جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Monday, May 7, 2007

فلحوط و زقلوط 2


فلحوط بعد أن أعلن أمام الجميع وعلى الهواء مباشرة في اللقاء التلفزيوني ... إن زقلوط هو الكاتب الشاب الوحيد الواعد .. كان متوقع أن يبادله زقلوط نفس هذه المجاملة في أول لقاء تلفزيوني له ... فعندما سألت المذيعة زقلوط من هو الكاتب الذي ترى أنه يمثل جيلك من الكتاب الشبان ... أجاب زقلوط سريعا ضاحكا ... هاهاها .. هما فين الكُتاب الشبان دول؟ .. أعتقد إن أنا أول جيلي ويمكن بعد كام سنه يطلع واحد ولا أتنين يكتبوا حاجة تنفع تتقري ... انفجر فلحوط من الغيظ .. وضرب شاشة التلفزيون بزجاجة الكاتشب التي كانت في يده .. إنفجرت شاشة التلفزيون .. وتطايرت شظاياها في الهواء .. في حين فلحوط أخذ يصرخ : الواطي .. الجبان .. بقى بعد ما أطلعه السما ... يتجاهلني كده .. يرن التليفون فيرفع فلحوط السماعة صارخاً ..آلو .. مين معايا .. يرد عليه صوت مألوف ... آلو .. أزيك يا أستاذي .. شفت البرنامج بتاعي ؟ .. إن شا الله يكون عجبك .. يشعر فلحوط أن الدنيا تدور به .. غالباً من ارتفاع ضغط الدم الذي اصابه .. يرد ببرود .. زقلوط .. يا سلام .. ده برنامج جميييل .. وكنت منور ع الشاشة لدرجة إنها إنفجرت من كتر النور

14 comments:

شيماء الجيزى said...

يا كتر خيرك يا استاذ ياسر
انا موت من الضحك والله وفى وقت مكنتش ابدا اعتقد انى هضحك ابدا ابدا
اسعدتنى اسعدك الله
من واقع مرير
مضحك مثير
احييك يا استاذ ياسر
تحياتى

SomeOne said...

هو مين عمل ايه
؟؟

نهى منير said...

هاهاها
لذيذه اوى القصة دى
فنان بجد يا استاذ ياسر
انا رجعت للحلقة الأولى عشان أفهم أكتر
حقيقى ضحكت كتير
بــــاى

•«ρяoιd»•™ said...

هههههههههههههههههههه

عسل يا ياسر

بس تصدق

كلهم بقوا فحلوط و زقلوط

تحياتي

Yasser Hussein said...

شيماء الجيزى
حقيقي أنا سعيد إن القصة عجبتك وضحكتك .. جميل احساس ادخال البهجة على قلوب الناس

شادي فايد
أنا متأكد أنك فهمت القصة بس بتحب تعلق بأسلوب مرح

نهى منير
إن شاء الله الحلقات القادمة هتضحكك أكتر وهتوصل مفاهيم أكتر

•«ρяoιd»•™
لا يا أستاذ مش للدرجة دي .. مش كلهم بقوا فلحوط وزقلوط .. في ناس لسه بتقول الحق ولا بتنافق ولا بتجامل

خالص تحياتي للجميع

بسمه عبدالباسط said...

حلوة قوى القصة دى
هايل يا فنان

Anonymous said...

هاهاهاهاهاهاهاهاهاهاهاهاهاهاهاهاها
تمااااااااام بجد روعه و زى العسل و حاسه ان وراها معانى خفيه كتييييييير
بس عموما حلوه بجد
بخصوص البلوج و الله بفكر بس لسه ما اتخذتش القرار لما اعمل ميل الاول هاهاهاها
by the way...thanks for make it for anonymous too...i forgot to thank u before :)
some one

Yasser Hussein said...

bos bos
أهلا بيكي وأنا سعيد إن القصة عجبتك

some one
القصة مفيهاش أي معاني خفية
القصة بمنتهى الوضوح بتتعرض لظاهرة النفاق والمجاملات بين المثقفين
وده ممكن نقابله كل يوم مع ناس كتير
مش عارف ليه مش مقتنع إن معندكيش إيميل .. ده كل الناس عامله إيميلات
حتى عم دعبس البقال

خالص تحياتي للجميع

تامر حسين said...

ههههه وانت السادق عم دعبس بقي معاه لاب توب ماشي بيه دلوقتي
ومقضيها ويرلس انتر نت ببلاش
الموضوع جميل وخصوصا الشخصيه المرسومه
تحياتي

Anonymous said...

حقيقى يا أستاذ ياسر أنت فنان
قصة ورسم معبرين جداً
حاجة مضحكة فعلا
فلحوط يتنرفز ويشتم زقلوط
وأول ما يسمع صوته يرجع يجامله تانى
فعلا البنى آدم نفسيته معقدة

Yasser Hussein said...

تامر حسين
لا وأنت الصادق
عم دعبس كمان شايل المحمول أبو أتنين كاميرا
هاهاهاههه
أنا مبسوط إن الشخصية الكارتونية دي عجبتك

الفارس الوحيد
أهلا بيك صديق جديد للمدونة
واتمنى يكون لك مدونة عشان أرد لك الزيارة
بس على فكرة رد فعل فلحوط ده طبيعي جداً
وكتير من الناس اللي قلبهم طيب
مجرد ما الشخص اللي متضايقين منه يتصل بيهم .. بينسوا كل الزعل
بس الكلام ده مش على كل الناس

خالص تحياتي

تامر حسين said...

انت كل شخصياتك بتعجبني وخصوصا هارون

تامر حسين said...

انا حطيتلك لنك علي المنتدي بتاعك ياريت تخش تشوفه في السينما الهنديه و اتمني الاهتمام بالمنتدي اكتر بليز

Yasser Hussein said...

تامر حسين
أخي العزيز .. المنتدى مش ملكي لوحدي
أنا أقمته ليكون ملتقى المواهب الشابة وكنت أتمنى إن الشباب يتفاعل أكتر ويشاركوا بكتاباتهم
ولكن يبدو أنهم شغولين بأمتحانات الجامعات اليومين دول
ربنا يسهل ونشوف مشاركات قريبا لكل أصدقاء كارتونيا
واصدقاء منتديات ياسر توون

خالص تحياتي