جميع المواد المنشورة بالمدونة تخضع لقوانين حماية حقوق الملكية الفكرية .. وأي نقل أو إقتباس بدون ذكر المصدر يعرضك للمساءلة القانونية

Wednesday, January 2, 2008

يا مطافي .. إلحقوني

الحكاية يا جماعة اللي هأحكيها لكم الآن حدثت بالفعل .. واحد مصري مغترب في دولة خليجية يسكن مع مجموعة من الشباب في شقة .. مشاركة سكن يعني .. الشباب اللي معاه خرجوا لأشغالهم وقفلوا باب الشقة بالمفتاح ونسيوا يصحوه .. ولما صحي من النوم علشان يروح شغله أكتشف إن مش معاه مفتاح وأنه محبوس في الشقة ومش عارف يروح شغله .. أصابه الذعر وبسرعة اتصل بالمطافى علشان يفتحوا له الباب ... رجال الاطفاء في أقل من عشر دقائق كانوا تحت المبني وهو وقف في البلكونة يستغيث بيهم علشان يكسروا له الباب ، رجال الاطفاء طلعوا له السلم الشهير اللي في سيارة الاطفاء.. الأخ قعد يصرخ : أنا ما أنزلش ع السلم ده .. أفتحوا لي الباب .. لحد هنا وأنا بأسمع الحكاية قعدت أضحك وما أعرفش إذا كان نزل من ع السلم ولا فتحوا له الباب لكن مع استعراض الاحداث لقيت اسئلة كتير بتطرح نفسها وإجابات كمان .. منها : لو كان الأخ ده في مصر وحصل معاه نفس الموقف هل كان سيصاب بالذعر لأنه مش هيروح الشغل في اليوم ده؟
ولا علشان الفلوس بره أكتر وخسارة يضيع أجر يوم ؟ ولو كان أتصرف بنفس الطريقة في مصر وأتصل بالمطافيء هل كانت سيارة الاطفاء هتوصل له بنفس السرعة ويحاولوا ينقذوه؟ ولا كانوا هيقفلوا السكة في وشه ومش بعيد يفتكروا أنه واحد بيستعبط؟
بصراحة الموقف لما اتحكى لي وهو يخص شخص أعرفه حسيت أنه مشهد من فيلم لمحمد سعد أو هنيدي
ولو تم اقتباسه وشفتوه في فيلم قريبًا أبقوا أعرفوا أنه أتلطش من هنا .. ههههههههه
في انتظار تعليقاتكم

13 comments:

أسامة أبوالخير said...

أولا أنا سعيد علشان أول واحد يعلق على الموضوع هي فعلا حكاية تشبه مشهد من فيلم عربي كوميدي وإن كان لم ينفذ حتى الآن لكن صاحبك دماغه لاسعه مكنشي معاه موبايل يتصل على صحابه ولو افترضنا إنه بخيل أيهما أكثر تكلفة غياب يوم عن الدوام ولا باب الشقة لو تعرض للكسر من قبل رجال المطافي طبعا في مصر لو نفس الشخص تعرض للموقف هيكون بالنسبة له نكته يفضل يضحك عليها اليوم كله

تامر حسين said...

والله سيادتك بتقول انهم جم عشان ينزلو من البيت
في حاله لما الشقه الي فوقينه ولعت كلها المطافي جت بعد ما طفيناها وكانت الخسائر كببيره جدا جدا
الحمد لله علي كل شيئ

تحياتي

Unknown said...

و لا الكطافى كانت حتيجى على طول و لا كان حيصاب من الذعر عشان ما رحش الشغل بس حركة صحابه الى نسيوا المفتاح هى دى الى ممكن تحصل فى مصر

اسكندراني اوي said...

يا عمنا مفتاح مين
دا الدنيا بتبقى والعه
ومتفحمه والبهوات بيجو بعد ما تكون خربت
يا عم والنبي بلاش تحرق دمنا بزياده الله يكرمك

Unknown said...

امال لو كان فى حريقه كانوا عملوا ايه
وطبعا لو فى مصر هيكمل نوم وهيقول ده قضاء ربنا هنعترض مفيش شغل النهاره
لا وضحكنى اوى ان صاحبك بيتامر مش عاوز ينزل بالسلم
هههههههه
حقه صراحه الى جابم فى 10 دقايق يديله حق يدلع

Yasser Hussein said...

أسامة أبوالخير
الفكرة أنه حب يثبت حالة علشان المدير بتاعه ميخصمش عليه اليوم ده لأنه مرحش الشغل أو اتأخر

تامر حسين
لازدحام الشوارع عندنا في مصر ممكن ألتمس لهم العذر في التأخير لكن مش لدرجة أنهم يتأخروا لبعد ما النار تأكل كل حاجة

عاليا حليم
هما نسيوا يصحوه أصلا وخرجوا وسابوه نايم وهو معهوش نسخة من المفتاح
توليفة كوميدية مش كده
:)

اسكندراني اوي
لأ وساعات بيطفوها بشلالات مائية بتخرب أكتر من النار .. ربنا يستر

لماضة
زي ما قلت هو كان بيثبت حالة عشان ميتخصمش من مرتبه حاجة
:)

خالص تحياتي وشكري للجميع

son's egypt said...

