جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, April 25, 2007

فلحوط و زقلوط


فلحوط كاتب شاب غاوي يكتب في موضوعات كبيرة وشائكة ويمكن تكون أكبر من سنه وخبرته في الحياة .. فلحوط بيقرأ كتير في جميع الاتجاهات ولجميع الكتاب وكون مخزون جيد جوه دماغه من كتر ما قرأ للكاتب عبد السميع وللكاتب أبو سريع وغيرهم من الكتاب الذين أثروا في وجدان شباب كتير .. زقلوط كاتب شاب غاوي يكتب برضه ونفسه يعمل مناضل .. بيناضل في طوابير العيش .. وبيناضل في زحام المواصلات .. وبيناضل في الجري ورا لقمة العيش .. المهم أنه غاوي يكتب عن النضال ومناضلته هو بالذات ... فلحوط نزل كتاب بعنوان كباب الحلة ومشتقاته ... وكان فلحوط دائم الشكوى من زقلوط أنه مش بيعبره ولو بمقال أو خبر صغير في المجلة اللي بيشتغل فيها .. إلى أن جاء اليوم وزقلوط نزل له كتاب بعنوان كباب الحلة ومشتقاته وتوابعه .. وفي مقدمة الكتاب أثنى على فلحوط الذي سبقه واصدر كتاب عن نفس الموضوع .. ووصفه بالكاتب الرعديد وأستاذ الأساتيذ ..فلحوط أشترى الكتاب .. ومصدقش عينيه .. بقى زقلوط بيوصفني بالكلام الحلو المفتكس ده ... وقال لنفسه : واضح أنى ظلمته ... قام فلحوط وفي أول لقاء تلفزيوني له .. عندما سألته المذيعة : وتفتكر حضرتك بما أنك من الكتاب الشبان مين من الكتاب الشباب اللي ممكن نقول عنه أنه من الواعدين؟ .. بسرعة رد : زقلوط .. أيوه .. زقلوط هو ده الكاتب الشاب الوحيد الواعد .. وأحب أقول له من خلال البرنامج .. ربنا يخليك للبلد

15 comments:

Anonymous said...

الله
بوست جميل اوى
الواحد بيكتشف فيك حاجات جديدة كل شوية يا فنان
..............
انت عارفنى بحب اشارك اللى معايا فى اى حوار انا شغال فيه
عشان كدة
بهديلك الاغنية ديه
http://www.6rbtop.com/listen.php?song_id=32543&type=au&q=hi

Yasser Hussein said...

أحمد مختار عاشور
على فكرة دي حلقات ودي الحلقة الأولى
أتمنى أنها تكون عجبتك
مع الأسف اللنك اللي بعتهولى للغنوة مش بيفتح وأشكرك على اهتمامك بمشاركتى في أي حوار أنت شغال فيه

خالص تحياتي

Yasser Hussein said...

أحمد مختار عاشور
أخيراً اللنك فتح ..
غنوة عيب عليك للمطربة الصاعدة سومه
تصدق إن الغنوة تصلح أننا نوجهها لأمثال زقلوط من الكتاب المنافقين ربنا يكفينا شرهم جميعا

خالص تحياتي ومتشكر ع الغنوة

Anonymous said...

أنا أول مرة أزور المدونة
حقيقى مجهود رائع من فنان متميز
بس بصراحة القصة دى قريتها كذا مرة
وحاسه انها لسه ليها بقية
أنا ماليش مدونة بس اتمنى لو عملت واحدة تبقى جميلة زى مدونتك
بس كان لازم أعلق عشان عجبتنى أوى

نهى منير said...

الفنان ياسر حسين
حقيقى أنا فرحانة كتير بمدونتك
فيها كل حاجة
كاريكاتير ومزيكا وشعر
والقصة دى جنان
يا ريت تشرفنى فى مدونتى
وبعد اذنك هكون زائرة دائمة لمدونتك

باي

Yasser Hussein said...

رانيـــا
أهلا بيكي صديقة جديدة ودائمة للمدونة
واشكرك على مجاملتك الرقيقة
بالنسبة للقصة أنا بأحب أتبع أسلوب التحريض على التفكير لدى القاريء وربط العلاقات والاستنتاجات
معلش كلامي مكعبر
ببساطة الحدوتة دي بتحصل كتير بين العاملين بالحقل الصحفي من مجاملات متبادلة تصل احيانا إلى حد النفاق


نهى منير
أهلا بيكي يا نهى
وكويس ان القصة عجبتك للدرجة دي
إن شاء الله أزور مدونتك وأعلق كمان

خالص تحياتي للجميع

المزاجنجي said...

القصة المستفادة من البوست ده ان كيلو كباب الحلة بخمس جنيهات وان الناس ممكن تبيع بعض على ربع كيلو

تامر حسين said...

فلحط فلحط

Yasser Hussein said...

المزاجنجي
حلوة دي .. تعليق مختصر بس فيه الشفا

تامر حسين
مش فاهم قصدك؟

خالص تحياتي

Anonymous said...

الهى يارب يتبقلظ كل اللى بيعملوا كده
قولوا امين

Yasser Hussein said...

وينكى
حمدلله ع السلامة يا بنتى
وحشتنى تعليقاتك الجميلة
وحلوة حكاية يتبقلظ دي
هاهاهاهاهههه

خالص حبي وتقديري

بسمه عبدالباسط said...

بجد قصة جميلة جدا
بوست هايل

Yasser Hussein said...

bos bos
هى مش قصة قد ماهي مواقف
ترقبي الحلقات القادمة من فلحوط و زقلوط

خالص تحياتي

تامر حسين said...

تامر حسين
مش فاهم قصدك؟


من الواضح انك مبقتش بتفهمني خالص اليومين دول

Yasser Hussein said...

تامر حسين
أخي العزيز أنا احيانا باحتاج لمزيد من التوضيح .. عموما حصل خير

خالص تحياتي