا بتكلم فيه عن نفسى

حاول تزور صحفيه مع إيقاف التنفيذ نفسها
يمكن تشوفنى انا فيها
تحياتى وبشكرك جدا جدا على زيارتك استاذ ياسر
شكرا

Yasser Hussein said...

شيماء الجيزى
أشكرك على مجاملتك الرقيقة
زرت مدونتك وتركت لك تعليق هناك ..بالتوفيق
خالص تحياتي

Anonymous said...

طب ليه متتصلش بالحلاق يجيلك فى البيت و يحلقلك و تديه 50 جنيه
.......
آه صحيح نسيت انك زينا
حلاق ايه اللى ياخد 50 جنيه فى حلقة
ماعنى ما حلقت
.......
انا بتغاظ اوى من الناس ولاد البطة الخضرا اللى بيجيبوا حلاقين فى البيت حقد طبقى بقى
.......
بس برضه انا مش بحب الانتظار عن الحلاقين
ف اللى بعمله انى اتفق مع الحلاق هجيلك على الساعة كذا
حتى لو بتحلق لزبون تسيب الراس اللى فى ايدك و تفضالى احنا متفقين على معاد
........
بس سيبك انت
قولى
انت اسمك الحقيقى ايه؟
بروس ويلز؟؟
........
انا لو خدت الصورة بتاعتك و وريتها لأى شخص خلوى و قلتله ده ممثلى الامريكى المفضل هيصدق على طول
.........
جامد يا فنان يا وسيم

Yasser Hussein said...

أحمد مختار عاشور
متشكر يا دكتور ع التعليق الشيك
أما بالنسبة لحكاية الحلاق اللي يجي يحلق في البيت
م الآخر
أنا ما بحبش حد يحلق لي

خالص تحياتي

تامر حسين said...

هههههه صدقتني بقي لما قلتلك احلقه علي طول
عمتا ده شيء طبيعي من فنان مثلك

الجنون فنون ولا ايه

Anonymous said...

طب انت بتغيظنا يعني عشان احنا بنات ومنقدرش نتحرر زيك كدة بس الميزة اننا هنلاقي شعر طويل نشد فية لما نتغاظ وانت لا بس ممكن احلهالك ابقي قطع في هدومك
بس انت جميل ووسيم جدا في كل الاحوال حتي كدة زايد وسامة

Yasser Hussein said...

تامر حسين
شكراً يا تيمو
قديماً قالوا من شابه أباه ما ظلم
أنا بأقول من شابه آخاه ما ظلم
أخي العزيز أشكرك

مشمش
متشكر على المجاملة الرقيقة دي
بس أنا حليتها قبل كده وقلت أشد شعر اللي جنبي

تحياتي للجميع

Unknown said...

نعيما يا استاذ
عموما كدة احسن الحر جاى بس متملهاش تانى مش كل مرة تسلم الجرة المرة الجاية تعور نفسك ولا حاجة

قصاقيص said...

نعيما يا استاذنا
ايه الوسامة دي بعدالحلاق؟
انا بموت ي
bruce willis
و
JASON STATHAm
واي حد حالقها بطاطس
بجد خاف علي روحك مني ...ممكن أطاردك..قدم فيا بلاغ وخد عليا تعهد من دلوقت بعم التعرض ليك
.......
عموما:انا كمان عندي الوسيله اللي تحميني من الشد في شعري....س اكيد مش الحلاقة.....الحجاب طبعاً
تحياتي أيها الوسيم

kareem azmy said...

بجد بجد
زي القمر
بجد والله دى احلة من نجوم السيما
و شكلي هعملها زيك

بس ادعيلي ابقا حلو كده زيك

كريم

Yasser Hussein said...

ايوية
شكرا ع النصيحة بس أنا بأقص شعري بنفسي بقالي 3 سنين والحمدلله عمري ماعورت نفسي
حد عمره سمع ان ماكينة حلاقة بالكهربا ممكن تعور
ممكن تكهرب بس

قصاقيص
الحمد لله انا مسافر بره مصر
محدش هيقدر يتعرض لي
هاهاهاهاه
ياجماعة حقيقي بتحرجوني بكلامكم الرقيق ده
وربنا يديم عليك نعمة الحجاب

kareem
أيه يا عم أحلق ولا يهمك
كلها يومين ويطلع تاني
والناس هتتعود على شكلك وهيشوفوك
منور.. منور
زي القمر
وصلت طبعا


خالص تحياتي للجميع وأشكركم على مجاملتكم الرقيقة دي

bentfalestine said...

تحياتي خيي .. مع انها زيارتي الولى و الاكيد انها مش حتكون الاخيره بس اولا نعيما .. بجد الصورة تحفه اه و شكلك روعه.. بس هي نفس القضية حتشد ايه لانها اصلها الايام الي جاية ما تبشرش بخير كان لازمها شعر ..
لا صدقا رسوماتك رائعه .. وفنان و انا لا يحق التعليق على فنك الجميل تحياتي و اعذرني ع التطفل اليوم و المرات القادمه

Yasser Hussein said...

bentfalestine
بنت فلسطين ... أشكرك على زيارتك وتعليقك الجميل ... أنا زرت مدونتك
بداية قوية .. عسى الله أن يجعل لك دور من أجل قضية بلدك
وأهلا بيكي صديقة دائمة للمدونة

خالص تحياتي

Dalia said...

اقولك على حاجه و ماتقولش عليا بهزر
انت كده احلى من برتنى سبيرز

Yasser Hussein said...

Dalia
مينفعش
أننا نقارن بين وسامة الرجل وجمال المرأة
فلكل منهم مقاييس مختفة
يعنى مينفعش امدحك مثلا واقول لك انتى احلى من رشدي أباظة

جميع الاصدقاء
أحب أوضح أنى لما أتكلمت عن موضوع قص الشعر لم يكن هدفي المقارنة بيني وبين بروس ويلز أو برتني من حيث الوسامة أو الشكل..
فأنا قلت بالنص
هو بروس ويلز أجدع منك؟
ولا برتني سبيرس عندها ماكينة حلاقة بالكهرباء أحسن من اللي عندك
كنت اطرح فكرة الجراءة في قص الشعر
ولما اتكلمت عن برتنى ركزت كلامي على الالة المستخدمة فى قص الشعر وليس شكلها

وأيضا تعرضت لفكرة شد شعر الرأس بسبب ما قد يواجهه المرء من حماقات محيطة به فى حياته

أرجوكم يا جماعة وبدون زعل حاولوا قراءة مابين السطور...
أشكركم جميعاً على كلماتكم ومجاملتكم
الرقيقة..حقيقي أنا مكنتش متخيل كم التعليقات الكتيرة دي
الظاهر الواحد كان لازم يقص شعره ع الزيرو من زمان

خالص تحياتي للجميع

المزاجنجي said...

انا لما شفت الصورة دي افتكرت المثل اللي بيقول : لا تأمن لأقرع ولا تاخد منه نصيحة لو كان ربك بيحبة كان خلا راسه صحيحة
المزجنجي

Yasser Hussein said...

Political joke نكت سياسية
أشكرك على تعليقك المرح وخفة دمك اللي أكيد كل زوار مدونتي هيستشعروها بين طيات كلماتك المليئة بالعقل والحكمة

خالص تحياتي

Unknown said...

انا نفسى بنت هيا اللى تحلقلى شعرى وذقنى نفسى اجرب ان بنت تحلقلى واشوف هتعمل ايه هتعرف ولا لا واعرف ذوقها