السلام عليكم
تصور
ينفع بجد يكون مشهد في فيلم كوميدي

حسن ارابيسك said...

اولا مساء الخير ياسحس
انا أعتقد الموضوع مش زي ما حللته انت وهو موضوع فلوس كتيره وفلوس قليلة
الموضوع ببساطه الراجل ده ممكن يكون عنده فوبيا الأماكن المغلقة
وبالتالي لم يستطع المكوث هكذا
وثانيا عنده أيضا فوبيا الأماكن العاليه واستحالة يتخيل نفسه على هذا السلم المرتفع من الأرض بارتفاع شاهق ومتفتكرش الموضوع عند الناس دي بالبساطه دي وانه ممكن يعدي وكان ممكن يظل حبيس او ينزل على السلم
لكن انت لقيت نفسك عاوز تعرج على موضوع تاني خالص لقيت فيه فرصة تسنح لك تتكلم في جزئية مهمة جدا وهي من سلبياتنا لدينا وده حقيقي وتساؤلك اجابته معروفه لدى الجميع لذلك كان أملي أن بدلاً من أن يضيع جهدك في كتابة البوست بما انك راجل فنان كاريكاتير كنت تناولت الموضوع بلوحى كاريكاتيرية تخص الموضوع وتكتفي تحتها بعنوان الموضوع
شكرا لاتاحة فرصة التعليق

Anonymous said...

hahahahahahaha wallahy el a7' da fay2 w ray2...bs da lw kan fy msr kan 7aykml nom tab3n el nom soltan...w elmtafy da lw el bet wl3 beh 7ayego b3d ma yetfeh wlad el 7lal w el bet yo23 kman(7ds blf3l)
happy new year w yarab kol ayamk tkon happy w m3lsh 3la el mo3ida el 2t27'rt shwya w matt7bssh fy el bet abdn w lw 7asal blash tkon fy masr ;)
some one

koukawy said...

هههههههههه
اكيد لو في مصر المطافي هتعمل فيه زي ما اتعمل
في حريق بني سويف
و علي رأي اطاطا.... و مش عايزه افسر اكتر من كده يا حضرة اليوسباشي

AHMED SAMIR said...

هو فعلا موقف كوميدي
بس دة لو في مصر..مش عارف كان ممكن اللي رد عليه في التليفون يقول له كلام اقل ما يقال عليه انه قبيح
اذا كان لو لا قدر الله كان بيولع محدش هيسأل فيه..ما بالك بقى لو محبوس في الشقة ومش عارف يروح الشغل؟!!!
تحياتي يا فنان

نبيله الوكيل said...

السلام عليكم ورحمة الله
بصراحه انا اكتر حاجه ضايقتنى هيا موقف الراجل نفسه
بدل ما يتصل باصحابه اتصل بالمطافي
وبدل ما ينزل على السلم علشان يقضي مصلحته عمال يتشرط وعاوز حد يفتح الباب

المشكله فينا احنا بنى آدمين غير طبييعن اطلاقا
مش بنحدد اولويات حياتنا
المهزله فينا احنا مش فى المطافي فى مصر ولا خارج مصر
ممكن يكون ردي جارح بس فى حاجات شكلها يضحك ومضمونها يبكي ويقهر
وان كان فى حاجه تزعل هو تفكير الاستاذ اللى مش راضي ينزل ع السلم

Yasser Hussein said...

son's egypt
شر البلية مايضحك

حسن ارابيسك
قياسي للموضوع من الناحية المادية .. الفلوس يعني ناتج عن خلفية لمعرفتي عن طباع هذا الشخص وحرصه على المادة
أما حكاية فوبيا الاماكن المغلقة وفوبيا الاماكن المرتفعة فمن باب أولى أنه كان أتصل بطبيب نفساني بدل المطافى
:)))))

some one
سنة جديدة سعيدة عليكي .. وواضح إن فيه إجماع على رد فعل المطافى
:)

koukawy
معلش أنا يمكن مش متابع جيد
بس أيه اللي حصل في حريق بني سويف؟

A.SAMIR
واضح إن الكل واخد فكرة زي الفل عن المطافى
:)

Nabila
مرحبا بيكي في كارتونيا
ضيفة دائمة إن شاء الله
الحلول اللي أنتي قلتيها ممتازة
بس نظراً لمعرفتي لطباع الشخص المحبوس فأنا أؤكد أنه كان يريد أن يثبت حالة حتى لا يقوم المدير بخصم اليوم من راتبه .. المادة هي المحرك القوي للموضوع هذا خلاف رد فعل المطافي


خالص تحياتي للجميع