جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Thursday, April 12, 2007

يورك شير تيريور

يورك شير تيريور ... ده مش اسم رئيس لدولة صديقة ... أواسم بلد من البلاد اللي في مجاهل افريقيا
ولا حتى إسم دوا كحة أو مضاد حيوي من المستورد
ده اسم نوع من الكلاب ... وأنا باتصفح إحدى الصحف الاعلانية الكويتية ... وطبعا مش هقول اسمها عشان متبقاش دعاية
لقيت الاعلان اللي فوق ده .. وصورة المحروس" يورك شير تيريور" منورة ... واللي منور أكتر قيمة المكافأة
اللي هيحصل عليها اللي هيرجعوا لبيته .. أصله يا عيني تايه ... غالباً هرب من كتر ما زهق من أكل اللحم وشرب الحليب منزوع الدسم
والحمام اليومي بالشامبو والبلسم
عارفين يعني أيه 500 دينار كويتي؟ ... يعني 1500 دولار أمريكي
وكل واحد يحسبها بعملته
عرفتوا بقى قيمة " يورك شير تيريور" عند أصحابه؟
كملوا أنتم باقي الكلام ... صباح الفل

11 comments:

Anonymous said...

انا الاولي
اول مرة اعرف قيمة المثل الي بيقول الي يلاقي دلع وميدلعش يبقي حرام علية حتي لو كلب فيها اية هو مش ذنبة حاجة ولا فاهم حاجة المشكلة في الي بيدلعو ربنا يكتر من امثالهم ومش علي الكلاب بس ياريت البني ادمين اولي
ولا عزاء لكلاب الشوارع المصرية

SomeOne said...

:))

يا ريت كل واحد منا يلاقي اللي يحبه قوي

زي صاحب الكلب ده

:))

بس اكيد والمفروض حيبقى المبلغ اكبر من كده

قصاقيص said...

كلاب هايصة....وبشر لايصة

Anonymous said...

عاااااااااااااااااااااااااااااا
والنبى ياخويا ممكن اطلب طلب
ممكن حد يكلملى الباشا ده يسفرنى لاى بلد عربى؟؟؟

hoda omran said...

ياحسرة قلبى ياخواتى
طب ممكن انضف الكلاب اللى فى شارعنا
وهحميها بالشامبو ابو ربع جنيه بحاله ويدينى ميية واحدة من اللى عارضها
ولا حتى ياخد الواد جارنا الغلس بدل البيه الكلب بخمسيناية واحدة بس
واهله ما هيصدقوا

Anonymous said...

انت بتقول فيها
انا من فترة قريت مقالة لرئيسة تحرير مجلة فلاش المصرية
و ديه مجلة خاصة بنجوم المجتمع
عن رجال الاعمال و صور المزز
.....
المهم المقالة كانت بتعيط فيها رئيسة التحرير عشان المدن الجديدة فيها ناموس و تطالب المسؤليين بالتدخل بشدة لحل تلك الازمة
.....
بوست لذيذ

Yasser Hussein said...

مشمش
عندك حق الكلب مالوش ذنب .. المشكلة في اللي بيدلعوا

شادي فايد
فعلا الحب بقى عملة نادرة بين البني آدمين

قصاقيص
قلتي المفيد ... كلامك في الجول

وينكى
قصدك أنهي باشا فيهم الكلب ولا صاحب الكلب؟

همسات
ممكن تعملي إعلان بمقترحاتك دي وخصوصا
موضوع الواد جاركم الغلس بس طالما غلس محدش هيعبره

أحمد مختار عاشور
هي المدن الجديدة مافيهاش غير مشكلة الناموس
مافيهاش مشكلة مواصلات ولا مياة جوفية بدأت تظهر تحت المباني
خلينا نتكلم عن الكلاب أحسن


خالص تحياتي وأشكركم على تعليقاتكم

•«ρяoιd»•™ said...

صباح الجمال

عادي يا ياسر يا حبيب قلبي

مات كلب الوالي كل الشعب مش في الجنازه

مات الوالي محدش عبره

هي دي الدنيا بقي

تحياتي

Unknown said...

المكافئة كبيرة والتاية كلب مع الاعتزار للمثل
تفتكر انا لو ابنة تاة هيعرض المكافئة الكبيرة دة

BaSsMa said...

وللكلاب حظوظ

Yasser Hussein said...

•«ρяoιd»•™
حلو المثل ده .. وحلوة منك ياحبيب قلبي ..حسستني أننا نعرف بعض من زمان

ايوية
المثل اللي أنتي قلتيه مبتكر وبصراحة مناسب جدا للموقف ... عندك حق

BaSsMa
دوما تتبعي منهج خير الكلام ماقل ودل في تعليقاتك .. بس جبتي الخلاصة


خالص تحياتي للجميع وابقوا زوروا المنتدى بتاعي هو تحت التعديلات والتظبيطات